SANTYAGO 1

1Ahos Santyago kagsorat ha hayo. Ahon Diyos hanggan in Kiristo Hisos kagfon intam, it sogowan. Ho gwas hayo, kan Diyos manga nafili, ka nanarowayan ha sadik baba daga. 2Manga fadwasay, tam fag masolong di intam fangayofan, nyawa tam basad manga fakahoriyan bokod bokod kagsolay intam. 3Maskin tam twa kitay tam nodwag fagomon igsyag in Diyos, tam no basad manga mahori, labi man imrigon intam fangayofan igsyag hanya. 4Yakanga, tam fag danwa karigon odi, karigon odi, tam nogsyag hanggan has aban, kaarakitay intam manga fangayofan imbali hosto, idwa yadi ha korang. 5Dapat, nyawa faktaw santam, nodwa ha kadonongan, sagadan gin Diyos. Ginya madis Diyos domisag hanya kadonongan, maskin is Diyos madisagon, idwa yadi somogat has taw. 6Dapat, tam nogsagad wa orongan, fag syag wa fiya fiya. Fag idwa gadowan intam fangayofan, maskin ka gadowan kitos taob dagat, bagyo odi kagdiya nyawa haday. 7Nyawa faktaw santam no gadowan it fangayofan, idwa twa fiya fiya it fakasayaon, fag idwag syag kitay hanya ha tanggapon gisagfon intam, nyawa kana. 9Intam fadwasay ka myabog fag igbaya wan is Diyos nogfaabwat it kangayanan. 10Hanggan intam fadwasay ka maakwa fag igbaya yadis Diyos nogfalibaba hanya, kawa ka kaakwaan imliyam wan kitos borak lamnon. 11Ka myanit no kaabwat, kawa myanit wa dahol, ka manga lamnon kalayong di. It borak karabak wan, idwa yadi fiya kabantay. Kitonya yadi, ka taw maakwa bilang yadim layong, nyawa haraw kalibang odit manga ibolon fangaboyagon. 12Tam nodwa kaoman, nyawa hagsolay intam, intam manga fangayofan masolong. Maskin ka kahoriyan nomtolas wan, tam no naagwanta wan, is Diyos ha fasangbaw hantam ka haboyagan idwa ha katabowanan kantam Fon togon bato disagon has manga galwasi hanya. 13Nyawa faktaw no ha lagan mahori kagsolay hanya, fag idwag lwang kitay is Diyos kagfaloksowan hanya. Idwa ha syagan igfaloksowan in Diyos, hanggan is Diyos idwa yadig faloksowan nyawa faktaw. 14Kasta sadili fangayofan masayaon kagfaloksowan has taw, igfasayagdog hanya has ogali dwat. 15Ka bali fangayofan masayaon nogtobo, hanggan nogdalid, igbohad ogali dwat. Ginya madi ka ogali dwat nomdahol, it bohad kahatayan wan. 16Yatokitay angko manga fagalwasiyon fag manga fadwasay, tam fag idwa gadayaan. 17Sonson wa fiya in Diyos manga disag hantam, hanggan fagayo fag manga maangay fag bagay gi wam tongod, gin Diyos intam Ama ka nahalig ka manga bagay kagfayawa intam. Dapat hanyadwa kaoman nyawa ginahin, idwag balihid, idwa yadig farom ka yawa gintam. 18Is Diyos nafabali intam it manga anak git fakaoronganan hampang, kawat fasadan kitonya, kaarakitay tam imbalit nafalayon gona git manga nahalig fagayo. 19Angko manga fagalwasiyon fag manga fadwasay, tam fag matohodan wan, tam fag idwa kafang igtalinga has taw. Fag idwa kasadi ginan gidolog. Fag idwa madalig sagot dwat donggon. Fag maayfanan yap fiya fiya. 20Maskin tam no kaisog idwag togbong intam kabali fiya san Diyos faglagan. 21Yakanga tam fag dayo ka manga mahaya fag ibolon. Obonan ka manga dwat fag ogali. Tam fag fasolon intam fangayofan sadi wak dahonya han Diyos nogfaanod it hampang, kantanom santam basad fangayofan. To fag hampang ka syagan igbawi intam. 22Tam fag idwag daya intam sadili maskin tam igtalinga odin Diyos hampang, idwa katanog. 23Kagtalinga odi, dapat idwa katanog, kitos sadik taw ganino salamin, 24igbantay it walong, ginyag fabayaan wat sadili, idwag tohod no kinday it walong. 25Dapat ay, kagbantay fagaba fagaba ka togon hosto, kagfalfas intam, hanggan igtohod kat donggon gin Diyos hampang, igfayayom yadi hanya katanog fagaba, yabay tonya fag taw bomaya wan nyawa kanat ibolon. 26Nyawa faktaw no gayfan kitay hanya masimbaon wa dahol, dapat idwa fiyat hampang, hanyag daya yapdit sadili, idwa yadi ha kahologan nyawa masimbaon wan. 27Dapat, nos Diyos intam Amag lag, ka fiya fag masimbaon orongan, igtogbong has manga olila, hanggan manga ina balo ta no ha fakahoriyon, idwa yadi falafit hat sadili fangayofan ka kadwatan gistay is baba daga.

will be added

X\