HIBRIYO 9

1Ka gona fag taranggapan madi ngap ha manga ogaliyon nogsimba. Ha balay yadi fanimbaan istay is baba daga. 2Ta nahalig sadik balay rotay, ha dowak lingoban. Kas dasogan fag salogan ta nogngayan, Nafabokod fag lingoban. Sinya ha salong sas tongod salangan, ha dinolang hanggan tinapay ista disag han Diyos, mafwalidan basad dinolang. 3Kat fadowa fag lingoban sas dayo fanahop rotay, ta nogngayan, Nafabokod man ka sadik lingoban. 4Sinya ha fanonogan famabanglo, hanggan haban taranggapan. Fagayo dowa ta nafababaw ginto. Sas basad haban ta ha nafasawad in Diyos nafatimawa fanganon mana hyabi, ista fagtohodon mafwalidan basad sohadan ginto. Ha akwa yadi in Aaron sokod ka faginan wa bomorak, igsigangat wan, hanggan ka manga bato dalafi ka ha sorat manga togon. 5Ka sas baba haban ka famwalidan folot, it ngayan, Tokawan Kaawaan. Sas tongod tokawan kaawaan ha dowak kirobin, kagfahilala kitay is Diyos sinya wan. Ka manga kirobin manga fakfak iglanbong ka Tokawan Kaawaan. Dapat no kati di, midya fomwayong igsadig sadi ha hayo it manga kahologan. 6Kitonya wat kafiyan sasta basad fanimbaan rotay. Sirang sirang ka manga fagalan-han-Diyos igsakbaw ka balis dasogan fag salogan kaarakitay fatonglos it bato ibolonon. 7Dapat ay, ka gorangon fag fagalan lamang kagsakbaw sas fadowa fag salogan, sadi di ginan sa sadik fangaraw. Idwag sakbaw sinya nodwa ha diya folot it disag han Diyos, kawa hat manga naogali dwat, hanggan yadi ka manga taw naogali dwat, igsakop yadi ista naibolon nyawa tadwa natwa kitay dwat. 8No sadi yapdi kagsakbaw sinya sadi di ginan sadik fangaraw, ka Maliyaw fag Falad igfatwagdog hantam fiya fiya kitay, idya kalwang maboklasan ka lingoban ka nafabokod man ka sadi, no ha akwa yapdi ka balis dasogan fag salogan. 9Tonya fag balis dasogan fag salogan igfahalimbawa yapdi ka kati fag manga masohod it fagfwayongon. Kasta manga nadisag hanggan nawatwat folot hayopan sinya han Diyos idwa syagan igfabali hosto ista manga fangayofan ka mangag simba sinya. 10Kasta manga naibolon sinya ha odis manga fanganon, manga inomon, manga ogali bokod bokod hasagfalinay baliwa. To fagayo manga bato ibolonon sas faglagan kasta ogaliyon no kandogay day is Diyos nodyag faoman fagayo fag manga bagay. 11Dapat ay, is Kiristo indasog wan. Is Kiristo ka gorangon fag fagalanhan-Diyos kagfatonglos fiya man has manga bagay gona. Is Kiristo ka fagalan sas fanimbaan ka dahol man it kangayanan, idwa hagkitonyak fiya. Bohonwa taw ka nahalig tonya fag fanimbaan, bohonwa gistay is baba daga fag manga bagay. 12Sadi di ginan is Kiristo no nasakbaw sas nafabokod man ka sadik lingoban, yakanga fiya wan. Bohonwa manga folot hambing, manga folot anak baka aman, kat nadiya disagon, dapat it sadili wa folot. Yakanga intohoyan kitay intam manga naogali dwat inliyam hanggan has aban aban. 13San Mwisis togon faglagan, ka manga taw no ha dwat, bilang fagliyon, imbali fiya ta nogfafarisikan ka folot manga hambing, manga todo baka, hanggan manga fogis gis domayaga baka kan-irog. 14Dapat in Kiristo folot bondi basta fag folot. Gin Diyos Falad, kadwa ha katabowanan, is Kiristo nadisag it sadili, kafiyaon, idwa ha dwat ngadi ogbot ogbot, it disag han Diyos. In Kiristo folot kagfaangay intam manga fangayofan hanggan isip, kaarakitay tam domayo intam manga ogali kadwa ha kahologan, tam omibolon yadi ka boyagan fag Diyos it ibolon. 15Yakangas Kiristo ka fagalan sas bago fag taranggapan, kawat kahatayan kagfaliyam intam manga ogali dwat kantam naibolon tam nogfasakop yapdi ka gona fag taranggapan. Kawa kitonya, in Diyos manga nafatawag fag manga taw tomanggap in Diyos manga bato disagon fagayo, kadwa ha katabowanan. 16No ha Kasoratan kagfatohoyan no hada aban ista manga sangkap, manga daga, fag imtohoyan kitay ka nahalig kasoratan natay wan. 17Idya mangorayan, kagfon no boyagan yapdi. No bay natay wan, ta bago di mangorayan wan. 18Kawa kitonya, nyawa ka taranggapan gona idya katohoyan nodya ha folot gis hayopan kandisag. 19Is Mwisis nafwayong has manga taw in Diyos natogon manga bato ogaliyon fagayo. Ginya madi, nabol manga folot anak baka aman, folot hambing, ha aktom danom, natogna sinya dararag fag olad topa, hanggan sadik falongfong isopo, ginya nafafarisikan ka togon Kasoratan hanggan ha sayo manga taw fagayo. 20Dayog fafarisikan, is Mwisis kampang yadi, iglwang, To fag folot kagfaganit in Diyos disag taranggapan ha hayo, hanggan nalwang, ham fag katanog it togon ha hayo. 21Kitonya yadis Mwisis nafafarisikan has Balay Rotay, hanggan kasta manga sangkap fagayo sas fanimbaan. 22No gin Mwisis togon, fagayo wa bangan fag manga bagay inlinay sas folot. Idwa yadi ha faliyam ogali dwat nodwa ha folot in-olan. 23Yakanga ka manga sangkap istay is baba daga fag fanimbaan, kagtolad ka manga sangkap san Diyos banwanan sam tongod, fag imlinay gis manga nafafarisikan folot hayopan kitonya. Dapat ay, fag bohondi kito ka folot hayopan kamdisag kaarakitay igfaangay ka manga sangkap san Diyos banwanan fag fanimbaan. 24Maskin is Kiristo idwa nasakbaw ha sadik lingoban ka nafabokod man ka sadi, ista nahalig kagtolad lamang ka orongan, dapat ay, nadagos wa nasakbaw han Diyos banwanan sam tongod, hanggan kati sawan Diyos atobangan, igfagalan intam sinya. 25Fangaraw fangaraw ka manga gorangon fag fagalan Hodyo igsakbaw has basad lingoban ka nafabokod man ha sadi, ha diya folot hayopan. Dapat is Kiristo sadi di ginan no nasakbaw, kaarakitay igdisag it sadili, intam fangafiyan han Diyos, tonya hosto wan. 26Tonya fag sadi di ginan nodya hosto, is Kiristo nangos fag fagaba wa katay gi yapdis hyabi, ka daga non-ganit. Dapat kati, no kaakbang wa has katabowanan fag manga masohod, sadi di ginan is Kiristo nonlag istay is baba daga, kaarakitay domaog manga ogali dwat kawat nadisag it sadili habilogan, bilang fangafiyan han Diyos. 27Kawan tohoyan has manga taw, ta fag matay sadi di ginan, ginya madi ha fatohoyan it hadasogan, 28kitonya yadi is Kiristo sadi di ginan nadisag it sadili habilogan, intam wa fangafiyan han Diyos, maskin hanya naagwanta nadiya intam manga ogali dwat. Hanya nombangkad ya aban, fawa fangafiyan domwag no kadi has ogali dwat baliwa, mangahot odi ka mangag fanaya hanya.

will be added

X\