HIBRIYO 7

1To fag is Milkisidik hyabi ista gorangon sas banwa Salim, in Diyos ka abwat man has fagayo fagayo, it fagalan yadi. Is Milkisidik natagbo in Abraham is Abraham no kaoli wan nontabo waglaban has manga gorangon. Is Milkisidik nafwayong hanya, Haw lomag im fagbayaon gin Diyos. 2Is Abraham nadisag han Milkisidik kat fasafolo git nadaog gis awayan. Bago bago in Milkisidik ngayan it kahologan, santam sanglitan, Kafiyaon fag gorangon nogbahala. Hanya ista gorangon yadi sas Salim a, santam sanglitan, it kahologan, hanya ka gorangon kagfon kahowayan. 3Idwan sorat no faktan Milkisidik ama hanggan ina, hanggan no faktat hafofowanan. It kasagayan hanggan kahatayan idwa yadin sorat. Kito yadin Diyos Anak, hanya sadik fagalan-han-Diyos. Bohondi kitay gis nanya odi fag masohod, hanggan has aban aban. 4Fandog ngay in Milkisidik kangayanan abwat. Is Abraham nadisag hanya ka fasafolo it nadaog gis awayan. Hanggan is Abraham haraw, no kitay di, sadi yadi wak ha kangayanan bilang wantam pinagkaama. 5In Mwisis togon igfatohoyan kitay kantalaga manga fagalan-han-Diyos gin Libi hasokfonan ka tomanggap manga fasafolo gis manga taga Israil. No kalwang ta nogtanggap tonya gi mandit manga fadwasay nyawa myasa wan Abraham manga hasokfonan. 6No kitay di, to fag is Milkisidik bohonwan Abraham hasokfonan, dapat natanggap yadi gin Abraham it fasafolo. Is Milkisidik nadogang yat manga hampang fiya han Abraham kan Diyos nafwayong it togonan bato disagon. 7Tam idwa gadowan kitay ka kampang fiya, igfasayagdog has taw, it kangayanan abwat man kat fakampangon fiya. 8In Libi hasokfonan, kagtanggap it fasafolo gis taw, katay di, dapat intohoyan sas kasoratan kitay is Milkisidik boyagan. 9Yakanga tam twa waglwang, no kitay di, nyawas Libi kagtanggap it fasafolo gis taw, nadisag yadit fasafolo han Milkisidik gin Abraham. 10No kalwang, is Libi bilang gofod yadin Abraham is Milkisidik no natagbo hanya, kawas Libi in Abraham fofo madayo. 11Ka manga fagalan-han-Diyos gin Libi hasokfonan ka nafwayong in Diyos manga togon has manga taga Israil. No nangos hosto wan ka gin Libi hasokfonan fag manga fagalan-han-Diyos it ibolon, kaarakitay igfabali hosto ista manga ogali, fag fawa ha iba fag fagalan kiton Milkisidik kadwa kiton Aaron. 12Nogfaoman ka ogali fagalan-han-Diyos, fag im-oman yadi wa ka togon. 13Kawantam Fon kantam faglwangon istay ka gis iba hasokfonan, idwa gin Libi hasokfonan. Hyabi idwa hanbali iba fag fagalan-han-Diyos, ngadi sadi, ginya fag hasokfonan. 14Fagayo twa kitay kagfon intam gin Hoda hasokfonan. Is Mwisis idwa naowas in Hoda ngayan nogfwayong hasagfagalan baliwa han Diyos. 15Ti labi man tam twa wagdog kawa ha akwa ya sadik fagalan-han-Diyos kiton Milkisidik. 16Bohonwa ka gis ogali togon kagfabali tonya fag fagalan, bohonwa kawa ginya fag hasokfonan ka taw, dapat kawa gis karigonan haboyagan kadwa ha katabowanan, hanya nonbali fagalan-han-Diyos. 17Maskin ka Kasoratan iglwang kawa hanya kiti, Haw ka fagalan-han-Diyos hanggan has aban aban, Kito yadin Milkisidik fag fagalan. 18No kitonya, ka togon gona in-oman wan maskin malombay, korang di, idwa yadi nasyagan igfafiya. 19Maskin ka manga togon has manga taw idwa nasyagan nafahosto ista manga ogali, dapat ay, kantam natanggap fagsyagon bohondi kitonyak fiya, tonya fag fagsyagon kagfaakbang intam han Diyos. 20Hanggan is Diyos nahampang marigon no nafabali ka bago fag fagalan-han-Diyos, dapat nogfabali iba taw fagalan, is Diyos idwa nahampang marigon. 21Dapat is Diyos nahampang marigon no nafabali in Hisos intam fagalan, kito ka Kasoratan iglwang, Kagfon fagayo nahampang marigon, Idwa yadig dowa ginan it naisip noglwang, Haw wa ka fagalan hanggan has aban aban. 22Kawas Hisos inbali fagalan-han-Diyos kitonya kagfatohoyan kitay, it bago fag taranggapan hantam im-anod wan. Tonya ka fiya man ka gona fag taranggapan. 23Sadi yak bagay kagfabokod ka dowak fagalan. Gis hyabi hyabi ta fagaba wagtobos ka fagalan no natay wan, kawadwa syagan igfadagos it bato ibolonon. 24Dapat is Hisos boyagan nyawa ginahin, idwa ha fagalan tomobos hanya. 25Kawa kitonya, maskin is Hisos boyagan hanggan aban aban kaarakitay igfagalan manga taw han Diyos, hanya bon lamang, hanya syagan digbawi hanggan has aban aban, fagayo ka gakbang han Diyos, nogdalan lan Hisos. 26No kitonya, is Hisos ka Gorangon Fagalan maangay hantam. Hanya ka syagan igfahosto intam manga kakorangan. Is Hisos maliyaw, idwa ha ogali dwat, idwa ha fabangdanan gi hanya. Hanya idwa kitos taw kitay ha ogali dwat. Kati hanyan abwat, abwat man kantam faglagon fag banwa. 27Is Hisos idwa kito ka tibak gorangon fag fagalan ka fiya igdisag manga nawatwat folot hayopan sirang sirang, bago bago kawat sadili naogali dwat, ginya madi kawasta manga naogali dwat iba taw. Dapat is Hisos sadi di ginan nawatwat it sadili folot, no nadisag it sadili habilogan. 28Ta no ha nafili manga gorangon fag fagalan hat ibolonon, ka maangay san Mwisis togon hyabi, tonya ha kagomowan di. Dapat ay, kanbali gorangon fag fagalan in Mwisis odi ginanan igtogon, is Diyos no nahampang marigon, kawan Diyos Anak wan. Hanyadwa ha kagomowan, inbali hosto hanggan aban aban.

will be added

X\