HIBRIYO 6

1Gwadi fag bohondi ka manga fabagowanan fagadalon kawa han Kiristo kantam fagadalon yapdi, fag ka mandi manga adalon kagfatwagdog intam fiya fiya. Fag bohondi intam dan wa fagadalon itfagonan kantam fagoliton fagaba, kito wasagdayo ka manga ogali kadwa fiya san Diyos fag lagan, hanggan fag katiwala hanya, 2kitos manga faadalon hasagfatogna baliwa, mangag fasalangday gamat has taw, kawa ka manga natay imboyag ya, hanggan kawa ha fadosaan idwa ha katabowanan. 3Yatokitay, tam fag fadagos yapdi intam adalon. Non Diyos wa kafangayofanan, mi omibolon tonya. 4Maskin kinda araw nogfasoyo han Diyos hanggan nogfafwali ya nangos ka manga nadayo ya, ham gayfan? No kitay di, ta natwa wagdog hyabi, ta fadi wadnadog in Diyos manga disag gim tongod, tan-aktom yadi wan has manga natanggap ka Maliyaw fag Falad. 5Ta nadog yadi wa fiya fiya in Diyos hampang kafiyan, hanggan ta nalag manga karigonan madolaw, ka bago dimlag fiya fiya aban. 6Ta no nadog wa fagayo, dapat ta nafalfas ya, fawa syagan igsoyo domwag, kawa bilang wagfapako ya in Diyos Anak sas nafatimbangan hayo, hanggan tagfahayan yagdog hanya. 7Nonsiwang ka mwayan kafiyaon, ka daga kagfatobo manga tanom kasta fagfakinabangon ka giyab sinya, tonya fag daga domog kafiyan gin Diyos. 8Dapat, no manga odi lamnon dogiyan kagtobo sinya fag daga, tonyadwa ha fakinabang. Is Diyos ngandayo nga domwat aban tonya fag daga, ginya madi, sas katabowanan, somonog lamang tonya. 9Angko manga fagalwasiyon, nyawa migfwayong kitonya, mi twa wa kitay kafiyaon hayo manga fangayofan. Ham twa no kana ka fiya ha hayo, hanggan igtogbong hayo kaarakitay is Diyos bomawi hayo. 10Is Diyos kafiyaon nogbahala intam. Is Diyos igtohod di hayo naibolon, kawa ham igtogbong manga kapariho intiwala, kagfalag kitay ham galwasi in Diyos. 11Angko fakasayaon orongan kitay, tam fagayo fagayo fag dagos wa kogodan hanggan has katabowanan, kaarakitay tam tomanggap intam manga fagfanayaon. 12Yakanga tam fag idwa kabali mafang. Tam fag tolad ka manga maagwantaon igsyag in Diyos, ginya madi igtanggap in Diyos togonan bato disagon. 13Is Diyos no nafwayong han Abraham it bato disagon hanya, naolit it sadili ngayan kaarakitay igfarigon it taranggapan, maskin idwa ha dahol man in Diyos ngayan kaarakitay igfarigon. 14Is Diyos nalwang, Angko disagon ha hyamo, intam togonan, ho faanod wa fiya fiya, ho faaywan yadi hyamo hasokfonan. 15Is Abraham idwag fagomon gagwantag fanaya kan Diyos natogon ha hanya, ginya natanggap wa tonya. 16Manga taw gwas sadik ngayan abwat man hanya it kangayanan, ginya madi no nafarigon it fwayong kitonya, imtabo wa balinya. 17Kitonya yadi, is Diyos igfaanod igfarigon it togonan bato disagon no gwas it ngayan, kaarakitay igfatwagdog has manga taw ka tomanggap it bato disagon kitay, it fangayofan idwa kaoman. 18Is Diyos idwag dowa ginan nogfwayong, hanggan idwa yadig bohag tonya fag dowak bagay. Ka sadik bagay, kawat togonan bato disagon hanggan ka fadowa fag bagay, kawag faanod no gwas it ngayan. Yakanga tam ka nalagyo han Diyos, intam wa logawan, intam fangayofan idwa kaoman nogsyag tonyat manga natogonan bato disagon hantam. 19Tam nogsyag kitonya, bilang wa ha gawid lobid santam fangayofan, kito ka sahayan sas baba dagat, ka ha lobid famatorosan, ha sayangan maganit, hanggan idwam bogloy. Tonya fag lobid igdasog hanggan wa ha sadik lingoban has basad fanahop rotay sas Fanimbaan-Dahol san Diyos banwanan sam tongod. Ka lobid ginya no masayangan, sas nafabokod ya domwag fag lingoban, 20kan Hisos nagsakbawan, nagona wantam nasakbaw, kawa hantam. Is Hisos sadik Gorangon fag Fagalan-han-Diyos sinya, hanggan wa has aban aban, kito yadin Milkisidik fag Fagalan-han-Diyos.

will be added

X\