HIBRIYO 5

1Hyabi is Diyos kagfili fagayo fag Gorangon fag Fagalan-han-Diyos gis fakaaywanan taw, kaarakitay fatonglos it ibolonon igfagalan han Diyos, kawag watwat ka folot hayopan kagfaliyam manga ogali dwat. 2Ka taw di fag Gorangon fag Fagalan-han-Diyos kito yadis taw ik magomo, yakanga igfahowayon wan has manga taw kadwa ha fakatwawon hanggan ka mangag falamang. 3Maskin hanya magomo yadit fangayofan kito yadi ka iba taw, hanya fag watwat folot hayopan kaarakitay igfaliyam it sadili naogali dwat, bohondi kastaw. 4Nyawa faktaw idwa fiya imbali ha kangayanan Gorangon fag Fagalan-han-Diyos no ha odit sadili fakasayaon. Is Diyos kagfabali hanya ha kangayanan kito yadin Diyos no nafabali in Aaron ha kangayanan hyabi. 5Kitonya yadi, bohonwas Kiristo kagfaabwat it sadili kaarakitay kabali Gorangon fag Fagalan-han-Diyos, dapat is Diyos kagfaabwat hanya no nalwang, Haw angko Anak, Aho hyamo Ama. 6Is Diyos nafwayong yadi sas iba layonan sas Kasoratan, Haw sadik fagalan-han-Diyos hanggan aban aban, Kito yadin Milkisidik fag fagalan -han-Diyos. 7Is Hisos nostay yapdi sas baba daga hyabi, hanya nandarangin nogdyang igrokyaw, igfaawaon in Diyos ka syagan bomawi hanya gis kahatayan. Maskin is Hisos nafasolon fiya fiya it fangayofan, is Diyos nanalinga hanya. 8Nyawas Hisos in Diyos wa Anak, hanya naagwanta yadi basad mahori, yakanga natwa wagdog no kanat kahologan no katanog it Ama. 9Ginya madi, nontohoyan kitay is Hisos hosto wan has fagayo, hanyan bali wa Famawi hanggan aban aban has manga katanog hanya. 10Hanggan was Diyos nafadog has fagayo fag manga taw kitay, is Hisos inbali Gorangon fag fagalan-han-Diyos kito yadin Milkisidik fag fagalan. 11Kati bokod wan angko bato fwayongon. No kitay di aywan hyami bato fwayongon hanya baliwa, dapat ay, ham mahori wa fwayongon, maskin ham igfabongkohon hayo. 12No kandogay wa ti, no kitay di, ham fiya wambali mangag faadal has tiba taw, dapat hanggan wa kati ham bato yapdi faadalon ngap ka fabagowanan fagadalon gin Diyos hampang. Ka fiya, no kitay di ha hayo, ka maganit fag fanganon, dapat hanggan kati hayo fakasayaon afo yapdi soso. 13Kat fanganon, no afo yapdi soso, tonya bilang yapdi manga anak dararag, idya twagdog no kinday tam nombali fiya san Diyos faglagan. 14Dapat ka maganit fag fanganon kawa has manga dahol taw, ka mangan yayom wan, ka twagdog has fiya hanggan has dwat.

will be added

X\