HIBRIYO 13

1Maskin tam manga fadwasay san Kiristo, tam fag fadagos gamigosan. 2Tam fag idwa kafang igfasakbaw manga famaklay gis iba banwanan. Tiba kitonya wan, idwa nahafang nafasakbaw, yakanga tiba ginan, manga anghil kat nafasakbaw, nyawa tadwa nahilala. 3Tam fag tarogbongan ista fakahoriyon ta nonporiso hanggan tam fag bilang yadi basad porisowan. Tam fag bilang kito kasta nafahoriyan, maskin tam idwa twa ngatay tam domog yadi kitonya aban. 4Tam fagayo fag tomwa kitay kafiyaon ka ogali igtalsawa. Fagayo fag talsawa fag kawidwiliyan maskin is Diyos mamadosa ka mangag fabayowan. 5Fag bohondi kwarta kantam fagisipon fagaba. Tam fag baya wan nyawa kana ka santam. Maskin is Diyos iglwang, Hodwa omobon hyamo, hodwa yadi fabayaan. 6Yakanga tam idwa gadowan noglwang, Intam Fon kagtogbong angko, hodwa ha fakadalaon. Hodwa ha fagayfanon, nyawa kana kasta ibolonon hangko. 7Tam fag tohod ka mangag bahala intam, kagtoltol in Diyos hampang hantam. Tam fag maisipan no kinday it ogali no boyagan yapdi, nyawa hanggan wa natay. Tam fag tolad hanya nogsyag in Diyos. 8No kinday is Kiristo Hisos hyabi, kitonya mandi kati, nyawa aban, idwa yadim oman. 9Fag idwa kadiya igdog ista manga madolaw fag adal bokod bokod. In Diyos malooy fag kahowayan kagfarigon intam manga fangayofan, bohonwa manga togon hasagfabaybay fanganon baliwa. Ka mangadwag sapkid fagliyon, idwa yadi farigon it fangayofan ginya. 10No kitay di, tam ha sadik fanogban, dapat ka manga fagalan-han-Diyos sas fanimbaan Hodyo idwa fiya no somayo intam sinya, maskin ka yapdi folot hayopan it fagsyagon. 11Ka gorangon fag fagalan-han-Diyos sas fanimbaan Hodyo igdiya folot manga hayopan has basad lingoban, ka nafabokod man ka sadi, kaarakitay igdisag ka folot hayopan kanwatwat kawa has manga ogali dwat, dapat ka hayopan it habilogan tagsonog sas dayo banwa. 12Is Hisos kitonya yadi no natay, sas dayo alad banwa, kaarakitay igfabali intam manga fangayofan maangay, kawa sat folot. 13Yakanga tam fag imbangkad yadi hanya sas dayo alad banwa. Tam fag omagwanta yadi kat donggon mahaya. 14Maskin intam banwanan orongan, kadwam liyam, bohonwa kastay is baba daga. Intam fagsayahon fag banwanan, ka sam tongod fag banwanan kamlag aban. 15Yakanga tam fag fagabag fasayagdog in Diyos, kawa han Hisos. Tam nogfasayagdog in Diyos kitonya, bilang intam wa disagon hanya. Tam igfasayagdog hanya kawa tam igbayat ngayan. 16Tam fag idwag fagomon gogali fiya, hanggan igtogbong has tiba taw, maskin tonya yadi ka manga disagon kan Diyos fagbayaon, ka fiya man has sogbaon hayopan hyabi. 17Tam fag fasakop has mangag bahala intam. Fag katanog it fwayong. Ta bahala wa gano intam, hanggan ta aba somagot in Diyos it naibolon kawa hanya baliwa. Tam no katanog it fwayong, ta bomaya wan, kawam tonglos it bato ibolonon. Tam nodwam tanog, tamhori wan, hanggan tam idwa yadi ha fakinabang. 18Ham fag darangin kawa ha hyami. Midwa kayag fwayong hayo kitay, midwa ha fagisipon hyami naibolon kadwa fiya. Hyami fakasayaon hyami ogali fag maangay nyawa ginahin. 19Ahog sagad hayo darangin kitay, aho nangos fag ngalay di mwali ha hayo. 20Ka kahowayan giwan Diyos no kaginan. Hanggan hanya ka nafaboyag ya kagfon intam, is Hisos. Is Hisos kanbali dahol man has fagayo fag fangano taw kito ka gano topa, kawat folot kagfaganit ka taranggapan kadwa ha katabowanan. 21Is Diyos nangos fag domisag ha hayo ka korang sa hayo, kaarakitay ham syagan gibolon it fakasayaon. Is Diyos nangos fag gibolon santam basad fangayofan ka maangay sa hanya, gin Kiristo Hisos. Tam fag fasayagdog in Kiristo nyawa ginahin. Fadi wan, fag kitonya wa ngay. 22Angko manga fadwasay, angko fagsagadon, ham fag idwa kahorig dog angko manga adal istay fag sorat, maskin agod di. 23Ho kasaya nangos ham fag twa kitay, ta nafalfas in Timotiyo, intam fadwasay, gis porisowan. No ngalay dimbangkad hastay, ho tomaban yadi hanya, ho nombangkad has nyamo hayo. 24Ham fag fwayong has mangag bahala ha hayo, hanggan hantam manga fadwasay fagayo kitay, mi gwas hayo fagayo. Intam manga fadwasay sas sakop Italya gwas yadi hayo. 25In Diyos malooy fag kahowayan fag fagaba wa sa hayo fagayo.

will be added

X\