HIBRIYO 11

1Tam nogsyag in Diyos, tam twa matohoyanan kitay intam manga fakasyagon imlag wa aban, tam twa yadi kitay ka manga bagay kadwa malagan, orongan yadi wan. 2Ka manga taw hyabi nogsyag in Diyos, is Diyos igbaya wan. 3Kawa tam nogsyag in Diyos, tam natwa wagdog kitay kawat hampang ka nahalig intam daga, hanggan tam natwa yadi wagdog kawa ka manga bagay ka malagan kati, inhalig gis idwa hara ha akwa. 4Kawas Abil igsyag in Diyos, in Abil nawatwat folot hayopan, fangafiyan han Diyos, fiya man kan Kain nadisag manga hanon. Kawa kitonya, is Diyos no natanggap in Abil disag, intohoyan kitay is Abil maangay han Diyos faglagan. Nyawas Abil natay wan, bilang yapdi kampang hantam kawa hanya nogsyag in Diyos. 5Kawas Inok igsyag in Diyos, hanyadwa natay, indiya odi has fadowa fag haboyagan. Ka Kasoratan iglwang, Tadwa nalag in Inok kawas Diyos nafaalin hanya, nalwang yadi kitay, Is Inok danwan balin Diyos fagbayaon nyawas Diyos idyapdi naahot hanya. 6Is Diyos idwag baya kadwag syag hanya. Maskin nyawa faktaw ka omakbang han Diyos, fag katiwala kitay ha akwa wa Diyos, hanggan fag katiwala kitay hanyag disag yadi fiya has manga taw ka gakbang hanya. 7Kawas Nowi igsyag in Diyos, hanya natalinga in Diyos fatagak, kawa has manga bagay kadyan anod. Is Nowi nahalig sadik sahayan baba dagat kaarakitay hanya, hanggan it talanahan imbawi. Maskin is Nowi igsyag in Diyos, manga taw sadi wak baba daga intohoyan has fadosaan. Is Nowi ha akwa yadi wan in Diyos kafiyan kawa nogsyag hanya. 8Kawas Abraham igsyag in Diyos, hanyan tanog in Diyos, is Diyos no nasogo hanya ha sadik daga in Diyos nafatohoyan bato disagon hanya. Is Abraham nalahaw wan, nyawadwa twa no hadat hadasogan. 9Kawas Abraham igsyag in Diyos, hanya nabanwanan, bilang odi sadik famaklay, san Diyos nafatohoyan bato disagon fag daga. It manga balay, balay odi rotay, kito yadinda Isaak da Hakob, pariho it manga natanggap in Diyos togonan bato disagon. 10It balay kitonya odi no bali day is Abraham igfanaya yapdi sadik banwa fiya, ka ha faganitan, kadwa kahawig. Is Diyos ka naisip kitay fag kitonya ista fagfanayaon bago fag banwa, hanggan hanya yadi ka nahalig. 11Kawas Sara igsyag yadin Diyos, nyawa hanyan sagaya was fanganahon, is Diyos nafaangay kitay, ha aba omanak di, maskin is Sara natwa kitay is Diyos idwag bohag. 12Yakanga gi sadik taw, kawat kagorangan kaakbang wa has kahatayan baliwa, ginya wa kanginan sadik hasokfonan kanbali kayo was fanggasan sas banwa sam tongod, hanggan kayo was onay sas gobang dagat. 13Tonya fag manga taw fagayo igsyag yapdin Diyos hanggan wa ta natay, nyawa tadya natanggap in Diyos togonan bato disagon. Dapat ta bilang wa nabantay, insaya waglag gis ayayo. To fag manga taw bilang wa nafwayong kitay, ta kito odis manga famaklay istay sas baba daga, giwas iba banwanan. 14Ta noglwang kitonya, intohoyan kitay tagsayak yapdit sadili banwanan. 15Ta nangos no kawili yapdista nagalinan fag banwanan, ta syagan di nangos kafwali ya sinya. 16Dapat kasta fakasayaon sadik banwanan fiya man sinya, kawa sam tongod. Yakangas Diyos idwa kaya kabali ista Diyos, kawa hanya ha nafatalaga wan sadik banwa ista banwanan. 17Is Diyos no nasolay in Abraham, kawas Abraham igsyag in Diyos, is Abraham nadisag hanya in Isaak, bilang wa kitos sogbaon hayopan. Nyawas Abraham nadog in Diyos togonan bato disagon hanya, hanggan nadog in Diyos, hanya no nalwang kitay, gin Isaak kambali hyamo hasokfonan, is Abraham idwa kwangit igdisag han Diyos it anak nyawadwam dowa. 19Is Abraham natwa wagdog fiya fiya kitay, is Diyos syagan faboyag ya manga taw. Hanggan, no kalwang, is Isaak bilang wa nwali han Abraham gis kahatayan. 20Maskin is Isaak igsyag in Diyos, is Isaak nafatohoyan handa Hakob da Isaw kat tanggapon fiya aban. 21Kawas Hakob igsyag in Diyos, hanya no kaakbang wa matay, nafatohoyan han Hosi manga anak dowa, kat tanggapon fiya aban. Natawid sat fon sokod a, matarahongan, nafasayagdog in Diyos. 22Kawas Hosi igsyag in Diyos, hanya no kaakbang wa matay, nalwang kitay in Israil manga hasokfonan mwali ya gis Ihipto aban, natogon kitay, diyan yat manga botol. 23Kawan Mwisis manga magorang igsyag in Diyos, tadwa kadalag laban ka gorangon batasan. Ta no nalag kitay ka anak dararag kafiyaon, tolok magdanon ta nafalogaw ka anak basad balay. 24Kawas Mwisis igsyag in Diyos, hanya no dahol wan, nadayo kitay, ta fag idwa lomwang hanya in Faraon dayaga faganoon anak. 25Non Mwisis di fangayofan, fiya man hanya nomaktom han Diyos fag manga taw kagdog mahori, has homoyog manga taw ka ha kasolongan, ka ngalay di kaliyam kawa gis ogali dwat. 26Maskin san Mwisis basad fangayofan, bilang wa mata lagan it manga tanggapon fiya aban, yakanga hanya natikis wa omagwanta ka mahori, kawa galwasi in Diyos-natogon-Famawi. It kafangayofanan wan tonya fiya man has manga kaakwaan Ihipto. 27Kawas Mwisis igsyag in Diyos nasyagan di naobon ka Ihipto, idwa kadala ka gorangon nyawa kaisog. Kawa bilang waglag ka Diyos kadwa kalag, it fangayofan marigon wan. 28Kawas Mwisis igsyag kitonya, nasyagan igfabago ka Fanohodan Nagsagayan, nafasognod kitay manga taw fag lidgid folot sas boknga sakbawan balay, kaarakitay ka anghil kagfadosa idwag fahatay in Israil manga hasokfonan it manga anak ahan. 29Kawan Israil manga hasokfonan igsyag in Diyos, ta nasyagan nadifay ka Dagat Dararag. Ka dagat infalhang has boknga, yakanga ta nadifay sas baba daga mamaya. Dapat ka manga taga Ihipto no kasaya omoyan is taw, ka danom dagat nasafong ka manga sondalo taga Ihipto, yakanga dagat natabon was taw. 30Kawan Israil manga hasokfonan igsyag in Diyos, ka alad bato sas banwa Hiriko inbodbolangan lamang, ta nontabo wagsafong ka banwa Hiriko fitok sirang. 31Kawas Rahab, sadik ina fabayowan wa dahol, igsyag yadin Diyos, yakanga idwa kafang igfasakbaw in Hoswi manga sogowan, ginyas Rahab idwan sakop has dwat, kito kat manga ofod ka dayo igfasakop in Diyos. 32Aho awkin igfadagos yapdi? Dogay araw ho no tomoltol ha hayo, ho no fagayo wa fomwayong, kawa handa Gidyon, da Barak, da Samson, da Hipti, da Dabid, da Samwil, hanggan in Diyos manga fangampang. 33Kawa tagsyag in Diyos, tiba syagan di nadaog ka manga gorangon sakop. Kafiyaon tiba no nabahala has taw kafiyaon, ta natanggap in Diyos togonan bato disagon. Ta nogsyag in Diyos, tiba nalag kitay, ka manga bibig liyon in-gom lamang. 34Tiba nasyagan di nafahapsa afoy dahol dahol. Tibadwan sakop ista talibong. Tiba magomo ongay, dapat is Diyos igdisag karigonan kaarakitay imbali marigon sas awayan. Tiba nasyagan di nafafwali manga habanan sondalo ka gis ayayo fag banwanan. 35Kawa tagsyag in Diyos, manga ina naofod yat manga kaiban ka natay dapat inboyag ya. Tibadwa kasaya kalfas gis basad porisowan, maskin tagfili fag nangos matay wan sas basad mahori, kaarakitay imboyag ya has fiya fag haboyagan. 36Tiba ta nayod, tiba ta nabakbak, tiba ta naporiso magafosan kadina. 37Tiba ta nabintok bato, tiba ta nalagadi has fagbokngan habilogan, tiba ta nabasing talibong nogfahatay. Tibat manga rotay manga odi anit topa, manga anit hambing. Tiban bali myabog wa dahol, manga taw nafahoriyan fiya fiya hanya, mahigpit ngawan. 38Bilang odista fagdayoon, dapat ay, to fag manga taw fiya man ka tiba taw istay is baba daga. Tiba malahawan odi ha sayo basad fakahyabogan, hanggan wa ha basad moyod, matagowan, nalogaw wa ha sayo daga lohib bato, hanggan basad loong. 39Kawa tagsyag in Diyos, ta nafaobon hantam sadik faorongan kagfatohod intam fagaba. Dapat in Diyos togonan bato disagon idyan anod gis nanya fag masohod hyabi. 40Kawas Diyos ha fangayofan fiya man hantam, kitay tam fag im-aktom yadi has taw in Diyos togonan bato disagon nom-anod.

will be added

X\