1 Hyabi hyabi is Diyos ha manga fagalan fangampang no kampang hantam manga hafofowan. Idwa myasa gis nanya, nomtoon nomtoon di. Bokod bokod yadi in Diyos nafaibolon hat manga fangampang. 2 Dapat kati, sas ginanan fag manga sirang, maskin in Diyos wa kafangayofanan kitonya, kawat Anak in Diyos wa fagalan no kampang hantam. Hyabi is Diyos nafasognod it Anak ka naibolon, nahalig intam daga hanggan banwa sadi wak dahonya, nafatohoyan yadi kitay it Anak kagfon fagayo. 3 No kindas Diyos, kitonya yadit Anak, yakangat Anak ka bilang wagfasalog in Diyos kayawaan istay is baba daga. It Anak hampang karigonan ka gano yapdi sadik dahonya fagayo fagayo kan Diyos nahalig. Ginya madi in Diyos Anak natokaw sat balis sihon, ka marigon man has fagayo, nontabo waglinay intam manga naogali dwat, kawat kafangayofanan wa kitay hanya fag imbali intam fangafiyan. 4 Is Diyos nafangayan it Anak ngayan fiya man has manga anghil, yakangat Anak kangayanan labi wa fiya man. 5 Kawa kitonya, nyawa ginahin is Diyos idwa ha nafwayong nyawa haday fag anghil kitay, Haw angko Anak, Kati ahon bali hyamo Ama. Idwa yadi nafwayong kawa hat manga anghil, Ahom balit Ama Hanggan hanyam bali angko Anak. 6 Ginya madis Diyos no kaakbang wa somogot Anak ahan hastay has baba daga, hanya nalwang, Ka manga anghil fagayo fag fasayagdog yadi hat Anak. 7 Kawa hat manga anghil, is Diyos nalwang yadi, Nafabalit manga anghil manga bagyo, Hanggan nafabalit manga fangibolon manga afoy gigang. 8 Dapat kawa hat Anak nafwayong, Haw Diyos, haw wa kagtokaw sas tokawan fanokawan gorangon hanggan aban aban. Haw ka hari kagbahala maslong. 9 Haw ka hari kagbaya waglag ta no ha ogali fiya, Dapat haw kadwat iglag ka gogali dwat. Yakangas Diyos, hyamo wa Diyos nafili hyamo, Hanggan nafabaya wa dahol igdog hyamo basad fangayofan, Bohondi kito kam manga ofod. 10 Is Diyos nafwayong yadi hat Anak, Haw ka Hari, haw ka nahalig sadi wak dahonya daga, Hyamo yadi gamat ka nahalig sadik dahonya banwa sam tongod. 11 Tonya fagayo imliyam wan, dapat haw kamgoyan hanggan has aban aban. Fagayo kam nahalig imdaanon aban, kitos manga fagsolongon. 12 Haw aban fomolhot tonya kitos sadik rotay. Ka daga hanggan banwa aban imtobos wan, Dapat ka Haw, Haw wan, haw idwa twa kagorang. 13 Nyawa ginahin is Diyos idwa ha nafwayong nyawa haday fag anghil kitay, Haw fag tokaw wan sangko akbang, sangko balis sihon, Aho nodya nadaog fiya fiya im manga kalaban hanggan nafasakop ha hyamo. 14 No kitonya mangharaw, kana ka manga anghil, ham gayfan? Gwadi ka manga anghil manga falad lamang, in Diyos manga fangibolon, it manga sogowan, kaarakitay igtogbong has manga taw kambawi.
