GALASYA 6

1Angko Manga fadwasay, tam no twa kitay sadik taw san Diyos Tifonan ha naogali dwat, fag ka katanog ka Maliyaw fag Falad kagfatobli hanya has fiya, dapat fag mahoway no kabaya. Fag matagahan yadintam sadili ogali, kaarakitay tam idwa yadim loksowan has ogali dwat. 2Tam fag tarogbongan igdiya ka bilang ista manga fasanon. No kitonya tam katanog in Kiristo togon. 3Nyawa faktaw no gayfan kitay hanya kasta fagbayaon, nyawa ka orongan hanya basta odi taw, igdaya odit sadili. 4Tam fagayo fag gisip intam sadili ogali. No fiya intam ogali, tam igbaya wan. Tam fag idwag fatimbang intam ogali hasta ogali tiba taw, 5maskin tam fagayo bahala wagdiya ka bilang intam sadili boklid. 6Ka gadal in Diyos hampang fiya no homoray hasagfaadal hanya, manga bagay kat natanggap fiya gin Diyos. 7Tam fag idwa gadayaan, maskin idwa ha taw syagan igdaya in Diyos. No kana kasta natanom, tonya mandi kat aniyon. 8Tam nogtanom santam bali fangayofan masayaon fangiyaban, kahatayan kantam aniyon ginya. Dapat ay, tam nogtanom sas Maliyaw fag Falad fangiyaban, haboyagan kadwa ha katabowanan intam aniyon gis Maliyaw fag Falad. 9Tam fag idwa yadi kabodlay no gogali fiya. Nomdasog gis nanya fag masohod aban, tam nodwam bodlay, tam ha aniyon kafiyaon. 10Kawa kitonya, tam fag idwag fasigpala nyawa ginahin tam no ha lagan togbongon has taw, labi man hantam manga fadwasay kamtiwala. 11Ham iglag kitay dakdaholan ka manga ragit istay fag sorat, kangko gamat ka nasorat to. 12Ka manga kasayag pilit hayo fatoli hayo kasaya odig fatakagdog has taw kawa has manga bagay malagan. Ta kadala kitay, ta nogbarita in Kiristo kahatayan sas nafatimbangan hayo, manga Hodyo omisog hanya. 13Nyawa ka mangag fatolit sadili idwa katanog ka Batasan Hodyo. Ta kasaya odig fatakagdog kitay, ham imtanog yadi to fag ogali sas baba anit, ham namtoli. 14Dapat ay, no sadingko, in Kiristo Hisos kagfon intam it kahatayan lamang sas nafatimbangan hayo kangko fagbayaon. Maskin hanya natay sinya, ka manga oglali dwat istay is baba daga bilang odi mahatayan sangko, hanggan aho bilang yadi mahatayan no sas ogali dwat baliwa. 15Idwa ha kana nyawa tam intoli, nyawadwan. Ka mahalga, is Diyos no nahalig intam fangayofan bago. 16Fagayo ka kitonya yadit fangayofan hanggan ogali, hanggan fagayo kan Diyos nafili fag manga taw, fag domog kitay is Diyos kaawa hanya hanggan igfalokmay yadit fangayofan. 17Tongko fwayongon goyan goyan. Gis kati ginan, nyawa faktaw, fag idwag fahoriyan angko domwag, maskin ka manga fakdat sangko baba anit ka bilang manga tandaan kagfatohoyan kitay, aho in Hisos nasali sogowan. 18Angko manga fadwasay, ham nangos fag domog kitay, is Kiristo Hisos kagfon intam mahoway ha hayo fagaba. Fag kitonya wa ngay.

will be added

X\