GALASYA 2

1Aban, nonsagaya safolo ya ha ofat ik fangaraw, hami da Barnabi inbangkad ya domwag has banwa Hirosalim. Mi nataban yadin Tito. 2Maskin honfwali ya sadi ya ginan has Hirosalim, is Diyos nafatwagdog angko kitay, aho fag hanya ya. Mi nanoltolan has manga fagtahinan, masamanan wa gis fakaaywanan san Diyos Tifonan. Ho nafwayong fiya fiya has manga fagtahinan ka Fiya fag Barita kangko fagfaadalon has manga banwanan Hintil, maskin ho gwayan wagfaanogon angko ibolon, gis fagonan hanggan wa kati, ta nodwag faangay angko faadalon has taw. 3Angko ofod gis nanyas Tito. Nyawa hanya sadik Girigo, ka manga fagtahinan idwa yadi napilit igfatoli hanya. 4Tadwa hara gwas hanya baliwa, nonman ha akwa manga kasaya kitonya, kagfaniring kitay tantiwala wan, igsoglatan has mangan tiwala, kaarakitay lomag no kinday tam nalfas gis ogali Hodyo, maskin tam insadi san Kiristo Hisos. Ta kasaya kitay, tam nangos fag fasakop yapdi has ogali Hodyo. 5Dapat, midwa nafasakop hasta fasadan ngadi sadik ngalay, maskin mi kasaya kitay, ka Fiya fag Barita ka hayo fagtanggapon, fag idwa ha aktom kadwa orongan. 6Dapat kasta ngayanon ista manga fagdogan idwa yadi nafabohag angko fwayong. No kitay di, idwa ha kana sangko no fakta fag manga taw tonya, maskin is Diyos idwa ha fagfiliyon taw. 7Yatokitay, ta natwa wagdog kawas Diyos nafili angko kaarakitay manoltol has manga Hintil ka Fiya fag Barita, kito yadis Diyos nogfili in Pidro, kaarakitay manoltol has manga Hodyo ka Fiya fag Barita. 8No kinday is Diyos no nafabali in Pidro it Fandiya-Barita has manga Hodyo, kitonya yadis Diyos nafabali angko it Fandiya-Barita has manga Hintil. 9Da Santyago da Pidro da Hwan, kasta manga fagdogan san Diyos Tifonan, no natwa wagdog kitay is Diyos ka nafatohoyan hangko danwa malayonan angko ibolonon, ta natanggap hyami da Barnabi, mi pariho wa fangibolon. Mi nanaranggapan kitay hami has manga Hintil, taw has manga Hodyo no bomarita. 10Ta nafwayong odi kitay, mi fag idwag fabayaan ka manga myabog fag manga Hodyo san Diyos Tifonan sas Hirosalim. Ho danwa kasayag togbong tonya fag manga taw. 11Is Pidro nonbangkad has banwa Antiyokya, sas sakop Siriya, ho nangabaya hanya sasta fagdogan, maskin matohoyanan idwa fiyat naibolon. 12Maskin in Santyago manga fakilalaon nodyan dasog, is Pidro igsayowan kwan has manga Hintil. Dapat, ta nonbangkad, is Pidro nafasamanon wan maskin kadala ka manga taw ka mahogod hasagfatoli baliwa. Yakangas Pidro idwag falagon kitay hanyag sayo has manga taw kadyan toli. 13Tiba fag manga Hodyo kantiwala sinya nafaniring yadin Pidro, inbali madalaon. Hanggan is Barnabi inhalag yadi wa kitonya. 14Aho no nalag fiya fiya kasta manga ogali, kawa idwa maangay has Fiya fag Barita orongan, sasta fagdogan fagayo, ho nalwang han Pidro kitay, Itfagonan, haw no sadik Hodyo gogali ka ogali Hintil, ka bonwa ogali Hodyo, kinda araw haw no pomilit ka manga Hintil kitay, ta fag omogali ka manga ogali Hodyo? 15No kitay di, hami manga Hodyo, maskin hyami manga hafofowan Hodyo yadi. Hami bohonwa kasta faglwangon manga Hintil ka gogali dwat. 16Nyawa kitonya, hami twa wa kitay, manga taw no nangafiyan han Diyos, bonwa kawa ta manga Hodyo ka katanog ka Batasan Hodyo, dapat kawa ta nogsyag in Kiristo Hisos. Hamig syag yadin Kiristo Hisos, kaarakitay hami mangafiyan wa han Diyos, bohonwa kitay kawa mi no katanog ka Batasan Hodyo. 17Yakanga hami manga Hodyo, no gwayan wa kasaya mangafiyan han Diyos, kawa mi nonsadi san Kiristo, ginya nonlag kitay, mi ha ogali yapdi dwat has Batasan Hodyo baliwa, kitos manga Hintil, it kahologan awkin is Kiristo kagfasognod hyami has manga ogali dwat, ham gayfan? Balaw kitonya. 18Aho nogfaganit ya ka Batasan Hodyo, kangko nadayo, kamlag kitay, ho ha ogali yapdi dwat, kagfatohoyan angko has kahatayan. 19Yakanga, no hadis Batasan Hodyo baliwa, ho bilang wa mahatayan kati, maskin ka Batasan Hodyo mandi kagfatohoyan angko has kahatayan, kaarakitay ho kaboyag han Diyos wa malayon. Angko fangayofan dan intahin wa han Kiristo, hanya no natay sas nafatimbangan hayo. 20Yakanga bohonwa aho ka boyagan kati, dapat is Kiristo ka boyagan sangko. Kati angko fangayofan hanggan ogali giwan Diyos Anak, maskin hogsyag hanya. Hanya ka galwasi angko hanggan nadisag it haboyagan kaarakitay igbawi angko. 21Nyawa kindawan hodwag fasigpala in Diyos malooy fag kahowayan. Maskin halimbawa, manga taw no nangafiyan han Diyos kawa no katanog ka Batasan Hodyo, in Kiristo kahatayan idwa ha kahologan.

will be added

X\