IFISO 6

1Ham manga anak, fag katanog hayo manga magorang fwayong, maskin tonya ka maangay, kawa ham igsyag hasagfon intam. 2Ka gona fag togon sas Batasan Hodyo, ka ha fasalamat tam no katanog, iglwang kiti, Fag magalang ham ama hanggan ham ina, 3kaarakitay haw lomag kahowayan, hanggan im haboyagan imdogay istay is baba daga. 4Ham man kasta manga magorang, fag idwag falabi ham no kabaya hayo manga anak kaarakitay ta aba idwag botang hayo naibolon. Dapat ay, fag kasahan di no kabaya kitos mangan tiwala in Kiristo hanggan fag faadal ha hayo manga anak intam Fon manga togon. 5Ham, kasta manga sogowan, ham fag katanog kagfasognod hayo istay is baba daga. Fag magalang, fag katanog, hanggan fag bilang was Kiristo kagfasognod hayo. 6Fag bondi gis nanya ta no mabantayan, ham no gibolon kitonya kaarakitay ta fasayagdog hayo, dapat fag sadi wak fangayofan ham no gibolon in Diyos fakasayaon, kiton Kiristo fag manga sogowan. 7Ham fag idwag fahafangon no gibolon, fag kasolong wan, kitos gibolon intam Fon ibolon, bilang bonwa basta taw kagfasognod hayo. 8Tam fag tohod kitay kagfon intam gomanti fiya hantam fagayo, nyawa tam ista sogowan, nyawa bonwan, intam ibolon no fiya. 9Ham yadi kagfasognod manga sogowan, hayo manga ogali fag fiya yadi. Ham fag idwag fadalagdog hayo manga sogowan. Ham fag tohod kitay san Diyos banwanan sam tongod, tonya yadi kagfasognod hayo hanggan kagfasognod hayo manga sogowan. Hanyadwa ha fagihidon taw. 10Sas katabowanan tingko sorat, kawantam Fon Karigonan idwa ha bosal, hanggan tam insadi sa hanya, tam fag farigon intam manga fangayofan. 11Solongan in Diyos disag hantam manga sangkap fanaktak fagayo, kaarakitay tam idwa makfo is Fandaya no kasaya giktam intam. 12Maskin bonwa taw kantam kalaban, dapat manga dwat fag karigonan kadwa malagan sas fakayawan, ka manga gorangon ka ha manga kangayanan hanggan karigonan kagbahala kati sas sakop marom. 13Yakanga tam fag solong in Diyos manga sangkap fanaktak kati. Ginya madi nyawa ginahin ka dwat nogtahod intam, tam idwa gadaogan intam kalaban sangkap, hanggan nyawa tam nalaban hanggan has katabowanan, tam idwam fwali has ginanan ngadi kabayan. 14Yakanga tam fag malindogan matagahan. Tam fag mafagyahosan ka fakaoronganan. Solongan yadi ka kahaslongan ka fanaktak sas dobdob. 15Falapakan intam bitis kawa tam matalagan fomwayong ka Fiya fag Barita kagfaamigosan manga taw han Diyos. 16Fag matawidan fagaba ka fanangga kawa tam igsyag in Kiristo, tonya ka fanaktak famahapsa has fagayo in Kadwatan manga famana gigang. 17Tam solongan yadi ka sambalilo baol kawa tam inbawi, hanggan fag matawidan fagaba in Diyos Hampang ka bilang intam talibong, in Diyos Falad disag hantam. 18Fag fagabag darangin igsagad in Diyos togbong tam nogsolong to fag manga fanaktak. Nyawa ginahin, fag in Diyos Falad kagfadonong intam igdarangin. Yakanga intam manga fangayofan fag fagaba mafolawan, fag idwag fagomon. Fag darangin fagaba kawa has fagayo fag manga taw kantohoyan han Diyos. 19Fag darangin yadi kawa hangko kitay, aho no tomoltol has taw, is Diyos fomwayong hangko it bato fadogon has taw, kaarakitay ho tomoltol marigon hanggan fatwagdog has taw ka madolaw sas Fiya fag Barita, ka hyabi mafyaloman yapdi. 20Honbali in Diyos sogowan kaarakitay fadog has taw tonya, nyawa kati aho maporisowan. Ham fag darangin kitay, aho fag idwa kadala aho nogtoltol, maskin kitonya ka maangay. 21Is Tikiko, intam fagbayaon fag fadwasay hanggan intam Fon matanogon fag sogowan, ka fadahit ha hayo no kinday angko lagan istay, kaarakitay ham tomwa aho no kinday kati. 22Yakanga hogsogo hanya has nyamo hayo kaarakitay fadog ha hayo no kinday hami fagayo istay kati, hanggan farigon hayo manga fangayofan. 23Angko fagdaranginon kitay is Diyos intam Ama hanggan is Kiristo Hisos kagfon intam fag domisag ha hayo, ka tasayan, manga fangayofan malokmay, ka gadgalwasiyan hanggan igsyag ha hanya. 24Ham nangos fag domog kitay, is Diyos mahoway has fagayo fag manga taw kadwa kaoman no galwasi in Kiristo Hisos kagfon intam.

will be added

X\