IFISO 5

1Kawa tam in Diyos wa manga fagalwasiyon fag manga anak, tam fag tolad hanya. 2Intam manga ogali hanggan ibolon fag falag kitay tam galwasi manga taw kito yadis Kiristo no galwasi intam, hanggan nadisag it haboyagan kawa hantam, sadik fangafiyan han Diyos, banglo hanya hanggan it fagbayaon. 3Kawa tam manga taw kantohoyan han Diyos, ngadi gwas, tam fag idwa gwas ka dwat has ka taw baliwa. Fag idwa gogali ka mahaya, fag idwa yadi kasaya kitonya. Kitonya fag manga toltolon idwa maangay santam. 4Kitonya yadi tam fag idwa kampang kadwa fiya donggon, fag idwag toltolan kadwa ha kahologan, hanggan fag idwa golit manga dwat fag hakot. Yatokitay, intam hampang fag baya in Diyos fagaba. 5Tam fadi wad twa kitay ka gogali dwat has ka taw baliwa, hanggan kadwa twa kaya, hanggan kasaya kitonya, idwam aktom san Diyos hanggan san Kiristo sakop, maskin it sadili fakasayaon dwat kat fagsyagon. 6Tam fag idwa gadayaan nyawa fakta fag taw kat manga katadlongan nodwa ha kahologan, maskin is Diyos kaisog has mangadwa katanog hanya kawa gogali kitonya. 7Yakanga tam fag idwa gamigos ka kitonya fag manga taw. 8Hyabi tam basad yapdi marom, dapat kati tam basad mayawa maskin tam insadi santam Fon. Yakanga tam fag gogali ka maangay has manga taw ka sas basad mayawa. 9Maskin ka yawa kagfabohad manga ogali fiya kitos kahowayan, kahaslongan hanggan fakaoronganan. 10Tam fag gadal no kana fag manga ogali ka maangay handtam Fon. 11Tam fag idwa kadiya has manga ogali kadwa ha kahologan, ka manga taw basad marom it manga ogali. Yatokitay, tabanan ka manga taw has mayawa, fadogan ista manga ogali kadwa fiya. 12Mahaya wan ngadi gwas ista manga ogali mafyaloman. 13Fagayo no maladladan aban sas mayawa, imlag no kinday tonya, ngatay fiya ngatay idwan, 14maskin ka yawa kagfalag fiya fiya. Yakanga inlwang kitay, Haw ka matoyogan, haw fag kafolaw wan, Haw fag kabangon gis kahatayan, Ginya madis Kiristo fayawa hyamo. 15Yakanga tam fag matagahan no kinday intam ogali. Tam fag gogali kitos manga ha fakatwawon, idwa kitos manga paong paong. 16Tam fag idwag fasigpala nyawa ginahin tam no ha bato ogaliyon, ngatay ibolonon fiya, maskin kati fag manga masohod, dwat kasta manga ogali tiba taw istay sas baba daga. 17Tam fag idwag falamang, fag tomwa wagdog no kana kagfon intam it fasadan intam ogaliyon. 18Tam fag idwag lango maskin tonya igfadwat odi intam manga ogali, yatokitay fag in Diyos wa Falad ka sawantam manga fangayofan sadi wak dahonya. 19Tam fag fadoddogan ha sadi ha sadi manga fwayong gin Diyos Sorat fag manga ambahan, gintam fangambahanan hanggan manga ambahan kagfarigon intam manga fangayofan. Tam fag gambahan, igfasayagdog intam Fon santam basad fangayofan. 20Nyawa kana kantam nadalanan, tam fag baya fagaba in Diyos intam Ama, san Kiristo Hisos kagfon intam, it ngayan. 21Tam fag fasodsolonan ha sadi ha sadi kagfatohoyan kitay tam iggalang in Kiristo. 22Ham manga ina, kasta manga babay, ham fag fasakop ha hayo manga sadili indogan, kito yadi nogfasakop hasagfon intam. 23Maskin ka ama ka mamahalat babay, kito yadin Kiristo, hanya kagbahala hanggan igbawi it Tifonan, kan Kiristo habilogan sadi wak dahonya. 24Yakanga no kinday ka Tifonan nogfasakop han Kiristo, ista manga babay fag kitonya yadi nogfasakop fiya fiya hat manga sadili indogan. 25Ham man manga ama kasta manga indogan, ham fag galwasi hayo manga sadili babay, kito yadin Kiristo, hanya no galwasit Tifonan hanggan nadisag it haboyagan kawa ha hanya. 26Is Kiristo naibolon kitonya kaarakitay igfahalyaw it Tifonan nontabo wagfalinay tonya sas danom hanggan sat hampang, 27kaarakitay faakbang yadi hat sadili it Tifonan, maangay, fiya, idwa ha fabangdanan, kitos rotay kadwa ha tarongkoon, idwa ha firot, kafiyaon, kafiyaon. 28Manga ama fag galwasi hayo sadili manga babay, kito yadi ham no galwasi hayo sadili habilogan. Ka ama no galwasit babay, galwasi yadit sadili. 29Anod, idwa ha taw kadwat iglag it sadili habilogan. Yatokitay tam igfahwan intam sadili, hanggan gano intam manga habilogan, kito yadin Kiristo hanya no gano it Tifonan, 30kawa tam manga layonan sat habilogan. 31Kito ka Kasoratan fwayong, Kawa kitonya, ka ama somaman git ama hanggan git ina, imsadi hat babay, ginya madi ka dowa imbali sadi di. 32Sadik dahol fag fakaoronganan it fagfwayongon sas Kasoratan, kawa no kinday is Kiristo hat Tifonan. 33Dapat hayadintam it bato lwangon kitay, fagayo fag manga ama fag galwasi it sadili manga babay, kito yadi hanya no galwasi it sadili, hanggan fagayo fag manga ina fag magalang hat manga indogan.

will be added

X\