IFISO 4

1Kawa kitonya, aho, kanporiso maskin ho gibolon kagfon intam it ibolon, hogfaaronganon ha hayo kitay, ham fag gogali kito ka maangay han Diyos manga nafatawag. 2Tam fag idwa ha takan, fag mahoway hanggan maagwantaon fagaba. Tam fag falag has taw kitay tam gadgalwasiyan kawa tam idwa kahodhoriyan. 3In Diyos Falad kagfasadi intam git kahowayan kagfogong intam. Pilitan intam manga fangayofan igfadagos kitonya. 4In Kiristo habilogan sadi wak dahonya sadi di, hanggan it Falad sadi di, kito yadis Diyos no nafatawag intam kaarakitay sadi di intam fagfanayaon. 5Sadi di kagfon intam. Sadi di intam fagsyagon. Sadi di it kahologan tam nogfatogna. 6Sadi di is Diyos kantam Ama has fagayo. Hanya abwat man has fagayo, gibolon sas fagayo, hanggan sawas fagayo. 7Dapat ay, giwat kaakwaan is Kiristo nafahafod hantam fagayo, igsadig sadi, it manga fakatwawon kat nafatalaga hantam, 8yakanga ka Kasoratan igfwayong kitay, Hanya no nwali ham tongod im tongod, Aywan kat manga nataban hat banwanan, Nafahafod yadit manga disagon has taw. 9(Kanat kahologan hanya no nwali ham tongod, ham gayfan? It kahologan hanya bago bago hawam dagas, daga daga, has Daga Salad. 10Ka ginyas dagas, daga daga, tonya yadi ka nwali ham tongod im tongod, has dayo ya fag banwa kaarakitay it kafiyan fag sawat nahalig fagayo fagayo.) 11Hanya ka nadisag manga fagsyaganon has taw, kawa hanya nafabali tibat manga Fandiya-Barita, tibat manga Fangampang, tibat manga Famabotong manga taw, tibat manga Fangano Tifonan hanggan it manga Famaadal. 12Hanya naibolon kitonya kaarakitay fayayom fagayo kantohoyan hanya hasta bato ibolonon kaarakitay falangbat Tifonan. 13Ginya madi, tam fagayo kasadi nogsyag hanggan kilala in Diyos Anak, hanggan intam manga fangayofan kabali hosto kito yadin Kiristo fangayofan ka hosto wan. 14No kitonya tam idwa kitos manga anak ka kadiya igdog has manga toltol idwa orongan. Tam idwa kitos sahayan baba dagat, taob kagfatowang towang, hanggan bagyo odi kagdiya. Ka manga taw ka kasayag taban intam has idwa orongan, idwa syagan igfaadowan intam. 15Yatokitay intam manga bibig hampang fag sonson wa orongan kawa tam gadgalwasiyan, kaarakitay tam ka labi wa has kafiyan baliwa, sas manga ogali fagayo, kabali fiya kito yadin Kiristo ka alfoyo sat Tifonan. 16Is Kiristo kagfasadi it habilogan sadi wak dahonya, gis manga layonan kansarokfonan kitos manga halisan. Ginya madi, fagayo fag layonan nogfatonglos it ibolonon, ka habilogan sadi wak dahonya karigon hanggan kadahol, kawa ka manga layonan gadgalwasiyan wan. 17Santam Fon ngayan, hogfaaronganon ha hayo kitay ham fag idwa gogali domwag kito ka manga tibak Hintil, kat manga fagayfanon idwa ha kahologan, 18tadwa yadi twagdog. Tadwan aktom han Diyos disag haboyagan maskin tadwa ha fakatwawon hanggan ista manga fangayofan maganit. 19Tandiya has manga dwat fag kasolongan, hanggan ngadi ogbot idwa ha nahayan. Bokod bokod ista manga ogali ka fiya nangos fakayaon, igsagaya wa ogali. 20Dapat ay, idwa kitonya kantam fakatwawon kawa han Kiristo baliwa. 21Tam fadi wadnadog kawa han Kiristo hanggan ha nafaadal hantam ka fakaoronganan ka san Hisos. 22Yakanga tam fag dayo intam manga ogali dan. Fag dayo yadi intam manga ogali dan. Fag dayo yadi intam fangayofan dan, ka dwat kawag fasakop has bali fangayofan masayaon kagdaya intam. 23Intam manga fangayofan fag imbago wan sadi wak dahonya. 24Fag ka bago fag fangayofan kantam fagsolongon, ka fangayofan kanhalig igtolad in Diyos, kagfalag yadin Diyos kahaslongan hanggan kahalyawan, maskin giwas fakaoronganan. 25Yakanga, tam fag idwagbodbohagan. Fag sonson wa orongan intam manga hampang hantam manga fadwasay kawa tam myasa wa manga layonan san Kiristo habilogan. 26Tam nangos nom-isog, fag idwag fadasog has kasalanan. Bago dimsangday ka myanit, intam fangayofan fag imhoway ya. 27Tam fag idwa goyon in Fandaya. 28Kagnahaw hyabi fag idwag nahaw domwag, dapat fag maangay no gibolon kaarakitay lomag it sadili fangaboyagon, hanggan ha fagtogbongon has manga taw myabog. 29Nyawa ginahin tam fag idwa kampang dwat donggon. Tam fag fili intam manga hampang, fag kawa myasa wa fiya hanggan maangay gis nanya fag masohod, kaarakitay kagdog intam manga hampang ha fakinabang wan. 30Tam fag idwag farongkot in Diyos Maliyaw fag Falad, maskin hanyan Diyos tandaan santam, kagfatohoyan kitay tam in Diyos fag manga taw, gis nanya fag Sirang mahalga aban, is Diyos nogfalfas intam. 31Tam fag idwag bodbotangan intam manga fakahoriyon ha sadi ha sadi. Fag idwa gidgisogan, manga kadwat iglag iba taw. Tam fag idwag haringgitan, fag idwag yod intam iba, fag idwa yadi gisip ka dwat. 32Yatokitay, tam fag kabali mahoway hanggan maawaon ha sadi ha sadi, hanggan fag falidliyaman ha sadi ha sadi intam manga fakahoriyon, kito yadis Diyos nogfaliyam intam manga naogali dwat, kawa tam insadi san Kiristo.

will be added

X\