IFISO 3

1Kawa kitonya, ahog darangin han Diyos. Ahos Pablo, in Kiristo Hisos poriso kawa ha hayo manga Hintil. 2Ham fadi wadnadog kitay is Diyos, kawa malooy it kahowayan, nafatohoyan angko to fag ibolon kaarakitay tomogbong hayo. 3Is Diyos nafatwagdog angko it kafangayofanan kadya nafadog has taw hyabi, kangko nafwayong sas sorat haraw. 4Ham nogbasa angko sorat ham domog kitay aho natwa wagdog ka madolaw fag bagay kawa han Kiristo. 5To fag bagay madolaw idya nafatwagdog has manga taw hyabi, dapat kati is Diyos iglwang kitay, it Falad fag fatwagdog tonya hat maliyaw fag manga Fandiya-Barita hangan Fangampang. 6To ka madolaw kadya nafatwagdog has taw hyabi kitay, kawa manga Hintil katiwala ka Fiya fag Barita, ta ha tanggapon yadi kafiyan, kito yadis manga Hodyo. Tanbali yadi manga layonan sa sadi dik habilogan sadi wak dahonya, intahin yadi han Diyos togon bato disagon kantonglos san Kiristo Hisos. 7Maskin is Diyos mahoway wa dahol dahol, it karigonan nafabali angko it Fiya fag Barita fangibolon. 8No kitay di, ka tiba taw kantohoyan han Diyos, bondi kitongko. Nyawa kitonya, is Diyos nafaangay kitay fag aho kagfadog has manga Hintil ka Fiya fag Barita kitay, intam fagbayaon san Kiristo idwa twa haminon. 9Fadog yadi has fagayo fag manga taw no kanan Diyos kafangayofanan kadya nafatwagdog has taaw hyabi, hanggan no kinday tonya nomanod. Is Diyos ka nahalig fagayo fag manga bagay, dogay hyabi nafyalom yapdi has taw it bato ibolonon, 10kaarakitay gi wat Tifonan hanya falag aban has manga gorangon hanggan has manga ha kangayanan san Diyos banwanan sam tongod, falag was taw it sadili manga kadonongan, bokod bokod, kadwa ha katabowanan. 11Is Diyos naibolon kitonya, kawa gi yapdis fabagowanan, tonya wat fasadan kitay, fatonglos it kafangayofanan san Kiristo Hisos kagfon intam. 12Maskin tam insadi san Kiristo hanggan igsyag hanya, tam idwa gadowan, idwa yadi kaya gakbang han Diyos. 13Yakanga, hogfaaronganon ha hayo kitay, ham fag idwa kabalaw maskin tagfahoriyan angko kati, kawa hogtogbong hayo. Kangko fakahoriyon imbali hayo fakinabangon. 14Kawa kitonya, hoglingkohodan wan san Diyos intam Ama atobangan. 15Intam Ama sam tongod, kasta manga ama taw fagtoladon sas manga talanahan fagayo, nyawa san Diyos banwanan sam tongod, nyawa sas baba daga. 16Angko fagdaranginon kitay, git kafiyan kadwa twa haminon, hanya fag farigon nangos hayo manga fangayofan kawat Falad sawa hayo. 17Is Kiristo fag maoliyanan sa hayo manga fangayofan fagaba, kawa ham igsyag hanya, kaarakitay ham, no bilang wagdalid abasad hanya, kawas Kiristo galwasi hayo, 18ham kito yadi ka tiba kantohoyan han Diyos, ham tomwa wagdog kitay,idwa hat dayo domwag is Diyos no galwasi hayo. 19Ala ngay, ham fag domog kitay is Diyos galwasi hayo, nonman ham idwa mamin domog it kafiyan, kaarakitay in Diyos kafiyan fagayo, fag sawa hayo manga fangayofan, sadi wak dahonya. 20Tam fag fasayagdog in Diyos ka syagan gibolon bondi kito kantam fagsagadon, ngatay fagisipon, kawadwa hat dayo domwag fag karigonan ka gibolon santam. 21Tam fag fasayagdog fagaba in Diyos, hanggan aban aban, kawat Tifonan kansadi san Kiristo Hisos kagfalag it kafiyan. Fag kityona wa ngay.

will be added

X\