IFISO 2

1Hanggan ham manga Hintil, hyabi hayo manga fangayofan mahatayan wan, kawa ham igsway in Diyos, hanggan dwat hayo manga ogali. 2Gis nanya hyabi, ka manga ogali dwat istay is baba daga ka hayo fakatanogon, kawa ham igfasakop hasagfon kadwatan, kawa tahinan labang, kagfasognod fagayo fag manga taw kagsway in Diyos. 3No kitay di, tam fagayo kitonya yadi hyabi, tam katanog intam bali fangayofan masayaon, no kana odintam sadili habilogan, ngatay fangayofan fakasayaon, ya tonya kantam naogali. Kito yadi ka tiba taw, tam hyabi in Diyos wa fakaisogon. 4Dapat ay, kawas Diyos galwasi wa dahol dahol intam, hanyan awa intam. 5Yakanga, intam manga fangayofan no mahatayan yapdi hyabi, kawa tam igsway in Diyos, hanya nafatahin intam han Kiristo, nafaboyag yadintam. In Diyos malooy fag kahowayan ka nabawi intam. 6Kawa tam insadi san Kiristo Hisos, tam intahin hanya, inboyag ya, hanggan tam intokaw san Diyos banwanan sam tongod. 7Is Diyos naibolon kitonya kaarakitay fagaba falag aban kitay, idwa hat dayo domwag it malooy fag kahowayan hantam, kat nafalag hantam san Kiristo Hisos. 8Maskin kawa tam igsyag in Diyos, it malooy fag kahowayan kagbawi intam. Bonwantam sadili ogali kagbawi intam. Yatokitay, in Diyos wa disag hantam kitay, tam fag imbawi wan. 9Bonwantam sadili ogali kagbawi intam, kaarakitay tam, nyawa faktaw, idwag fatakagdog intam sadili kafiyan. 10Tam in Diyos wa nahalig, hanggan it nafasadi san Kiristo Hisos, kaarakitay myasa wa fiya intam manga ogali hanggan ibolon. Gi yapdis hyabi hanya danwa nafatalaga hantam tonya fag manga ibolonon. 11Kawa hayo manga magorang manga Hintil, yakanga hyabi ka manga Hodyo igngayan hayo, manga idwan toli. Dapat manga Hodyog lwang hanya ka mangan toli, kawa ta ha nabol ogbot gista manga habilogan. Ham manga Hintil, ham fag tohod no kinday ham no mabanwanan hyabi. 12Hyabi ham idyan sadi san Diyos-natogon-Famawi. Hyabi ham iba wa taw, idyan aktom san Israil fag layonan manga taw. Hyabi ham idwa ha tanggapon gis manga taranggapan kantohoyan kawas Diyos natogon has taw it manga bato disagon. Hyabi ham idwa ha fagfanayaon matohoyanan, idwa yadig syag in Diyos. 13Hyabi, ham manga Hintil ayayo wa dahol gin Diyos, dapat ay, kati, in Kiristo kahatayan kagfaakbang hayo, kawa ham insadi sa hanya. 14Is Kiristo kagfaamigosan intam, hami manga Hodyo, hanggan ham manga Hintil. Hanya no nadisag it sadili habilogan, no natay, ka nafabol ka faktaban ka hyabi igfasarowayan manga Hintil gis manga Hodyo, ka nafabol ka manga Hodyo hanggan Hintil bodbotangan sas isip. 15Is Kiristo nafatolas ka Batasan Hodyo, ka ha manga togon aywan, hanggan manga bato ogaliyon, kaarakitay igfasadi sa hanya, ka dowak layonan taw, yakanga kahowayan ka bomahala hantam. 16In Kiristo kahatayan sas nafatimbangan hayo ka nafabol ka faktaban, nafafwali yadi fagayo dowak layonan han Diyos, nafasadi intam. 17Hyabis Kiristo inbangkad hastay hanggan natoltol has fagayo ka kahowayan Fiya fag Barita, natoltol ha hayos manga Hintil ka hyabi ayayo gin Diyos, hanggan ha hyamis manga Hodyo ka danwa akbang hanya. 18Kawas Kiristo naagwanta mahori, tam fagayo, nyawa manga Hodyo, nyawa manga Hintil, tam pariho gakbang hantam Ama, kawat Falad sadi di kagfasyagan intam. 19Kawa kitonya, kati ham manga Hintil, ham bonwa iba taw, bonwa manga odi famaklay, dapat ay,ham pariho intohoyan han Diyos. Ham inaktom yadi han Diyos talanahan. 20Ham yadin halig sas balay kan-ganit sas fagrigonan Fandiya-Barita, hanggan manga Fangampang, hanggan kagfaganit has fagayo fagayo kawas Kiristo Hisos. 21Ka manga layonan sas balay sadik dahonya, nonsadi sa hanya insarokfonan, kaarakitay kabali in Diyos kafiyaon fag Fanimbaan-Dahol. 22Ham manga Hintil, kawa ham insadi san Kiristo, ham kito yadi hyami, ka Maliyaw fag Falad fakaligon in Diyos oliyanan.

will be added

X\