KOLOSAS 3

1Tam yadi inboyag ya, intahin in Kiristo. Yakanga, fag ka manga bagay san Diyos banwanan sam tongod, kantam fagayfanon fagaba. Is Kiristo matokawan sinya san Diyos balis sihon. 2Tam fag fagaba maisipan han Diyos banwanan sam tongod, idwa has manga bagay istay is baba daga. 3Maskin intam fangayofan dan natay wa a, dapat intam bago fag haboyagan intahin in Kiristo mabotangan san Diyos. 4Is Kiristo kantam haboyagan bago, hanggan hanya nomlag aban, tam koyogan yadi hanya, ha horay yadin Kiristo kafiyan. 5Kawa kitonya, tam fag faliyam intam bali fangayofan masayaon kagfatohod intam has ogali dwat has ka taw baliwa, kadwa ha nahayan, ka gogali dwat wa malayon hanggan ka maingliyon wa dahol. Ka manga maingliyon kitonya igsyag lamang has kaakwaan. 6Maskin manga taw gogali kitonyak dwat, is Diyos omisog has manga taw kadwa katanog hanya. 7Hyabi intam manga ogali kitonya yadi, intam bali fangayofan masayaon nogsakop yapdintam. 8Dapat ay kati, tam fag dayo yadi to fag manga dwat fagayo, kitos kahori has taw, kaisog, kasaya gibolon dwat has tiba taw. Intam bibig fag idwag yod has taw, hanggan tam fag idwa golit manga dwat fag hakot. 9Tam fag idwag bodbohagan ha sadi ha sadi, kawa tam nadayo intam fangayofan dan ka gogali dwat, 10hanggan tam natanggap ka bago fag fangayofan. Is Diyos ka nahalig tonyantam bago fag fangayofan, hanggan igfadagos igfabali bondi kito kat fagonan nogtolad hanya, kaarakitay tam homilala hanya fiya fiya. 11Yakanga, kati idwa ha fagihidon manga taw, nyawa manga Hintil, nyawa manga Hodyo, nyawan toli, nyawadwan, nyawa famaklay, nyawa ka manga matagowan yapdi basad moyod, nyawasta manga nasali sogowan, nyawa ka bonwasta sogowan, dapat ay, is Kiristo lamang ka mahalga, kawas Kiristo sawantam fagayo fagayo kansadi hanya. 12Tam kan Diyos manga fagalwasiyon hanggan it nafili kaarakitay imtohoyan ha hanya. Yakanga intam manga ogali fag falag has taw kitay tam maawaon, mahoway, idwa ha takan, magop has taw, hanggan maagwantaon. 13Tam fag idwa kahodhoriyan, hanggan no ginahin tam no ha fakahoriyon ha sadi ha sadi, tam fag falidliyaman wan. No kinday kagfon intam nogfaliyam intam manga naogali dwat, tam fag kitonya yadi. 14Ginya madi ka fiya man has fagayo, tam fag gadgalwasiyan, ka bilang wa fogong kagfahosto intam, tam no kasadi santam Fon. 15Fag in Kiristo disag hantam kahowayan kagbahala santam manga fangayofan. Maskin ngay is Diyos igfaaronganon intam kitay, tam fag domog in Kiristo kahowayan kitonya, kaarakitay tam fagayo kabali sadi dik habilogan sadi wak dahonya. Tam fag baya yadin Diyos. 16Ka Fiya fag Barita kawa han Kiristo, fag malangba santam manga fangayofan. Tam fag faadal hanggan igfatagak ha sadi ha sadi kantam natohodan. Tam fag baya in Diyos santam manga fangayofan tam no gambahan manga ambahan gin Diyos sorat, gis fangambahanan, hanggan tibak ambahan ka maangay has Falad Maliyaw. 17Nyawa kana kantam hampang, ngatay fakamolon, fagayo fag san Hisos kagfon intam it ngayan, hanggan fagbaya in Diyos gin Hisos. 18Ham kasta manga babay, ham fag fasakop ha hayo manga sadili indogan, maskin tonya wa ka maangay kawa ham in Kiristo fag manga taw. 19Ham kasta manga indogan, fag galwasi hayo manga sadili babay, fag idwag fadaliyan hanya fagaba. 20Ham yadi manga anak, ham fag katanog hayo manga magorang fagaba, maskin tonya wa kan Diyos fagbayaon fag ogali, ham nonbalin Kiristo fag manga taw. 21Ham, kasta manga magorang, fag kasahan di no kabaya hayo manga anak kaarakitay tadwam bway. 22Ham, kasta manga sogowan, ham fag katanog kagfasognod hayo istay is baba daga, nyawa kana kasta sogo, bondi kitay kawa ta noglag hayo ibolon, yakanga ta bomaya wan, dapat fag katanog maskin ham idwa madaya, hanggan ham iggalang in Hisos intam Fon. 23Nyawa kana hayo ibolon, fag sadi wak dahonya hayo karigonan, fag bilang was Hisos kagfon intam kagfasognod hayo. 24Ham fag tohod kitay hayo ibolon no fiya hasagfasognod hayo istay is baba daga, is Hisos kagfon intam domisag ha hayo ka fasalamat kat nafatalaga has manga taw kagsyag hanya. Is Kiristo kagfasognod hayo orongan, ham it manga wa sogowan. 25Ka gogali dwat imdosa aban, maskin is Diyos idwa ha fagihidon taw.

will be added

X\