KOLOSAS 2

1Ho kasayag fwayong ha hayo kitay ho kogodan wan kaarakitay igtogbong hayo, hanggan in Diyos Tifonan sas banwa Laodisya, hanggan fagayo kadya nahilala angko sas iba fag Tifonan. 2Ho kogodan kito kaarakitay ista manga fangayofan imrigon hanggan gadgalwasiyan ka bilang sadik fogong. No kitonya, ta tomwa wagdog fiya fiya kan Diyos idya nafatwagdog has taw hyabi, kawa ta kilala in Kiristo. 3Is Kiristo lamang ka nafalag intam in Diyos kadonongan hanggan it fakatwawon, ka bilang it kaakwaan ka hyabi matagowan yapdi. 4Maskin ngay hogsorat ha hayo, ho kasayag fatagak hayo. Ham fag idwa gadayaan nyawa haday fag taw kagfwayong hayo manga toltol kadwa orongan, nyawa kinda wak fiya kadog. 5Nyawa hodwas nyamo hayo, ho fagabag tohod hayo, yakanga angko fangayofan bilang wa gofod hayo. Hogbaya wagdog kitay ham idwa kaoman hanggan hayo manga fangayofan kaganit nogsyag in Kiristo. 6Kawa tam natanggap kitay is Kiristo Hisos kagfon intam, intam fangayofan hanggan ogali fag fadagos kasadi hanya. 7Intam manga fangayofan fag bilang wagdalid abasad san Kiristo fagaba. Intam manga ogali fag bilang yadintam fakaligon balay kanganit yadi hanya, hanggan fag karigon nogsyag hanya, kito kasta nafaadal hayo. Fag fagaba wagbaya in Kiristo. 8Fag matagahan kitay ham idwam iktan sasta toltol kadwa ha fakinabang, igdaya ya ngadi, gi odis kadonongan taw, idwa gin Kiristo. Gi odista hafofowanan adal tonya, gi odis manga afo daga. 9Ham fag idwa kadiya igdog ka kitonya fag manga toltol maskin is Kiristo nonbali taw, in Diyos fangayofan sadi wak dahonya sa yapdi hanya, 10hanggan hayo manga haboyagan inbali hosto kawa ham insadi san Kiristo. Is Kiristo kagsakop yadi fagayo fag manga karigonan sas tongod hanggan sas baba daga. 11Kawa ham manga Hintil insadi san Kiristo, ham bilang wantoli yadi, dapat bonwa taw fag natoli, in Kiristo fag natoli, kagfalfas intam gintam bali fangayofan masayaon. 12Maskin tam nontogna, intam ogali gona bilang wantahin in Kiristo nonlobgob, hanggan tam intahin yadin Kiristo nonboyag ya, kawa tam igsyag in Diyos karigonan ka nafaboyag ya in Kiristo gis kahatayan. 13Hyabi ham, manga Hintil, bilang mahatayan kawa dwat hayo manga ogali, hanggan ham idyag dog ka manga Batasan Hodyo. Dapat kati is Diyos nafaboyag hayo, gofodan in Kiristo. Is Diyos nafaliyam intam manga naogali dwat fagayo fagayo, 14nadwat yadi ka kasoratan kagfatohoyan intam manga bayadon ha hanya, hanggan nafaliyam ka ogali igsohot kantam bayadon, kagfadala intam hyabi. Tonya fag kasoratan, kagfatohoyan intam bayadon han Diyos, bilang wanpako sas nafatimbangan hayo, yakangadwa ha kahologan kati. 15Is Kiristo no natay sinya sas nafatimbangan hayo, hanya nalfas gis karigonan manga labang, manga afo daga kagbahalat sakop, ginya madis Kiristo nataban tonya fag manga labang, manga afo magafosan sasta faglagan, hanya noglahaw sasta fagonan ayo ayo, ta nogbaya hanya, kawa hanya nadaog it manga kalaban. 16Kawa kitonya, fag idwa ha taw gato hayo has manga fanganon, ngatay inomon baliwa, has manga fagtohodon fag sirang, sas manga bangkad lati, nyawa sas sirang fahoway. 17Hyabi, tonya fag manga bagay anino lamang manga bagay kadyan dasog hyabi, dapat ka orongan it afo, kawas Kiristo. 18Ham fag idwa gadaogan nyawa faktaw kagfasalagwahayo maskin, hono, ha lagan madolaw, hanggan igfaaronganon hayo kitay, ham fag falibaba hayo fangayofan, ka famalagon od has taw, hanggan fag has manga anghil nogfasayagdog. a kitonya fag manga taw basta odi taw, ista fangayofan, fangayofan odi taw, tagfadaholon odista sadili. 19Ka kitonya fag manga taw fawag syag in Kiristo, ka bilang alfoyo hat Tifonan, ka bilang wat habilogan. Is Kiristo kagbahala it habilogan sadik dahonya, kagfarigon hanggan igfasadi it habilogan, kawa ha manga halisan hanggan manga ogat. Yakanga, no kinday in Diyos fasadan, it Tifonan, ka bilang in Kiristo habilogan sadi wak dahonya, kadahol wan. 20Is Kiristo no natay, intam bali fangayofan masayaon natay yadi wan, yakanga tam nalfas gis karigonan mang labang, manga afo kagbahalat sakop. Yabay, kana mayn ham nogfadagos yapdi hayo ogali kitos manga taw kastay yapdi fag baba daga fag sakop? Kana mayon ham nogfasakop yapdi has manga togon kitos, 21Fag idwag boya to fag bagay, fag idwa kwan tyamo fag fanganon, fag idwag sapkid tonya fag bagay? 22Tonya fag manga fagliyon fag manga bagay kaliyam di no namin wan. Taw odi kagtogon hanggan igfaadal kitonya. 23No kadog di, kagfwayong kitonya fag manga togon, madonong nga wan, ta nogfaaronganon has taw kitay, fag fasayagdog has manga anghil. Tagfadogon odi has taw, ta noglwang kitay tadwa ha takan, hanggan ta nogtikis wagfahoriyan it sadili habilogan kaarakitay is Diyos nangos fag bomaya wastaw. Dapat tam no kasayag daog intam bali fangayofan masayaon, ka kitonya fag manga togon idwa tomogbong intam.

will be added

X\