1 Ahos Pablo kagsorat to fag sorat. Ahon bali in Kiristo Hisos Fandiya-Barita maskin in Diyos wa kafangayofanan kitonya. To fag sorat gi yadin Timotiyo intam fadwasay. 2 Migsorat ha hayo ka mangan tohoyan han Diyos sas banwa Kolosas, ha hyami matanogon fag manga fadwasay kansadi yadi san Kiristo. Ham nangos fag domog kitay is Diyos intam Ama mahoway ha hayo fagaba, hanggan igfalokmay hayo manga fangayofan. 3 Hami nogdarangin kawa ha hayo, mi fagaba wagbaya in Diyos, kan Kiristo Hisos kagfon intam, it Ama, 4 maskin mi nadog kitay, ham igsyag in Kiristo Hisos, hanggan ham galwasi has fagayo fag manga taw kantohoyan han Diyos, 5 kawa ham ha fagfanayaon matalagaan ha hayo san Diyos banwanan sam tongod. Hyabi, ta no nafwayong ha hayo ka orongan wa Fiya fag Barita, ham nadog no kana kantam fagfanayaon. 6 Ka Fiya fag Barita kadahit kadayo kadayo, hanggan igfadasog yadi in Diyos kafiyan ha sadik baba daga kito yadi ka hayo lagan gi yapdis hyabi, gis nanya ham no bago di nadog kawa han Diyos malooy fag kahowayan, hanggan natwa waglag tonya sa hayo sadili nadalanan. 7 Is Ifapras, hyami fakawiliyon fag ofod sogowan, ka nafatwagdog ha hayo in Diyos malooy fag kahowayan. Hanyan Kiristo matanogon fag fangibolon ka hyami famarita is nyamo hayo. 8 Is Ifapras ka nafadog ha hyami kitay ham galwasi has manga taw, kawa ka Maliyaw fag Falad sawa hayo. 9 Maskin ngay, gi yapdis hyabi, mi no bago di nadog, kawa ha hayo, mi fagaba wagdarangin. Hyami fagsagadon gin Diyos kitay, ham fag tomwa matohoyanan no kana kan Diyos kafangayofanan, hanggan fag ha akwa kadonongan sa hayo manga fangayofan bago ka tomwa wagdog tonya. 10 Migdarangin yadi kitay ham nangos fag gogali kagfon intam it fakasayaon fagaba, hanggan imbalit fagbayaon. Hayo manga ogali bomohad yadi manga kafiyan bokod bokod, hanggan ham kalabi wa kilala in Diyos. 11 Migdarangin yadi kitay, in Diyos kafiyaon fag karigonan fag faganit hayo manga fangayofan, kaarakitay ham idwag fagomon hanggan gagwanta yadi, nyawa kana ka hayo madalanan, 12 kasolong yadi nogbaya intam Ama ka nafabali hayo fangayofan maangay, hanggan fiya tomanggap ka hayo afoon kan Diyos nafatalaga sat sakop kayawaan, kawa has manga taw kantohoyan hanya. 13 Is Diyos nabawi intam gis sakop karigonan marom, hanggan igtaban yadintam hat fagalwasiyon fag Anak sakop. 14 It Anak kagfalfas intam, hanggan igfaliyam intam manga naogali dwat. 15 Is Kiristo no mabanwanan istay is baba daga hyabi, hanya nafalag hantam no kinday is Diyos kadwa malagan. Is Kiristo in Diyos anak gona, hanggan it kangayanan abwat man has fagayo fag manga bagay kanhalig. 16 Maskin hyabi hyabi, is Diyos nafahalig in Kiristo fagayo fag manga bagay sat banwanan sam tongod, hanggan ka manga bagay istay is baba daga, ka manga malagan hanggan kadwa malagan, manga gorangon, manga fon, manga ha kangayanan kadwa malagan, is Kiristo yadi ka nahalig tonya. Is Diyos nafahalig in Kiristo fagayo, sadi wak dahonya, kaarakitay fagayo mamasayagdog yadin Kiristo. 17 Is Kiristo danwa ha akwa hyabi, nyawa ka tiba bagay fagayo idyan halig. Hanya yadi kagfaganit fagayo fagayo no kinday ka maangay. 18 Hanya ka bilang alfoyo sat Tifonan, ka bilang wat habilogan. Hanya ka nafabagot Tifonan, hanya ka gonan boyag ya gis kahatayan, yakangat kangayanan abwat man has fagayo fagayo kat nahalig. 19 Maskin in Diyos sadili kafangayofanan kitay, no kinday is Diyos, it Anak fag kitonya yadi, sadi wak dahonya. 20 Yakanga, gi wat Anak, in Diyos kafangayofanan fafwali ya hat sadili, sadi wak dahonya kat nahalig. Maskin it Anak folot in-olan, hanya no natay sas nafatimbangan hayo, is Diyos igfaangay kitay fagayo kanhalig, nyawa sas baba daga, nyawa san Diyos banwanan sam tongod, fag mangafiyan wa hanya. 21 Hyabi tam ayayo gin Diyos, hanggan tam it manga kalaban maskin dwat intam manga fangayofan hanggan ogali. 22 Dapat kati, maskin it Anak natay, kitos manga taw no katay, is Diyos igfabali intam it manga fakilalaon, kaarakitay fadasog intam aban hat atobangan, fiya, malinay, idwa ha fabangdanan ngadi ogbot. 23 Tam fag fadagos kaganit no katiwala ka Fiya fag Barita. Tam fag idwam hawig gintam fagfanayaon, kantam nasyag tam no nadog ka Fiya fag Barita. Ahos Pablo inbalin Diyos sogowan kaarakitay fomwayong to fag Fiya fag Barita kantam nafadog has fagayo fag manga taw, sadi wak dahonya baba daga. 24 Kati yabay hogbaya wan, maskin sangko fagdogon mahori ahog fadagos in Kiristo naagwanta hyabi kadyan tabo kawa hat Tifonan, ka kitay in Kiristo habilogan. 25 Ahon bali ka Tifonan sogowan is Diyos no nafatohoyan angko to fag ibolonon kaarakitay igfadog ha hayo it hampang. It nafaibolon angko kitay, aho fag fadog fiya fiya ha hayo in Diyos fagfwayongon, 26 kadya nafadog nyawa haday fag manga taw gi yapdis hyabi hyabi, dapat kati is Diyos nafatwa wagdog tonya has manga taw kantohoyan hanya. 27 In Diyos fasadan, hanya fatwagdog has fagayo fag manga taw to kat fagfwayongon madolaw, kadya nafadog has taw hyabi, fiya wa dahol dahol kitay, is Kiristo sawantam, yakanga tam ha fagfanayaon, kawa tam omofod yadin Diyos sat kayawaan aban. 28 Kawa kitonya is Kiristo kantam fagbaritaon has fagayo fag manga taw. No baliday hyami fagsyaganon, migfili ka manga hampang matwagdog hami nogfatagak hanggan igfaadal has taw kaarakitay igfadasog fagayo, igsadig sadi han Diyos atobangan, idwa ha korang, kawan sadi san Kiristo. 29 Kaarakitay fatonglos tonya angko ibolonon, ho kogodan wan, nyawa mahori, kawan Kiristo disag karigonan, kagfasyagan angko.
