NAIBOLON 9

1Dapat ay is Sawlo igfadagos wagfahoriyan hanggan wagfahatay kagfon intam it manga katogbong. Yakangay hanya naakbang has gorangon fag fagalan, 2nanagad manga sorat famalag has manga fanimbaan Hodyo sas banwa Damasko, kaarakitay faangayan hanya no gomamat nyawa faktat lagan sinya, nyawa ama, nyawa ina, kagfasakop has Ogali Bago. Ginya madi tomaban tonya, magafosan, has Hirosalim. 3Da Sawlo no kaakbang wa has banwa Damasko, sadi odi ginan nayawa masilaw gim tongod san Sawlo ligongan. 4Yakangas Sawlo inlohob odi. Ginya madi nadog sadik hasnog kampang ha hanya, iglwang, Sawlo, Sawlo, kana mayon haw nogfahoriyan angko? 5Is Sawlo naintaw, Faktaw haw, angko Fon? Ha nasagot hanya, Aho kawas Hisos kam fagfahoriyon. 6Haw fag lindog, fag hawas basad banwa. Haw no hanya, ha bago domog kam bato ibolonon. 7In Sawlo manga ofod idwa gawang gawang. Ta nadog ongay ka hasnog dapat tadwa ha lagan taw. 8Is Sawlo inlindog, mafogan di ongay it mata, dapat idwag lag. Yakanga ta nagamit odi hanya has basad banwa Damasko. 9Tolo wak sirang is Sawlo idwag lag, idwa ha nahwan, idwa nainom. 10Yabay, gis nanya, in Hisos katogbong sadi sinya yadis Damasko, kawas Ananiyas. Kagfon intam no nafalag madolaw hanya, nangayan hanya, nalwang, Ananiyas. Is Ananiyas nasagot, Angko Fon, kana tonya? 11Kagfon intam nafwayong, Haw fag kalindog, haw fag hawas karsada kat ngayan, Maslong, haw intawan sinya in Hodas balay, ligawan in Sawlo, taga Tarso sinya. Katis Sawlo igdarangin wan. 12Ha nafalag hanya madolaw. Nalag haw igsakbaw hat oliyanan, ginyag fwalid im gamat ha hanya kaarakitay it mata lomag ya. 13Dapat is Ananiyas iglwang, Angko Fon, gwadi aywan fag manga taw kagfwayong angko kitay tonya fag taw dwat it ibolon fagayo has manga taw kantohoyan ha hyamo sas Hirosalim. 14Ginya madi hanya, hono, inbangkad yadi hastay is Damasko, madiyan it kasoratan gis manga fagtahinan fagalan, kaarakitay gomafos fagayo istay kagsyag ha hyamo. 15Dapat ay, kagfon intam nafwayong han Ananiyas, Ha ngap fag hanya wan. Maskin hanya kangko nafili kaarakitay igfahilala angko ngayan has manga Hintil, has manga gorangon, hanggan han Israil manga hasokfonan. 16Ho fadog hanya fagayo kat bato agwantaon aban maskin galwasi angko. 17Ginya madi yabay, is Ananiyas hanya wa ngay. Nasakbaw basad balay, igfwalid it gamat san Sawlo, iglwang, Fadwasay Sawlo, kagfon intam, is Hisos, ka nafalag ha hyamo sas boknga dalan, haw noglahaw hastay, kagsogo angko hastay kaarakitay im mata lomag ya, hanggan ka Maliyaw fag Falad fag sawa hyamo sadi wak dahonya. 18Dagos handagdag manga bilang siksik gin Sawlo mata. Ginya hanya nalag ya. Dagos wa nalahaw, nafatogna yadi wan. 19Ginya madi yabay, hanya no nangwan ya hanon, inrigon wan. Is Sawlo nadogay yapdi ogbot sas Damasko, gofodan in Hisos manga katogbong sinya. 20Dagos wagfadog sas manga fanimbaan Hodyo kawa han Hisos, igfaorongan kitay hanyan Diyos wa Anak. 21Fagayo intaka wagdog, taglwang, Bohonwa awkin to ka ama ka dan igfahoriyan has mangag syag han Hisos ngayan sas Hirosalim? Bonwa awkin tonya yadi kanbangkad hastay kaarakitay gomamat tonya fag manga taw, tomaban yadi magafosan has manga fagtahinan fagalan? 22Dapat kawas Sawlo kabagat wa kafiyaon nogfaadal, ka manga Hodyo ka mabanwanan istay sas Damasko, idwa twag sagot, maskin hanya goronganan wagfatohoyan kitay, is Hisos kan Diyos nga natogon-Famawi. 23No dogay ogbot, ka manga Hodyo nangoyonan kitay fahatayan in Sawlo. 24Dapat is Sawlo nadog wan. Yabi sirang ta golog in Sawlo sas manga sakbawan alad banwa kaarakitay fahatay hanya. 25Dapat basad yabi it manga katogbong natonton in Sawlo basad baban dahol, has dayo alad bato. 26Ginya madis Sawlo nondasog sas Hirosalim, gwayan wa kasaya omaktom has manga katogbong sinya. Dapat ta kadala yapdi, tadwa katiwala kitay kati is Sawlo sadi yadik katogbong. 27Dapat is Barnabi nataban in Sawlo has manga Fandiya-Barita. Is Barnabi nafatwagdog has taw no kinday no sas boknga dalan, is Sawlo nalag kagfon intam, hanggan kagfon intam nahampang hanya. Nalwang yadi kitay is Sawlo no sas Damasko idwa kadala igfaoronganan kawa han Hisos. 28Ginya yabay is Sawlo gofodan has taw sas Hirosalim, idwa yadi kadalag toltol sinya sat ngayan kagfon intam. 29Hanyag fatoltolan hanggan igfabodbohagan has manga Hodyo ka kampang fangampangan Girigo. Dapat ta kasaya wagfahatay in Sawlo. 30Ka manga fadwasay natwa di ngay, ta nataban in Sawlo has lwad, has banwa Sisariya, ginya ta nafaoli mandi hanya has banwa Tarso. 31Ginya madi yabay, sa sadi wak dahonya sakop Hodiya, sakop Galiliya, hanggan sakop Samariya, idwa hagfahoriyan in Diyos Tifonan. Kawa ta katanog kagfon intam it manga togon, ka mangan tiwala inrigon ya, inaywan ya, hanggan igfadagos yapdi kaayo kawa ka Maliyaw fag Falad igtogbong yadi. 32Is Pidro noglahaw igsabang has manga fadwasay sas ligongan, indasog has lwad, igsabang has mangan tiwala sas banwa Lida. 33Sinyas Pidro nalag sadik ama, is Iniyas, idwa syagan kimot, walok fangaraw maigyanan odi. 34Is Pidro iglwang hanya, Iniyas, is Kiristo Hisos kagfafiya hyamo. Ha fag lindog wan, fafiyanan yap im sagmak. Hanyan lindog wa dagos. 35Fagayo ka sas banwa Lida hanggan sas banwa Saron nalag is Iniyas nonfiya, yakanga tantiwala hasagfon intam. 36Sas banwa Hopi man ha sadik ina in Hisos katogbong, is Tabita, fagaba wa gibolon fiya, igtogbong has manga myabog. In Tabita ngayan sas fangampangan Girigo, is Dorkas. 37Gis nanya fag manga masohod, is Dorkas insagit, natay wan. Ta no nafyad it habilogan, ta nafwalid sas tongod fag salogan. 38Ka banwa Lida akbang di has banwa Hopi, yakanga manga katogbong no nadog kitay is Pidro sadis Lida mangharaw, ta nasogo dowak ama fanabang hanya, iglwang, Sabangan nangos hyami, fag ngalay wan. 39Is Pidro naofod wa ka dowak ama. Nondasog sinya, ta nafasakbaw wa dagos in Pidro has tongod fag salogan. Ka manga ina balo fagayo goraw yapdi, gobok in Pidro. Ta nafalag in Pidro manga homot, manga balokas in Dorkas nahalig, hanya no boyagan yapdi. 40Dapat is Pidro nafadokson yap fagayo. Ginya nanlingkohodan, nandarangin. Ginya madi nasayango has natay, iglwang, Tabita, ha fakabangon wan. Ginya in Dorkas mata infoga ya. No nalag in Pidro, intokaw wan. 41Is Pidro natawid it gamat, natogbong igfalindog. Ginya madis Pidro nafatawag ka mangan tiwala hanggan ka manga ina balo. Nafalag is taw kitay is Dorkas boyagan ya. 42Indog wan ha sadik dahonya sas banwa Hopi. Yakanga aywan kantiwala hasagfon intam. 43Is Pidro nandogayan yapdi sas Hopi sat sangay Simon balay kagfafiyan anit baka fakaligon.

will be added

X\