NAIBOLON 8

1Is Sawlo igfaangay yadi was taw ta nogfahatay in Istiban. Gis nanya yadi fag sirang manga taw igfadagos igfahoriyan wa dahol dahol in Diyos Tifonan sas banwa Hirosalim. Ka mangan tiwala nanhalagyowanan wan gis banwa Hirosalim, hawas manga sakop Hodiya hanggan Samariya. Dapat ka manga Fandiya-Barita idwa nalagyo. 2Ka manga taw ka katanog in Diyos nalobgob in Istiban, nangodgorawan yadi. 3Dapat ay, is Sawlo talaga wagdwat in Diyos Tifonan. Nagombalay, igsakbaw, goyod yadi ginya ka mangan tiwala, nyawa ama, nyawa ina, ginyag faporiso. 4Ka mangan tiwala nonsarowayan, ta nabarita di ngap in Diyos hampang nyawa hada kandasog. 5Is Filipi hawas sadik banwa sakop Samariya, nabarita has taw in Diyos-natogon-Famawi-hanggan-Gorangon. 6Ka fakaaywanan no nadog it hampang, hanggan nalag it manga falagon madolaw, insadi ista fangayofan tomalinga fiya fiya. 7Aywan fag manga labang nalin gis taw, igharokyawan no galin wan. Aywan yadi fag manga gafilay hanggan fihong infiya wan. 8Yakanga sinya fag banwa tagbaya wa dahol. 9Dapat ha sadik ama sinya, is Simon, dogay wagfataka has manga taga Samariya, iglipat maskin. Hanyag fabali kitay hanya kasta fagdogan. 10Nyawa ka ha manga kangayanan abwat, hanggan kadwa ha manga kangayanan, fagayo igtalinga hanya. Fagayo iglwang, To fag ama kasta faglwangon in Diyos karigonan, is Marigon. 11Dogay wa gis hyabi is Simon idwag logak igfatakas taw, kawag lipat. Yakanga fagayo igtalinga wa hanya. 12Dapat is Filipi no nabarita kawa han Diyos sakop, hanggan kawa han Kiristo Hisos ngayan, ta katiwala yadi wan, nyawa ama, nyawa ina, hanggan intogna yadi. 13Hanggan was Simon intiwala, hanggan nontogna wan, gofod in Filipi, nyawa haday. Is Simon kataka waglag in Filipi manga fagfalagon madolaw hanggan fatimawa. 14Ka manga Fandiya-Barita sas Hirosalim no nadog kitay manga taga Samariya intiwala han Diyos hampang, ta nasogo inda Pidro da Hwan has sakop Samariya. 15Ta no nadasog, ta nandarangin yapdi kawa has mangan tiwala sas Samariya, kaarakitay ka Falad Maliyaw fag sas taw yadi, 16maskin idya ha akwa, nyawa faktaw, kawa san Hisos kagfon intam it ngayan lamang ta nontogna. 17Ginya madi da Pidro da Hwan nafwalid ista manga gamat hasta baba alfoyo kaarakitay ta tomanggap ka Falad Maliyaw. 18Is Simon no nalag kitay ka Falad Maliyaw indisag has taw ka manga Fandiya-Barita nogfwalid ista manga gamat hasta baba alfoyo, is Simon iglwang, 19Ho manlobos yadi wan. Ho somali wa hayo kaarakitay aho nangos fag kitonya yadi hayo, igdisag ka Falad Maliyaw has taw aho nogfwalid angko gamat hasta baba alfoyo. 20Is Pidro nasagot, Im kwarta imtahin yadi hyamo imdwat. Maskin haw gayfan in Diyos disag ngandayo fagsaliyon. 21Hadwa ha tanggapon tonya fag bagay. Idwa maangay sa hyamo, kawas Diyos twa kitay hyamo fangayofan dwat yapdi. 22Haw fag soyo yap, fag darangin hasagfon intam, kaarakitay nomtwa di, hanya faliyam nangos im fagayfanon dwat. 23Kawa hoglag haw kaingli wa dahol, bilang magafosan sas ogali dwat. 24Is Simon iglwang, Ham fag sakop angko igdarangin hasagfon intam kaarakitay kam nafwayong angko manga dwat idwa omakbang hangko. 25Ginya da Pidro infwali ya has banwa Hirosalim nonsagaya wagbarita hanggan igfaorongan kagfon intam it hampang has fakaaywanan fag manga banwanan sas Samariya. 26Ginya madin Diyos anghil nasogo in Filipi, nalwang, Haw fag hanya wa dagos has Ihipto baliwa, has dalan has Gasa. Tonyag dalan sas fakahyabogan. 27Yakangas Filipi hanya wan. No sawas dalan is Filipi nalag sadik ama bating, taga Itiyopya, kagbahala han Kandasi manga botang fagayo, kawas Kandasi ka gorangon ina gis nanya sas sakop Itiyopya. Ka ama bago di goli gis Hirosalim, kawa nanimba ginya. 28Ka ama masahayan basad kalisa, igbasa in Isayas, in Diyos fangampang nasorat. 29Ka Falad Maliyaw nafwayong han Filipi, Ha hoyogan wan tonya fag kalisa. 30Is Filipi nadalandan wa ogbot, naakbang has ama ka masahayan, igdog ka ama igbasa in Isayas, in Diyos fangampang nasorat. Ginya madis Filipi gintaw hanya, Haw aw twa ngagdog kam fagbasaon? 31Ka ama nasagot, Kinda araw aho no tomwa wagdog nodwa hagfwayong angko? Ginyag lwang han Filipi, Haw fag sahay yadi wan, fag is nwa, sangko akbang. 32To kat fagbasaon gis nanya, No kinday ka topa idwa gawang ta nogtaban has famahatayan, Hanggan no kinday ka anak topa idwa gawang ta noglokfog hanya, Kitonya yadi hanyadwa gawang. 33Ta nogfahoriyan hanya, tadwag fadalan hasagtalinga hampangan, ta nafahayan odi hanya, Idwa akwa sokfon Maskin it haboyagan sas baba daga inbol di. 34Ginya madi ka ama taga Itiyopya naintaw in Filipi kitay no faktaw kan Diyos fangampang faglwangon sat nabasa, ngatay it sadili ngatay iba taw ya kat faglwangon. 35Ginyat fagbasaon, is Filipi natoltol ka Fiya fag Barita kawa han Hisos. 36Ta noglahaw yapdi tandasog sas ha danom. Ka amag lwang, Idwa aw fiya haw no mamatogna angko? 37Is Filipi nasagot, iglwang, Fiya di haw nomtiwala sadi wak dahonya fangayofan. Ka amag sagot, Ahon tiwala wan kitay is Kiristo Hisos in Diyos wa Anak. 38Ka ama nafatorosan wat kalisa a, ta dowa nadokson wan, hawas basad danom. Is Filipi nafatogna ka ama sinya. 39Ta no nalahaw gis basad danom, kagfon intam it Falad dagos wa nataban in Filipi. Ginya ka ama idwa nalag domwag in Filipi. Nafadagos wat lahawan, masolong wan. 40Dapat is Filipi indasog sas banwa Asoto. Ginya madi natoltol ka Fiya fag Barita kat nagdalanan banwa fagayo hanggan wandasog sas banwa Sisariya.

will be added

X\