NAIBOLON 7

1Ginya ka gorangon fag fagalan gintaw in Istiban, Ista sombong hyamo orongan wa aw? 2Is Istiban nasagot, Manga fadwasay, hanggan manga magorang, ham fag matalingan. Is Abraham intam pinagkaama no sayapdis sakop Misopotamiya, nodya nalin has banwa Haran, ka marigon hanggan kafiyaon fag Diyos nasabang hanya. 3Nafwayong hanya kitay, Haw fag galin gim banwanan, obonan im manga kaiban. Haw fag hawangko fagfwayongon banwanan ha hyamo. 4Ginya madis Abraham nalin wa ngay gis manga banwanan Kaldiyo, nabanwanan has Haran. Ginya madit ama no natay sas Haran, is Diyos nafaalin ya domwag in Abraham gis Haran, nafangolo hanya hastay fag banwanan, kantam banwanan kati. 5Dapat ay, is Abraham no bago yapdi dasog, is Diyos idyag disag daga hanya, ngadi dahos basad dalohap, nyawas Diyos nafwayong hanya kitay, is Abraham hanggan it manga hasokfonan ka omafo tonya fag banwanan aban. No kitay di, is Abraham idya ha anak gis nanya. 6Is Diyos nafwayong han Abraham kitay, Im hasokfonan domogayan sas iba banwanan aban. Tambali ista manga sogowan sinya, hanggan ka manga taga sinya mamahoriyan im manga hasokfonan ofat ik daan fangaraw. 7Dapat is Diyos iglwang, Aho mamadosa yadi ka mangag fahoriyan im manga hasokfonan, ginya madi ta falahaw yas taw. Istay yadi fag banwanan im manga hasokfonan somimba ya hangko aban. 8Is Diyos ha taranggapan han Abraham, hanggan natogon ka ogali igfatoli bilang tandaan kitay tan-aktom sas taranggapan. Yakangan Abraham anak, is Isaak nonsagaya, is Abraham natoli hanya sas fawalo fag sirang. Kitonya yadis Isaak natoli in Hakob hanggan is Hakob natoli it manga anak ama, safolo ha dowa, kanbali intam manga pinagkaama sas safolo ha dowak layonan in Israil manga hasokfonan. 9Tonyantam hafofowan, intam fagngayanon tiba, in-ingli in Hosi hyabi. Ta nafasali ya ngadi hanya has taga Ihipto. Ka taga Ihipto nafabali in Hosi it sogowan. Dapat is Diyos sawa hanya, 10nabawi hanya git lagan mahori fagayo. Is Diyos nafabali kitay is Faraon, ka gorangon sas sakop Ihipto, fag igbaya in Hosi kadonongan. Yakanga nafabali in Hosi ista tahinan sas Ihipto hanggan san Faraon sadili balay. 11Gis nanya fag manga masohod, ka manga taw sas sakop Ihipto, hanggan sas sakop Kanaan sadi wak dahonya, gwayan wan, kawa kalonos wa dahol dahol. Intam manga pinagkaama idwa yadi ha faglagon it bato hanon. 12Dapat ay, is Hakob no nadog kitay ha hanon sas Ihipto, nasogot manga anak hanya. 13Ginya madi, sasta fadowa fag swali, is Hosi bago di nafadog hat manga fadwasay hanya no faktaw, hanggan is Faraon bago di nadog yadi is Hosi no ginda fag layonan taw. 14Is Hosi nafatawag it ama hanggan it manga kaiban fagayo, gamtanan fitok safolo ha limak taw. 15Ginya madis Hakob nadasog yadi has sakop Ihipto. Sinya wak natay hanggan wat manga anak, intam manga pinagkaama. 16Ta natibo mandi ista habilogan, tiba tiba nyawasta botol odi, nadiya mandi nafaalin man has Sikim han Abraham nasali daga, it bato lobgobanan, it nasali gin Hamor manga anak. 17Ginya madi aban, is Diyos no kaakbang wa kadisag it nagtogonan daga han Abraham hasokfonan, intam iba sas Ihipto inbali ayo ayo. 18Ginya, no dogay, hanbali ya sadik gorangon sas Ihipto kadwa nahilala in Hosi. 19Tonya yadi fag gorangon kagbohag ya ngadi intam manga hafofowan hyabi, hanggan igfahoriyan. Nafasognod has taw kitay, okasan ista manga anak dararag kaarakitay matay. 20Gis nanya fag masohod is Mwisis nonsagaya, taglag kafiyaon fag anak, yakangat magorang naano hanya tolok magdanon sas basad balay. 21Ginya ta no nafaalin in Mwisis has sokayan, matagowan yapdi, in Faraon dayaga nalag, nasafat, naano bilang wat sadili anak. 22Ta nafadonong in Mwisis fagayo fag kadonongan taga Ihipto. Is Mwisis inbali marigon igtoltol hanggan gibolon. 23Ginya madis Mwisis no ofat ik safolok fangaraw it kagorangan, kasaya manabang hat kaiban manga taga Israil. 24Is Mwisis no nalag kitay ka sadik taga Ihipto gisog ka sadik taga Israil, is Mwisis naapin ka taga Israil hanggan nafahatay ka taga Ihipto. 25In Mwisis fangayofan it manga kaiban nangos tomwa wagdog kitay, is Diyos nafili in Mwisis kaarakitay omapin is taw. Dapat tadwa twagdog. 26Nonbago marom, is Mwisis no nasabang ya, nalag ya ngay ka mandi kapariho taga Israil gawayan, gayfan lomilang is taw, nalwang, Ham myasa wa taga Israil, kana mayon ham no gawayan? 27Dapat kagdaog it ofod, natolod ogbot in Mwisis, iglwang, Faktaw ka nafabali hyamo hyami fangabaya? 28Ngatay haw kasaya ya ngay mamahatay angko, kito kam naibolon fafon ha sadik taga Ihipto? 29Is Mwisis no nadog ista hampang, hanya nalagyo dan. Nabanwanan sas sakop Madian. No madogayan sinya, it anak ama dowa. 30Ginya madi, nonsagaya ofat ik safolok fangaraw sinya, is Mwisis no ayayo gista manga banwanan, akbang has moyod Sinay, is Diyos nafalag hanya sadik anghil sas fon hayo libaba, gigang. 31Is Mwisis indolaw wat lagan. Ginya, no gakbang kaarakitay bomantay fiya fiya, is Mwisis nadog kagfon intam it hasnog iglwang kitay, 32Aho im manga hafofowan Diyos, inda Abraham, da Isaak, da Hakob Diyos. Is Mwisis karokog wa kadala, kadala wagbantay. 33Ginyas Diyos nafwayong hanya, Bol yap im lapak maskin im faglidan daga intohoyan han Diyos. 34Ho fadi wadag lag kitay ka taga Ihipto igdaog angko sakop. Hogdog wa kitay ta gwayanan wan. Hogdokson wan kaarakitay bomawi is taw. Kati yabay ho somogo hyamo has Ihipto. 35To fag is Mwisis kasta fakaplaon igdog, ta noglwang Fakta ka nafabali hyamo hyami fangabaya? Is Mwisis kan Diyos nasogo kaarakitay imbali ista fagtahinan hanggan famawi, hanya no nalag in Diyos anghil sas fon hayo libaba. 36Is Mwisis ka nataban ka manga taga Israil gis Ihipto, hanya no gibolon manga fatimawa hanggan falagon madolaw, ta no sas sakop Ihipto yapdi, ta no sas Dagat Dararag, hanggan ta no basad fakahyabogan ofat ik safolok fangaraw. 37To wa fag Mwisis ka nalwang han Israil manga hasokfonan, Is Diyos fatohoyan gi hayo aban sadik fangampang kito mandingko. 38To wa fag Mwisis ka sinya in Israil manga hasokfonan nontifonan basad fakahyabogan. Hanya ka kampang has anghil hyabi, ka anghil no kampang ha hanya hanggan hantam manga hafofowan sas Moyod Sinay. Hanya ka natanggap gin Diyos ka hampang kagfaboyag is taw kaarakitay igdisag hantam. 39Dapat ay, intam manga hafofowan dayo katanog in Mwisis, ta napla odig dog, fagaba gayfan has Ihipto. 40Taglwang han Aaron, Falowan hyami manga faglohodan malagan ka fomangolo hyami, kawas Mwisis ka nataban hyami gis Ihipto, midwa twa no kinday sinya. 41Gis nanya, ta nahalig tolad anak baka faglohodan. Nasogba yadi manga hayopan has bilog tolad, hanggan nafanolodan wa sinya. 42Yakangas Diyos nagoyoyan has taw, nafabayaan wa ta noglohod has manga fanggasan sas banwa sam tongod, kito kansorat san Diyos fangampang sorat, Ham mangan Israil hasokfonan, ham no nadogay ofat ik safolok fangaraw basad fakahyabogan, Hawangko anod awkin ham igsogba manga hayopan, hanggan igdisag manga disagon? 43Bonwa mawat, in Molok balay-rotay ka hayo nadiya hanggan in Rimfan fanggasan ka hayo faglohodan. Ka hayo nadiya kawa hayo sadili gamat nahalig manga tolad faglohodan, Yakanga ho omokas odi hayo has dayo Babilonya. 44Intam hafofowan nogdogayan yapdi basad fakahyabogan, ka Balay-Rotay kagfatohoyan in Diyos taranggapan has taw, sinya yadi wan. Inhalig fiya fiya kiton Diyos togon han Mwisis no nafalag hanyat fagtoladon. 45Ginya madis Mwisis no natay, it manga anak man ka nabahala ka Balay-Rotay, hanggan is Hosi no sasta fagonan is Diyos no nafaalin tibak layonan taw gin Diyos disagon fag banwanan, is Hosi no nataban in Israil hasokfonan hanya, tagdiya yapdi ka Balay-Rotay. Sinya yapdi ka Balay-Rotay hyabi hanggan nadasog han Dabid kasta Gorangon. 46Is Dabid in Diyos wa fagbayaon, hanggan hanyag sagad kitay is Diyos faangayan kitay hanya mangalig balay ka maangay han Hakob Diyos. 47Dapat is Salomon odi, kan Dabid anak, ka nahalig tonya fag balay. 48Dapat ay, is Diyos ka Abwat man has Fagayo, idwag banwanan sasta manga gamat nahalig balay, kito kan Diyos fangampang fwayong, 49Ka banwa sam tongod angko tokawan fanokawan gorangon, Hanggan ka daga angko yadi lidan. Kana fag balay hayo torokon domwag hangko, Siday nangos hayo falo angko famahowayan? 50Bonwa awkin aho ka nahalig to fag manga bagay fagayo? 51Is Istiban igtoltol yapdi has taw, iglwang, Hayo manga fangayofan maganit wa dahol. Idwan bago hayo manga ogali. Ham kito yadi ka hayo manga hafofowan gis hyabi. Ham fagaba wagsongat ka Falad Maliyaw. 52Hayo manga hafofowan nafahoriyan in Diyos manga fangampang fagayo. Ta nafahatay yadi kagfwayong kitay, is Maslong imbangkad aban, hanggan ham naoyon it manga kalaban hanggan wa nafahatay in Maslong. 53Ham fadi wad nadog in Diyos manga togon git manga anghil, dapat ham idwan tanog. 54Ka fanifonan Hodyo sadi wak kayonya, no nadog in Istiban toltol, nangarigitan it manga ngifon kawa ta kaisog hanya. 55Dapat is Istiban, kawa ka Falad Maliyaw sawa hanya sadi wak dahonya, hanya nabantay has tongod, nalag in Diyos kayawaan, nalag yadin Hisos malindogan san Diyos balis sihon. 56Is Istiban iglwang, Yabay yabay, hoglag in Diyos banwanan maboklasan, hanggan Kanbali Taw, malindogan san Diyos balis sihon. 57Dapat ka manga taw nataklob it manga talinga, dayog dog in Istiban fwayong, naringgit wan. Ginya ta natarabangan natoklos in Istiban. 58Ta nagoyod hanya has sokayan banwa, nabintok hanggan wa nafahatay hanya. Ka manga nadog in Istiban hampang haraw, naloslos it manga balokas, nafamataw sas anahan akbang, kawas Sawlo. 59Ta nogbintok yapdin Istiban, is Istiban nandarangin, nalwang, Hisos, angko Fon, ha tanggapan wangko falad kati. 60Ginyas Istiban nanlingkohodan natawag marigon, Angko Fon, haw nangos fag idwag botang ista naibolon dwat hangko.

will be added

X\