NAIBOLON 5

1Dapat ay, sadik talsawa, da Ananiyas, da Safira, nafasali yadi wat daga ka sadi. 2Is Ananiyas nabohin kat sali hanggan is Safira nafaangay wan. Ginya madis Ananiyas nadisag kat sawad has manga Fandiya-Barita. 3Dapat is Pidro nafwayong han Ananiyas, Kana mayon haw nogtalinga in Satanas, kaarakitay ha bomohag has Falad Maliyaw? Kana ha nogbohin yapdi ka sali daga? 4Ha nodyapdi harag fasali, bohonwa awkin hyamo yapdi ka daga? Haw no nafasali wan, ka hyamo kawa kwarta, idwa aw? Kana mayon haw no gibolon yapdi kitonya? Idwa has taw, dapat han Diyos haw nogbohag. 5Is Ananiyas no nadog tonya fag hampang natay wa dagos, nakfo odi. Fagayo indala wa dahol iglag. 6Ka manga anahan nalindog, nasafot ka natay, nadiya has sokayan a, nalobgob. 7Manga tolok oras araw, it kadogayan, it babay inbangkad yadi, idwa ha fangayofan kitay it indogan natay wan. 8Is Safira nondasog, is Pidro naintaw hanya, nalwang, Fwayongan angko, ngatay hayo natanggap it sali hayo daga dahonya wa aw? Ka ina nasagot, Dahonya ngay. 9Dapat is Pidro nafwayong, Kana mayon hayo nagkasadiyan somolay kagfon intam it Falad? Fanlag ngay, ka manga taw ka nalobgob im indogan sawas sokayan, hanggan wa araw haw kasta lobgobon. 10Is Safira dagos wa nakfo san Pidro akbang, natay yadi wan. Ginya madi ka manga anahan no nasakbaw ya, nalag kitay is Safira mahatayan. Ta nadiya yadi wan, nalobgob hanya sat indogan akbang. 11In Diyos Tifonan sadi wak kayonya indala wa dahol dahol, hanggan fagayo ka nadog to fag manga bagay indala yadi wan. 12Ka manga Fandiya-Barita gibolon aywan fag manga falagon madolaw sasta faglagan. Fagayo kantiwala fagaba wagtifonan san Salomon Famahowayan. 13Dapat ka mangadyan tiwala kadala gaktom has mangan tiwala nyawa tagfaanod kitay fiya ista ogali. 14Dapat ka manga ama hanggan manga ina kagsyag hasagfon intam kaaywan wa kaaywan wan. 15Manga taw nadiya ka manga ha sagit has bilog dalan, nafwalid baba sagmak, kaarakitay is Pidro nogdalan sinya, ngadit anino fag omanino ka ha sagit. 16Aywan kandasog gis fakadogan banwa Hirosalim. Ta nadiya ka manga ha sagit hanggan ka manga labang nafahoriyan. Infiya wa fagayo fagayo. 17Dapat ka gorangon fag fagalan, hanggan it manga ofod sadik layonan manga Sadosiyo, kaingli wa dahol ka manga Fandiya-Barita. 18Yakanga ta nagamat was taw, nafaporiso basad banwa. 19Dapat basad yabi, in Diyos anghil sadi, naboklas ka fanahop porisowan, nataban ka manga Fandiya-Barita has sokayan, nalwang, 20Sogi, ham fag hawas Fanimbaan-Dahol, ham fag toltol has taw kawa has Bago fag Haboyagan. 21Ginya madi yabay, tantanog wan. Dayo yapdi kayawa, ka manga Fandiya-Barita hawas basad Fanimbaan-Dahol, natoltol has taw. Dapat ka gorangon fag fagalan hanggan it manga ofod nondasog araw, has akbang porisowan, ta nafatawag ka tifonan manga fagtahinan Hodyo fagayo sasta fanoltolan. Ginya madi ta nasogo kitay, famantay ka mangan poriso fafon, tabanan hastay. 22Dapat ka manga namantay idwa ha lagan taw sinya. Yakanga ta nwali wan. nafwayong, Idwa akwa sinya. 23No kitay di, kat fanahop maganitan mandi, ha bantay ya ngadi, dapat ay idwa ha taw sas basad. 24Kasta tahinan ka manga sondalo kagbantay sas Fanimbaan-Dahol, hanggan ka manga fagtahinan fagalan nangarisipon wan ta no nadog kitonya kitay, hada wa mayon ka manga Fandiya-Barita. 25Ginya madi handasog sadik taw igfwayong, Yatokitay maporisowan tonya, sawas basad Fanimbaan-Dahol, igtoltol ya nga wa ngap has taw. 26Ginya ka tahinan sondalo nafaofod it sakop tiba has Fanimbaan-Dahol. Nataban ka manga Fandiya-Barita, igfahowayon odi, maskin kadala ngandayo ka fakaaywanan bomintok hanya, hanya no mangisog has taw. 27Ta no nataban ka manga Fandiya-Barita, ta nafaatobangan hanya has fanoltolan manga Hodyo. Ka gorangon fagalan naintaw wa fiya fiya, 28igfwayong, Gwadi marigon hyami bando ha hayo kitay fag idwag toltol tonya fag taw it ngayan, dapat ham nafahaskat di ngap sadi wak dahonya Hirosalim, hanggan ham igbangdan yadi wa hyami it kahatayan. 29Dapat da Pidro, hanggan ka iba Fandiya-Barita nasagot, taglwang, Ka fiya hami imtanog yap han Diyos bago has manga taw. 30Intam manga hafofowan Diyos ka nafaboyag ya in Hisos ka hayo nafahatay, ham no nafasakbit ya ngadi hanya sas nafatimbangan hayo. 31Is Diyos nataban in Hisos ham tongod, han Diyos balis sihon, nafabali hanya intam Fagtahinan hanggan Famawi kaarakitay in Israil hasokfonan somoyo wan, hanggan is Diyos faliyam wan it manga naogali dwat. 32To fagayo fagayo hyami wa sadili mata lagan, hami hanggan ka Falad Maliyaw kan Diyos nadisag has manga katanog hanya. 33Dapat ka fanifonan Hodyo inhori wa dahol dahol igdog. Ta kasaya wagfahatay ka manga Fandiya-Barita. 34Dapat sadik ama Farisiyo, is Gamaliyal, kagfaadal in Mwisis togon, nalindog sasta fagbokngan fanifonan. Ta fagayo magalang fiya fiya hanya. Hanya nafwayong kitay, Fadoksonan yap ngalay to fag manga taw. 35Ginya nafwayong has taw, Manga ama taga Israil, isipan yap fiya fiya hayo bato ibolonon has nwa fag manga taw. 36Hyabi, idya dogay, is Tiyodas, inbangkad igfadaholon it sadili, nataban manga ofat ik daan ama. Dapat ta no nafahatay in Tiyodas, it manga ofod nalagyo lamang, idwa ha kahologan. 37Ginya madi, is Tiyodas no natay wan, is Hodas man, taga Galiliya, inbangkad dayog falista manga taw, hanya nataban aywan ogbot fag manga taw. Dapat is Hodas natay, hanggan it manga ofod nalagyo yadi. 38Yakanga, hogfwayong hayo kati, ham hawag mawat tonya fag manga taw, fabayaanan lamang sinya. It fakasayaon hanggan ibolonon no gi odis kapariho taw, imliyam yadi kito kas taw. 39Dapat to no gin Diyos, ham idwa syagan domaog, dapat kamlag aban ngandayo ham wa kaglaban in Diyos. Ka manga fagtahinan Hodyo nafaangay di. 40Ta no nafasakbaw ya ka manga Fandiya-Barita, ta nabakbak is taw, ginya tagbando kitay, Ham fag idwag fwayong domwag in Hisos ngayan has taw. Ginya madi ta nafalahaw ya. 41Ka manga Fandiya-Barita kasolong wan noglahaw gis fanoltolan manga Hodyo maskin is Diyos nafaangay kitay ta fag gagwanta wan, nyawa manga taw igyod hanya, kawa ta galwasi in Hisos. 42Sirang sirang sas Fanimbaan-Dahol, hanggan ha balay ha balay, tadwag logak igtoltol kawas Hisos kan Diyos-natogon-Famawi-hanggan-Gorangon.

will be added

X\