NAIBOLON 4

1Da Pidro da Hwan nogtoltol yapdi has manga taw, manga fagalanhan-Diyos hanggan wasta tahinan sondalo ka mangag bantay sas Fanimbaan-Dahol hanggan wa manga Sadosiyo indasog wa sinya. 2Ta kaisog wa dahol dahol has dowak Fandiya-Barita maskin tagfwayong kitay is Hisos inboyag ya, kagfaorongan kitay ha akwa ya haboyagan sas dayo kahatayan. 3Ta nagamat inda Pidro, ginya, kawa kayabi wan gis nanya, ta nafaporiso yapdi hanggan wansirang. 4Nyawa kitonya kaaywanon ka nanalinga inda Pidro toltol intiwala han Hisos, ngandayo gamtanan manga 5,000 gis fagonan ka manga ama kantiwala. 5Nonsirang wan, ka manga gorangon, ka manga fagtahinan sas banwa, hanggan ka mangag faadal Batasan Hodyo nanifonan sas Hirosalim. 6Hanggan wa da Anas sinya, ka gorangon fag fagalan-han-Diyos, da Kaifas, da Hwan, da Alihandro, hanggan ka gorangon fag fagalan, it manga kaiban fagayo sinya yadi wan. 7Ta nafalindog ka manga Fandiya-Barita sasta fagbokngan, ginya ta naintaw yadi handa Pidro kitay, Gindak kadonongan ham nabol tonya? Faktat ngayan ka hayo nasokfon ham no naibolon kitonya? 8Ginya madis Pidro, kawa ka Falad Maliyaw sa hanya sadi wak dahonya, nasagot, Ham ka manga gorangon hanggan manga fagtahinan sas banwa, 9no kadi has ama fihong, no kinday hami no natogbong hanya hanggan wanfiya, no tonya di ka hayo fagintawon hyami, 10ham fagayo istay, hanggan fagayo fagayo taga Israil, ham fag twa kitay, in Kiristo Hisos, taga Nasarit, it ngayan karigonan, ka hayo nafapako sas nafatimbangan hayo, dapat ay, is Diyos nafaboyag ya hanya, hanya ka nafasyagan to fag taw nalindog sa hayo faglagan, orongan wanfiya. 11To fag is Hisos, Ka hayo fagdayoon fag bato, ham ka kalig balay, Hanyan bali ka bato kag-ganit has tiba sadik dahonya balay. 12Is Kiristo Hisos lamang kagbawi manga taw, maskin, sadik baba daga, is Diyos idwa ha nadisag has taw iba ngayan kagbawi intam. 13Ka tifonan gorangon Hodyo intaka wagdog inda Pidro da Hwan maskin ta nahampang maslong has taw, labi wa ta no nadog kitay hanya basta odi taw, idwa ha nagadalan. Ta natwa wagdog kitay, maskin mangharaw inbali kitonyak madonong, kawa ta naofod in Hisos hyabi. 14Ginya madi, ta no nalag ka taw kanfiya malindogan sanda Pidro da Hwan akbang, ta kyabog it bato lwangon gis nanya. 15Yakanga ta nafadokson yapdi inda Pidro gis fanoltolan manga gorangon Hodyo. Ginya madi ta nangampangan yapdi. 16Ta nangarintawan, Kinda araw intam halimbawan hanya fag manga taw, maskin fagayo fag manga taw sas Hirosalim nadog kawasta naibolon madolaw, yakanga tam idwa syagan igfabohag ista fwayong. 17Dapat, kaarakitay to idwam barita domwag has iba taw, tam fatagak to fag manga ama kitay, ta fag idwag barita domwag to fag ngayan, nyawa haday. 18Ginya madi ta nafasakbaw ya inda Pidro. Taglibit wa hampang, Ham hawag fwayong, hawag faadal domwag no kawa han Hisos ngayan. 19Dapat da Pidro da Hwan nasagot, Ham wak gisip no sida ka fiya san Diyos faglagan, ngatay hami fag ha hayo no katanog, ngatay fag han Diyos. 20Idyadi wa fiya mi nodwa fadog ka hyami lagan hanggan ka hyami donggon. 21Ginya ta no nabando ya domwag, marigon man ka haraw, ta nafalfas wanda Pidro. Tadwa ha lagan halimbawan fadosa tonya fag dowak ama, maskin ka fakaaywanan igfasayagdog in Diyos kawasta lagan, 22maskin kasta nafafiya fag ama iglabi wa ofat ik safolok fangaraw it kagorangan. 23Ta no nafalfas wan inda Pidro da Hwan, da Pidro hawat manga fakilalaon, namwayong ka manga fagtahinan fagalan, hanggan manga fagtahinan sas banwa fwayong kitay, ta fag idwag barita domwag. 24Ta no nadog kitonya, ta gofodan sinya fagayo, igdarangin han Diyos. Taglwang, Hyami Fon, haw ka nahalig banwa, hanggan daga, hanggan dagat, hanggan fagayo fag manga bagay ka sinya. 25Haw danwa nafwayong gi yapdi hyami hafofowan ginan, gin Dabid, hyamo fangibolon, ka Maliyaw fag Falad no nafadonong hanya, noglwang kitay, Kana mayon ka manga Hintil no kaisog wa dahol dahol? Ka manga taw no gwas it bato ibolonon idwa ha kahologan? 26Ka manga gorangon sas baba daga igfatalaga wa kitay ta lomaban wan Kasta manga fagtahinan matifonan wan Kaarakitay lomaban han Diyos hanggan hat natogon-Famawi-hanggan-Gorangon. 27Maskin orongan wan da Hirodis da Pontiyo Pilato, hanggan ka manga Hintil, hanggan ka manga taga Israil sadi wak dahonya, ta nanifonan istay fag banwa, ta nalaban im Sogowan Maliyaw, is Hisos, ka hyamo nafatohoyan. 28Ta nafatonglos wa fagayo fag manga bagay ka hyamo nafwayong kitay fag im-anod wan. 29Ginya madi, hyami Fon, kati tagfadalag dog hyami. Ha nangos togbongan wa hyami, hyamo manga sogowan, kaarakitay mi bomarita ya marigon has taw hyamo hampang. 30Ha falogdayan yadim gamat kaarakitay mamafiya ka manga ha sagit. Haw fag faangay nangos mi omibolon ka manga falagon madolaw san Hisos ngayan, ka hyamo Maliyaw fag Sogowan. 31Ta nontabo wagdarangin, kasta nagtifonan fag balay inhawig. Maskin ka Maliyaw fag Falad sawas taw fagayo sadi wak dahonya, inrigon yasta fangayofan idwa ha madalag barita in Diyos hampang. 32Fagayo fagayo kantiwala, insadi it fangayofan hanggan wat isip. Nyawa faktaw, idwag sadili it manga botang, dapat nafaaraktoman di fagayo. 33Ka manga Fandiya-Barita ha kadonongan marigon ta nogfaorongan kitay, is Hisos intam Fon inboyag ya domwag. In Diyos malooy fag kahowayan inlag sas fagayo. 34Idwa ha taw korang it fanganon gis nanya, maskin ka maakwa nafasali ngatay it daga, ngatay it balay, 35ginya ta nadisag it sali has manga Fandiya-Barita. Ginya madi ka manga Fandiya-Barita nangorayan ha sadi ha sadi kaarakitay idwa komorang ista fanganon. 36Kitonya yadi kan Hosi naibolon. Is Hosi taga Sipri, gin Libi hasokfonan. Ka manga Fandiya-Barita nafangayan hanya is Birnabi, it kahologan, Is Matogbongon. 37Is Hosi nafasalit iyab, ginya nadisag it sali has manga Fandiya-Barita.

will be added

X\