NAIBOLON 3

1Sadi ginan da Pidro da Hwan hawas Fanimbaan-Dahol dayo myanit kalibaba, maskin gis nanya manga taw igdarangin fagaba sinya. 2Fagaba manga taw igboklid sadik ama kanfihong it bitis gi yapdit kasagayan. Sirang sirang tagfwalid hanya sas bilog sakbawan alad, kat ngayan, Maangay fag Sakbawan, kaarakitay hanya managad togbong gis manga taw kagsakbaw has basad Fanimbaan-Dahol. 3Ka ama fihong, no nalag inda Pidro da Hwan, dayo kasakbaw has basad alad Fanimbaan-Dahol, hanyag sagad wan. 4Yakanga ka dowa, da Pidro, nangolinganan hanya. Is Pidro iglwang kitay, Ha fag bantay hyami. 5Hanya nabantay ngay, gayfan ta ngandayo ha bato nga disagon hanya. 6Dapat is Pidro iglwang hanya, Hodwa ha pilak, hodwa yadi ha ginto, dapat aho ha akwa disagon iba ha hyamo, kakitay, san Kiristo Hisos ngayan, ka taga Nasarit, haw fag lomindog wa a, fag lomahaw wan. 7Is Pidro nagamit ka ama fihong sat balis sihon fag gamat a, nafalindog wan. It bitis dagos wanrigon hanggan it manga halisan. 8Hanya nalokso nalindog, ginya yabay igfabago waglahaw, igfatahin waglokso nogsakbaw has basad aladan Fanimbaan-Dahol. Nahin wanda Pidro a, masolong wagfasayagdog han Diyos. 9Fagayo fag manga taw ka sas Fanimbaan-Dahol gis nanya iglag ka ama noglahaw igfasayagdog in Diyos. 10Tandolaw wa dahol dahol maskin ta kilala kitay, to fag ama ka matokawan fagaba sas bilog Sakbawan Fiya Kabantay, sas alad Fanimbaan-Dahol, dapat ay, kati iglahaw, ogali mandi. 11Ka ama no matawidan yapdi inda Pidro da Hwan san Salomon bilog Famahowayan, manga taw nanhadalandanan wan nagobok no kana mayon ka sinya, maskin tandolaw wa dahol. 12Is Pidro no nalag ka manga taw gobok, igfwayong kiti, Manga taga Israil, kana ham no kadolaw to fag bagay? Kana mayon ham nogdoro hyami kitonya? Ham gayfan hami aw ka nafalahaw to fag ama hyami odi kadonongan, ngatay hyami odi kafiyan? 13Yatokitay, intam hafofowan, it Diyos, inda Abraham da Isaak da Hakob Diyos, ka nadisag dahol man has fagayo fag kangayanan han Hisos it sogowan. Dapat ham nafagamat hanya has manga ha kangayanan. Ham nadayo hanya san Pilato atobangan, nyawas Pilato danwa ha fangayofan fomalfas hanya. 14Ham nadayo ka Maliyaw hanggan ka Maslong, ham nasagad fag ka sadik taw famahatay taw ka malfas. 15Ham nafahatay di ngap kagdisag haboyagan, dapat ay, is Diyos nafaboyag ya hanya. Migfaorongan hyami wa sadili mata lagan. 16In Hisos lamang ngayan karigonan ka nafafiya to fag ama, kawa hanyag syag in Hisos. Kawa hanyag syag lamang in Hisos, hanyan fiya wa orongan kito ka hayo lagan fagayo kati. 17Manga fadwasay, ho twa kitay ham idwa natwagdog no kanat kahologan hayo naibolon han Hisos, nyawa ham, nyawa hayo manga gorangon, idwa yadi natwa. 18Dapat kawa ham nafahatay in Hisos, in-anod wan kan Diyos nafadog gis hyabi hyabi, git manga fangampang kawa kan Diyos-natogon-Famawi kitay, it ibolon idyam tabo hanya nodya domog mahori. 19Yakanga ham fag soyo wa kati. Fag kafwali ya han Diyos kaarakitay hanyadwag botang sat basad fangayofan hayo manga naogali dwat, 20fahoway yadi hayo manga fangayofan fagaba. Ginya madi aban, hanya somogo yadi kat nafatohoyan Famawi hanggan Gorangon kaarakitay ha hayo, kawas Hisos. 21Kati is Hisos fag sam tongod yapdi nodyan dasog gis nanya fag manga masohod, kitay ka manga bagay fagayo imbago wan kito kan Diyos nalwang lat manga maliyaw fag fangampang gi yapdis hyabi hyabi. 22Is Mwisis danwa nalwang kitay, Is Diyos, intam Fon ka fomili yadi aban sadi gi hayo, fabali hanyat fangampang kito yadingko. Ham fag talingat manga bato fwayongon fagayo ha hayo. 23Is Diyos domayo git sakop hanggan domwat nyawa faktaw kadwag talinga tonya fag fangampang aban. 24Fagayo fag manga fangampang hyabi, gin Samwil ginan, hanggan fagayo ka nanarosonan nahalili hanya, nafwayong yadi kawa has manga bagay kan-anod kati fag kasohodan. 25In Diyos manga natogon gona, it manga bato disagon lat manga fangampang danwa ha hayo, hanggan ham in-aktom yadi han Diyos taranggapan gi hayo hafofowan ginan, no nafwayong han Abraham, Gi hyamo hasokfonan aban, fagayo fagayo fag manga layonan taw sadik baba daga bomaya wan. 26Yakanga ha hayo bago bago is Diyos no nafatohoyan it Sogowan, no nasogo hanya kaarakitay ham bomaya wan, hanya nogtogbong hayo domayo hayo manga ogali dwat.

will be added

X\