NAIBOLON 28

1Mi no nalfas gis basad danom, mi nalahaw has bohid. Mi bago di natwa kitay tonya fag foyo dagat it ngayan Malta. 2Ka manga taga sinya tan-awa wa dahol dahol hyami. Maskin natoyongan wa dahol dahol, magnaw ya ngadi, ta nafagba afoy, naano wa fiya fiya hyami. 3Is Pablo igligaw ya ngadi hayo famagba. No nafagba has afoy kat lagan hayo, ha abyanon mangharaw inbangkad gis basad hayo. No kyanit afoy, nahoskos san Pablo boknga gamat, nahagat hanya. 4Ka manga taga sinya no nalag ka abyanon mahoskosan san Pablo boknga gamat, tagtoltolan ha sadi ha sadi, ta gasolop kitay, To fag ama, mangharaw, ha nafahatay taw. Hanyan bawi ongay gis basad dagat, dapat ka sas tongod idwag faangay kitay hanya fag boyagan yapdi. 5Dapat is Pablo nafadagdag lamang ka abyanon has basad afoy, idwa yadin kinday. 6Ka manga taw igdoro in Pablo, ta gayfan hanyam baga, ngatay makfo sadi odi ginan, matay wan. Ta no dogay wa madorowan, hanggan hanyadwan kinday, ta nafaoman it fangayofan, taglwang, To ngan wa ngap sadik diyos. 7Gis nanya fag masohod is Pobliyo ka fagtahinan sinya fag foyo dagat. It manga fangiyaban sinyas gobang dagat. Kawat fangayofan wa kitonya, hanya nafaoliyanan hyami sat balay manga tolok yabi. 8Natoon gis nanya kitay, in Pobliyo ama maigyanan kagnaw ya, gifot ya. Ginyas Pablo namantay hanya. Nontabo wagdarangin, is Pablo nafwalid it gamat has ha sagit, ginyan fiya wan. 9Kawa kitonya, ka tiba taw ka ha manga sagit igdasog wa ngay gis baliw gis baliw. Is Pablo nafafiya yadi tonya. 10Ta nagalang hyami, yakanga aywan ista natogbong hyami. Ginya mi no kalahaw wa aban, aywan ista nadisag ha hyami, nafahosto hyami manga sangkap fagayo has lahawan. 11Ginya madi, nonsagaya tolok magdanon, mi bago din-ginan ginya. Mi nasahay sadi yak sahayan gis banwa Alihandriya, ka danwa matarosanan sas faroman bagyo, igfasagaya yapdi abagat sinya, it ngayan, Da Kastor da Polok. 12Ginya madi mindagsa tolok sirang sas banwa Sirakosa. 13Ginya mi nadagos has baba dagat has banwa Rigyo. Nonbago marom, nabagyo ogbot gis balitangan, yakanga sas fadowa fag sirang, mindasog madali has banwa Potyoli 14Mi nalag manga fadwasay sinya. Taglwang kitay mi nangos fag domogay yapdi sinya sadik simba. Ginya madi mindasog has banwa Roma. 15Intam manga fadwasay sas Roma, no nadog kitay mi kaakbang wan, ta hawas fanaliyan Foro Apiyo, hanggan has Fandasogan Tolok Balay, kaarakitay tomagbo hyami. Is Pablo no nalag was taw, hanyag baya wa han Diyos, inrigon yat fangayofan. 16Ginya mi nondasog has basad banwa Roma, ta nafaangay kitay is Pablo fag lomag it sadili fagoliyanan fag balay, dapat fagaba ha bantay di sondalo. 17Nonsagaya tolok sirang, is Pablo nafatawag ka manga fagtahinan Hodyo kaarakitay ta manoltolan. Ta no matifonan wan, is Pablo iglwang, Angko manga kaiban Hodyo, no kitay di hodwa ha naibolon dwat iglaban intam manga iba, nyawa hantam manga ogali magorang. Dapat kapariho manga Hodyo nagamat angko sas Hirosalim. Ta nasombong has mangag bahala sas gobirno Roma. 18Nontabo angko hampangan hyabi, no kitay di hogdog ka gis gobirno Roma fomalfas wangko, maskin hodwa ha naibolon dwat ka fiya fadosaon kahatayan. 19Dapat ka manga Hodyo idwag faangay, yakanga, nyawa hodwa ha bato fagsombongon iglaban intam manga iba, hogpilit wagsyag has gorangon Roma. 20Kati aho magafosan kawa ha hanya, kan Israil manga hasokfonan fagfahasaon. Kawa kitonya hogsagad kitay tam fag mangampangan wan. 21Ka manga Hodyo nasagot, Midwa ha natanggap sorat gis Hodiya kawa ha hyamo. Nyawa gintam manga iba kagsabang hastay, tadwa ha nafadahit kitay haw sadik taw dwat. 22Nyawa kitonya mi kasaya domog im toltol maskin mi twa kitay nyawa siday fag banwanan manga taw igfwayong aywan fag manga bagay, igfadwat igdog tonya fag layonan taw it fakatiwalaon. 23Yakanga ta nafatohoyan sadik sirang kitay gis nanya aban ta manifonan. Nondasog gis nanya fag sirang, aywan kanbangkad han Pablo balay. Sadi wak sirangan is Pablo igtoltol has taw, igfaorongan kawa han Diyos sakop baliwa. No baliday in Pablo fagsyaganon, hanya nafatiwala manga taw han Hisos, nogtoltol gin Mwisis manga togon hanggan gin Diyos manga fangampang nasorat. 24Ha akwan tiwala in Pablo nafwayong, ha akwadwan tiwala. 25Yakanga tadwan sadi, ta nanarowayan lamang. Is Pablo iglwang yapdi kiti fag manga hampang, Orongan wan ka Maliyaw fag Falad fwayong gin Isayas, in Diyos fangampang, no nafwayong ha hayo manga hafofowan, 26Haw fag hawas manga taw, haw fag fwayong hanya, Nyawa ham igtalinga wagtalinga wan, ham idwa tomwagdog, Nyawa ham igbantay wagbantay wan, ham idwa lomag. 27Maskin ista manga fangayofan idwag sarom it kahologan, Tagfabongkohon wan it manga talinga, Tagfotihan wat manga mata, Maskin ta dayo wag lag, Dayo wag dog, Dayo tomwagdog, Dayo yadi kafwali hangko kaarakitay hogfafiya is taw. 28Is Pablo igdogang yat hampang, iglwang, Ham fag twa kitay to fag barita gin Diyos, no kinday tam nombawi, fadog yadi aban has manga Hintil, hanggan manga Hintil tomalinga wa fiya. 29Is Pablo nontabo wagtoltol, ka manga Hodyo nalahaw wan. Ta mahogod wagdaraogan. 30Is Pablo nabanwanan sas banwa Roma sat nagtangdanan fag balay manga dowak fangaraw. Nafasakbaw fagayo kagsabang hanya. 31Nogfaadal kawa han Diyos sakop baliwa, hanggan kawa han Kiristo Hisos kagfon intam, idwas fyaloman, idwa yadi ha nabando hanya.

will be added

X\