NAIBOLON 27

1Nontohoyan kitay hami somahay baba dagat, hawas layonan daga Italya, ta nafabantay in Pablo hanggan ka tibak manga poriso han Holyo. Is Holyo sadik fagtahinan sas tifonan sondalo Roma, tagngayan, In Sisar tifonan. 2Mi nasahay ha sadik sahayan baba dagat ka gis banwa Adramitiyo, ka kaginan wan hawas manga fangadagsaan sas sakop Asya. Ginya yabay min-ginan wan. Is Aristarko gis banwa Tisalonika, sakop Masidonya, naofod hyami. 3No bago marom mi natorosan sas banwa Sidon. Is Holyo mahoway han Pablo, nafaangay di nyawa manabang hat manga fakilalaon kaarakitay ta tomogbong hanya. 4Ginya madi min-ginan ya ngawan ginya. Maskin ka bagyo igtagbo wa hyami, mi nabaybay has salogan myanit baliwa foyo dagat Sipri, has faroman bagyo bangan. 5Ginya mi no nadalan has masohod sakop Silisya hanggan sakop Panfilya, mindagsa has Mira, sadik banwa dahol sas sakop Lisya. 6Ka fagtahinan sondalo nalag sinya sadi yak sahayan igdalan gis banwa Alihandriya, hawas layonan daga Italya, yakanga nafasahay hyami sinya. 7Hyami sahayan kabayan kaoson, magomo wa dahol dahol iglahaw, aywan ik sirang baba dagat. Minhori wan bagon dasog has masohod banwa Ginido. Gis masohod Ginido midwa nasyagan nadagos has fakadaholan dagat, maskin ka bagyo igtagbo wa hyami. Yakanga mi nabaybay ya ngawan, has salogan myanit baliwa foyo dagat Kirita sas faroman bagyo. Mi nadalan sas fakaogbotan danom sas masohod banwa Salmon. 8Mi naagwanta wagbaybay las bahalan bahalan kaarakitay mimdasog ha sadik forowan balay kasta fagngayanon, Fiya fag dagsaan, akbang has banwa Lasya. 9Kawa dogay hyami sahayan itfagonan, insagaya wa fanlahawon, madala wa kasahay has baba dagat, maskin ista tandaan insagaya wan ka sirang Fanohodan ka manga Hodyo nodwa kwan hanon. Yakangas Pablo igfatagak is taw, 10iglwang, Manga taw ham, tam no lomahaw kati, mahori aban intam sahayan hanggan it sohad, nyawa ngap ka tam, madala wan. 11Dapat ka fagtahinan sondalo natalinga man hasagfon sahayan hanggan hasag falahaw. Idwan tiwala in Pablo fwayong. 12Kawadwa fiya igdogayan sinya fag fandagsaan sahayan dayo abagat, ka fakaaywanan iglwang kitay, fiya man tam no lomahaw ya, tagfahasa kitay fag masog nangos has banwa Finisi, ka sadik fandagsaan sahayan sas foyo dagat Kirita sas sangdayan myanit baliwa. Yakanga sinya fiya di nogdogayan no abagat yapdi. 13Ginya madi ka bagyo nogfarayfayan ogbot gis balitangan baliwa, ta gayfan fiya wa nga nogfalahaw it sahayan has baba dagat. Yakanga ta nafasakbaw ka famondo sahayan, ta naaroyan has akbang foyo dagat Kirita. 14Dapat idya dogay araw, sadi odi ginan, ka gorangon fag bagyo amihan indasog wan gis foyo dagat baliwa. 15Ka bagyo nasirig dahol dahol hasta boknga sahayan baba dagat. Ka sahayan idwa syagan iglaban ka bagyo, yakanga mi kadiya odi. 16Hami no nafafarom ha sadik foyo dagat ogbot, it ngayan Kalawda, nyawa mahori wa dahol, mi nafasahay ka baloto ogbot ogbot has basad sahayan ka dahol. 17No sawas basad sahayan, ta nahalawid wan ka ogbot fag baloto has dahol fag sahayan, dahol yadi fag lobid. Ginya mi noglahaw ya, ta nafalibaba ka layag maskin ta kadala kitay ka sahayan ngandayo imgarod ha sayo bato, yakanga migfalimos odi. 18Nonsirang wan, kawa ka bagyo igfatowang towang yapdi hyami sahayan, tagfabago wa gokas ka sahayan manga diya. 19No domwag sirang, ta naokas yadi ka sahayan manga sangkap tiba. 20Kawa fagaba malinyabo, dogay midwa nalag myanit no sirang, midwa yadi nalag manga fanggasan no yabi, hanggan ka marigon fag bagyo idwa kasiwang. Yakanga mi gayfan mi fawa malfas, isyay wan. 21Maskin dogay wan ka sas basad sahayan idwa ha nahwan hanon, is Pablo nalindog a, nalwang, Ham angko manga ofod, ham nangos no natalinga dingko, tam idwa nalahaw gis foyo dagat Kirita. Yato araw tam idwa kitoy basad mahori. 22Dapat ay, angko fagfwayongon ha hayo kati kito, Fag marigon hayo manga fangayofan maskin tam fagayo idwam kinday, nonman ka sahayan imdwat wan. 23Maskin is Diyos kangko fagsimbaon hanggan fakatanogon nafalag hangko sadik anghil sayabi. 24Ka anghil nalwang hangko, Pablo, haw fag idwa kadala, matohoyanan haw lomindog yapdi san Sisar atobangan. Kawa haw istay yadi sas sahayan, is Diyos bomawi yadim manga ofod. 25No kitonya, tam fagayo fag marigon intam manga fangayofan. Maskin hogsyag in Diyos kitay im-anod wat fwayong. 26Dapat ay, intam sahayan imtoktok yapdi ha sadik foyo dagat. 27Safolo ha ofat ik yabi ka bagyo nogfadiya diya hyami baba dagat Adriyatiko. Ginya madi araw, no kaboknga wa yabi, ka manga fangibolon sas sahayan natwa wagdog kitay ta kaakbang has fakalibabawan. 28Ta nafasohod lobid kat kaabasadan dagat. Taglag dowak safolok dofa it kaabasadan. Mi no naoson ya ogbot, taglag safolo odi ha limak dofa. 29Kawa ta kadala wa kitay imtoktok ha sayo bato, ta nafadagdag ofat ik famondo sahayan sas ginanan. Tagdarangin wa kitay, fag imsirang wa nangos. 30Basad yapdi marom, ka manga fangibolon tiba kasaya lomihos is taw. Ta natonton ha basad danom kasta nafasahay baloto itfagonan. No kalag di, ya hono, tagfatonton di famondo sahayan sas fagonan, ya mangharaw, ta kalihos wan. 31Dapat is Pablo nalwang has fagtahinan hanggan has manga sondalo, To fag manga taw no lomihos di, tam idwam bawi. 32Yakanga ka manga sondalo nalifong ka siyok a, nafadagdag lamang kasta fagfatontonon baloto ogbot. 33No kasirang wan, is Pablo igfaaronganon has taw fagayo kitay, ta fakwan hanon. Nalwang kitay, Safolo ha ofat ik sirang ham idwa ha nahwan. Ham kalibang odi galibitan igfanaya no kadasog. 34Tam fakwan wan. Tam nodwa mangwan, tam ara idwa malfas. Gwadi tam idwam kinday. 35Is Pablo nalwang di nga kitonya, nabangkad tinapay, nafasalamat han Diyos sasta faglagan fagayo. Ginya nafaarogbotan ka tinapay. Yabay, igfabago kwan. 36Ka manga taw insayag lag, ta nangwan yadi. 37Hami fagayo, 276 taw. 38Mi no napsog wan, ta naokas ha basad dagat ka tirigo kaarakitay ka sahayan imhagan wan. 39No mayawa ogbot araw, ta nalag sadik foyo dagat, dapat tadwa kilala no kana fag banwanan tonya. Taglag sas bahalan ha onay ogbot. Ista fangayofan ta fadagsa sinya ka sahayan nomtwa di. 40Yakanga ta nabogloy ka lobid gis manga famondo, naobon wa sinya basad dagat. Ta nalohas yadi wa ka tahod gis famalahaw kagfahaslong. Ginya ta nafaabwat ya ka layag sahayan sas fagonan baliwa, kaarakitay ka bagyo domiya ka sahayan has bahalan, hanyas onay nangos. 41Dapat ka sahayan intansak has fakalibabawan has fagonan baliwa, it baliw inlobgob, yakanga idwa kabol. Dapat ay, balis habot baliwa, kamin wa kadwat maskin ka taob myasa wa marigon nogbakbak. 42Ka manga sondalo fangayofan ta fahatay lamang ka manga poriso fagayo kaarakitay idwa ha omabang, idwa malfas. 43Dapat ka fagtahinan manga sondalo kasayag bawi in Pablo. Yakanga hanya nabando ka manga sondalo kitay, fag idwag fahatay ka manga poriso. Ginya madi, hanya nalwang has manga taw ka madonong gabang, Ham fag lokso ha basad dagat. 44Nalwang has tiba, Fag bol tabla, manga lifong hayo gis sahayan, ginya fag sahay sinya. Yakanga hami fagayo indasog has bahalan dagat.

will be added

X\