NAIBOLON 22

1Manga magorang, hanggan manga fadwasay, ham fag talinga angko bato lwangon ha hayo kati, aho nogfatohoyan ha hayo angko manga ogali. 2Ka fakaaywanan no nadog kitay is Pablo kampang sas fangampangan Hibriyo, labi wa tadwa gawang. Ginyas Pablo nafadagos it toltol. 3Aho sadik Hodyo kansagaya sas banwa Tarso, sakop Silisya, dapat aho istay sas banwa Hirosalim kandahol. Ho nangadal san Gamaliyal. Hanya mahogod wagfatonglos in Diyos manga natogon ogali kito hayo fagayo kati. 4Hyabi hogfahoriyan yadi hanggan wagfahatay ka mangag fasakop to fag Ogali Bago. Ho nafagafos hanggan wa nafaporiso is taw, nyawa ina, nyawa ama. 5Ka gorangon fag fagalanhan-Diyos hanggan ka tifonan manga fagtahinan Hodyo fagayo twag faorongan kitay kitonya angko ibolon hyabi. Hyabi ta nadisag angko manga sorat has manga Hodyo sas banwa Damasko, yakanga ahon bangkad hanya kaarakitay gomamat sinya ka katanog to fag Ogali Bago, tomaban magafosan tonya fag manga taw has Hirosalim kaarakitay fadosa. 6Gis nanya hyabi, aho noglahaw yapdi, no kaboknga wa sirang, aho kaakbang wa kadasog has banwa Damasko. Sadi odi ginan nayawa gim tongod sangko ligongan, masilaw wa dahol dahol. 7Honlohob has baba daga. Ginya ho nadog sadik hasnog ka nalwang hangko kitay, Sawlo, Sawlo, kana mayon haw nogfahoriyan angko? 8Hogsagot, Faktaw haw kagfon angko? Hanyag lwang, Ahos Hisos, ka gis Nasarit, aho kam fagfahoriyon. 9Yabay angko manga ofod nalag madi ngap ka yawa, dapat tadwa nadog ka hasnog it fakatignan hangko. 10Aho naintaw yadi, Angko Fon, kana ara angko bato ibolonon? Hanyag lwang ya domwag, Haw fag lindog wa a, fag hawas basad banwa Damasko, ginya ta bago di fomwayong hyamo no kana kam ibolonon fagayo. 11Honbota wan maskin masilaw wa dahol dahol tonya fag yawa, yakanga angko manga ofod nagamit odingko has basad banwa Damasko. 12Ha sadik ama sas Damasko, kawas Ananiyas. Hanya orongan wa matanogon in Diyos, katanog yadintam manga Batasan Hodyo. Fagayo fag manga Hodyo ka mabanwanan sinyag galang hanya. 13Is Ananiyas nanabang gingko, nalindog sangko akbang, ginyag lwang hangko, Fadwasay Sawlo, kati im mata fag iglag ya. Gis nanya yadi angko mata iglag ya, ogali wan a, ho nalag in Ananiyas. 14Hanyag lwang ya kitay, Intam manga magorang it Diyos nafili hyamo kaarakitay haw tomwa no kana kat fasadan, haw lomag it Maliyaw fag Sogowan hanggan haw domog yadit hasnog, 15maskin haw imbali famaorongan hanya, kaarakitay fomwayong has fagayo fag manga taw kam mata lagan, hanggan kam talinga donggon. 16Yabay kati, kana yapdim fagfanayaon, ha gayfan? Fag kabangon, fag syag han Hisos ngayan kati, fag fatogna wa hyamo, ginyam manga naogali dwat imliyam wan. 17Ginya madi aho nonfwali hastay has Hirosalim, aho nogdarangin sas basad Fanimbaan-Dahol, is Diyos ha nafalag hangko. 18Ho nalag kagfon intam, hanyag lwang hangko, Kalibang, haw fag lahaw wa gistay gis Hirosalim maskin ka manga taw istay idwa tomalinga hyamo faorongan kawa hangko. 19Hogsagot kitay, Angko Fon, ta fadi wadtwa kitay itfagonan aho kagfaporiso gis manga fanimbaan Hodyo ka mangan tiwala ha hyamo, hanggan wagfabakbak. 20Hanggan hyabi ta no nafahatay in Istiban, hyamo famaorongan sadi, aho sinya yadi, igfaangay ista ibolon, igbantay ista manga rotay ka mangag fahatay in Istiban. 21Ginya madi kagfon intam nalwang hangko kitay, Haw fag lahaw wan maskin ho somogo hyamo has ayayo has manga Hintil ka bomarita. 22Balinya yapdi ka manga taw igtalinga in Pablo toltol. Dapat ta no nadog kitay is Pablo gwas has manga Hintil baliwa, ta nanarawagan kitay, Fahatayan wa tyamo fag taw. Idwa fiya hanya nomboyag. 23Ta nodwag fagomon igharinggitan iglafog manga fogis daga has bagyo, igloslos it manga balokas, igdwatan odi maskin kahori wa dahol dahol ista manga fangayofan, 24ka gorangon manga sondalo nasogo kitay fasakbawan in Pablo ha basad balay sondalo, fag bakbak hanya kaarakitay igpilit igfasagot, tomwa no kana mayon ka manga Hodyo igharinggitan kitonya no kahorin Pablo. 25Dapat ta no nagafos wan Pablo, kaarakitay bomakbak hanya, is Pablo nahampang has fagtahinan sondalo, nalwang kitay, Ka ogali Roma igfaangay awkin kitay nyawa sadik taw ha kasoratan gis Roma, fiya digbakbak hanya, ham gayfan, nyawa idyan tohoyan gis hampangan? 26Ka fagtahinan sondalo nadog di nga kitonya, nadagos wa has gorangon sondalo, nalwang, Kinda odi tonya? Ya mangharaw, tonya fag taw ha kasoratan gis Roma. 27Yakanga ka gorangon sondalo hawan Pablo, naintaw hanya, Haw awkin orongan wa ha kasoratan gis Roma? Is Pablo iglwang. Ala. 28Ka gorangon sondalo nalwang, Dahol angko nabayad kaarakitay ha kasoratan gis Roma. Dapat is Pablo nalwang, Aho danwa ha kasoratan kitonya gingko kasagayan ginan. 29Ka manga haraw nangos mangintaw in Pablo, madali wa nalahaw ginya. Ka sondalo gorangon indala yadi wan kawa nafagafos in Pablo nyawa hanya ha kasoratan gis Roma. 30Ka gorangon sondalo kasaya tomwa no kana ka manga Hodyo sombong ka dwat san Pablo. Yakanga nonbago marom, ka gorangon sondalo nafahampangan ka manga fagtahinan fagalan-han-Diyos hanggan ka sadik tifonan fagtahinan Hodyo fagayo. Yabay ta no nalohas in Pablo gafos, ta nafadokson hanya hanggan nafabangkad has taw.

will be added

X\