NAIBOLON 21

1Nontabo wagtogon is taw, mi dagos wa nalahaw baba dagat hawas foyo dagat Kos. Nonbago marom, mindasog sas foyo dagat Rodas. Ginya madi mi hawas banwa Patara. 2Sas Patara mi natahod sadi yak sahayan kagdifay has sakop Finisya, yakanga mi nasahay sinya, ginyan ginan wan. 3Mi nadalan sas masohod foyo dagat Sipri, kabantay balis wala baliwa. Ginya madi migdagos wan hanggan wandasog has sakop Siriya. Mindagsa sas banwa Tiro maskin ta nafadokson it manga diya sinya. 4Mi nasayak in Hisos manga katogbong sinya. Mi no nalag, mi nadogay sinya fitok sirang. Ka Maliyaw fag Falad nafaayfan in Hisos manga katogbong, tagbando in Pablo kitay, Fag idwa has Hirosalim. 5Nonsagaya sadik simba, mi nalahaw ya ginya, nafadagos wa hyami lahawan. Fagayo, hanggan wat manga babay, manga anak, nafangolo hyami hanggan wa nadasog sas dayo banwa Tiro. Nondasog sas gobang dagat, mi fagayo nanlingkohodan a, nandarangin, hanggan nanarogonan ha sadi ha sadi. 6Ginya mi nasahay ya ngawan hanggan ka manga taw ka nafangolo hyami nwali wan. 7Gis banwa Tiro mi nalahaw ya has baba dagat hanggan wandasog has banwa Tolimaida. Mi sadi wak sirangan nanabang manga fadwasay sinya. 8Ginya madi nonsirang mi nalahaw ya ngawan baba dagat hanggan mindagsa wan sas banwa Sisariya. Mi nigya san Filipi balay. Is Filipi sadi kagbarita, sadi yadi kasta nafili hyabi sas fito sas Hirosalim. 9It manga anak dayaga ofat sonson wan Diyos manga fangampang. 10Nonsagaya fihin ik sirang, ha akwan dasog gis Hodiya in Diyos fangampang sadi ya, it ngayan is Agabo. 11Hanya nanabang hyami, nabol in Pablo fagyahos, nagafos it sadili bitis, manga gamat, ginyag lwang, Ka Maliyaw fag Falad nafwayong kitay, Kitonya yadi ka manga Hodyo sas Hirosalim gomafos kagfon to fag fagyahos, ginya ta fagamat hanya has manga Hintil. 12Mi no nadog kitonya, migfwayong wagfwayong, hanggan ka taga sinya iglwang yadi han Pablo kitay, Gwadi haw fag idwa has Hirosalim. 13Is Pablog lwang. Kana ham no goraw hanggan igfagomo angko fangayofan? Maskin ho galwasi in Hisos kagfon intam, ho talaga wa fagafos angko, nyawa hanggan wa matay sas Hirosalim, no tonya wat fasadan. 14Mi nodwa nasyagan nabando, mi fawa ha naawang domwag hanya baliwa, miglwang, No kindawan kagfon intam it fasadan, fag kitonya wan. 15Nonsagaya fihin ik sirang, mi galimbotangan wan, mi hawas Hirosalim. 16In Hisos manga katogbong tiba gis banwa Sisariya nahin hyami, nafangolo hyami han Manason balay maskin mi sinya wak migya. Is Manason taga Sipri, dogay wantiwala han Hisos. 17Mi nondasog sas Hirosalim, intam manga fadwasay nabaya waglag hyami. 18No bago marom mi nanabang in Santyago. Sinya yadi ka manga fagtahinan fagayo san Diyos Tifonan. 19Nonsagaya kampang ogbot magalang has taw, igbaya, is Pablo nafwayong igsadig sadi ka manga bagay in Diyos naibolon has manga Hintil kawas Pablo nogbarita. 20Ta no nadog kitonya, tagfasayagdog in Diyos. Dapat ta nalwang han Pablo, Fadwasay Pablo, haw fadi wadtwa no kayodawak libo fag manga Hodyo kawa mangag syag in Hisos, mahogod yapdi no katanog in Mwisis togon. 21Ha akwa nafadahit has manga Hodyo istay kitay, haw igfwayong has manga Hodyo kan-aktom sas manga banwanan Hintil kitay, Ta fag domayo in Mwisis manga togon. Haw, hono, iglwang fag idwag fatoli ista manga anak, fag idwa yadi katanog ka ogali Hodyo. 22Kinda araw intam halimbawan? Matohoyanan ta domog kitay haw indasog wastay kati. 23Fag kito nangos kam ibolonon. Istay ha ofat ik ama Hodyo ha taranggapan has Fanimbaan-Dahol. 24Ha tabanan wa nangos ka ofat ik ama, haw fag fadagos ka ogali igfalinay kagfatonglos intam Batasan Hodyo. Fag haw wa kagsakop ista gastos. Ginya madi ta falinay it manga alfoyo. No kitonya fagayo tomwa kitay ista fadahit ya mangharaw idwa orongan. Haw katanog yapdi ka Batasan Hodyo. 25No kadi has manga Hintil kantiwala, mi nafadiya sorat no kinday ka hyami fangayofan. Ta fag idwa kwan kasta manga nadisag has manga tolad faglohodon. Fag idwa kwan folot hayopan, hanggan ka manga hayopan kantagbong. Ta fag idwa yadig fabayowan. 26Yakanga nonbago marom, is Pablo naofod ka manga ama, nafadagos ka ogali igfalinay, hanggan nasakbaw has basad Fanimbaan-Dahol. Nafadog has taw no ginahin imtabo ta nogfatonglos ka ogali nogfalinay kito, hanggan no ginahin hanya no domisag ka manga bato disagon kagsakop ka manga ama ofat. 27No kaakbang wa kasagaya tonya fag fitok sirang, is Pablo nasakbaw has basad Fanimbaan-Dahol. Tiba Hodyo sinya, manga taga Asya, ka nalag in Pablo it fagonan, nafasognod has fakaaywanan, naogwan in Pablo, 28natawag ya ngadi kitay, Manga kapariho Hodyo, kalibang, togbongan hyami. To fag taw, nyawa haday kandasog, nogfaadal has taw, iglaban has tifonan Israil, iglaban ka Batasan Hodyo, iglaban has Fanimbaan-Dahol. Bondi tonya, hanya nataban yadi manga Girigo has basad Fanimbaan-Dahol, igsagaya wa ogali istay sas basad balay kantohoyan han Diyos. 29Taglwang kitonya maskin ta nalag is Pablo no gayayag basad banwa, ha ofod is Torofimo, sadik Hintil, taga Ifiso. Ista odi asolop kitay ngandayo tonyan Pablo ofod has basad aladan Fanimbaan-Dahol. 30Sadi wak dahonya banwa gagran. Ka manga taw igsarosonan wa kadasog, ngadi ginday, nagamat in Pablo, nagoyod hanya has dayo aladan Fanimbaan, ginya ta natahop wa madali ka sakbawan. 31Ista fangayofan ta fahatay wa nangos in Pablo. Dapat ha nafadahit hasta gorangon tifonan sondalo taga Roma kitay, sadi wak dahonya Hirosalim gagran wa hono. 32Ka gorangon sondalo nataban madali manga fagtahinan sondalo hanggan ista manga sakop sondalo. Ta nanhadalandanan hasta fag tifonan manga taw. Kagdaog in Pablo, no nalag ka manga fagtahinan sondalo, hanggan ista manga sakop kadasog, tantohas wagbakbak hanya. 33Ginya ka gorangon sondalo naakbang, nagamat in Pablo, nafagafos dowak kadina hanya. Ginya naintaw is taw, Fakta to fag taw? Kanat kasalanan maskin ham igdaog hanya? 34Bokod bokod ista faglwangon ta nogtarawagan, yakanga ka gorangon sondalo idwa twagdog no kana kasta fagbangdanon in Pablo kawa ta gagran wan. Yakanga ka gorangon sondalo nasogo kitay tabanan wan Pablo has basad balay sondalo. 35Nondasog sas bilog talangtang, ka manga sondalo nasafat wan Pablo maskin ka fakaaywanan fag manga taw kaisog wa dahol dahol hanya. 36Ta goyan yapdi, igtawag marigon, Fahatayan wa tyamo fag taw. 37Ta no kaakbang wa kafasakbaw in Pablo basad balay sondalo, is Pablog lwang hasta gorangon, Fiya di aw aho no homampang ha hyamo? Ka gorangon sondalo indolaw wan, nasagot, Ya mangharaw, haw madonong kampang fangampangan Girigo. 38No kitonya, haw bonwa ka taga Ihipto ka nataban 4,000 ama, has basad fakahyabogan, kaarakitay lomaban has gobirno itfagonan. 39Is Pablo nasagot, Aho sadik Hodyo kansagaya sas banwa Tarso, sakop Silisya, hanggan ta kilala wangko sinya fag banwa kanbantog. Hogsagad hyamo nangos, no fiya di, aho homampang yapdi has manga taw. 40Ka gorangon sondalo nafaangay wan. Yakangas Pablo nalindog sas bilog alitang bato, sas bahalan fantaw, nafaaman has manga taw. Ta nodwa gawang, is Pablo nalwang sas sanglitan Hibriyo,

will be added

X\