NAIBOLON 20

1Ka manga taw nontabo wa gagran, is Pablo nafatawag ya in Hisos manga katogbong, nafarigon ya ista manga fangayofan. Ginya madi natogon is taw, nalahaw has sakop Masidonya. 2Nasabang ha banwa ha banwa, nafaadal ya domwag in Hisos manga katogbong. Nafadagos wat lahawan hanggan wandasog has sakop Girisya. 3Is Pablo nadogay yapdi sinya tolok magdanon. Ginya hanya nangos somahay has baba dagat, kafwali ya has sakop Siriya. Dapat no nadog kitay ha manga Hodyo goyonan wa fahatay hanya boknga dalan, it fangayofan hanya fag kafwali ya, domalan sas sakop Masidonya no goli. 4Is Sopatir in Piro anak gis banwa Biriya naofod in Pablo hanggan da Aristarko da Sigondo gis banwa Tisalonika, is Gayo gis banwa Darbi, da Timotiyo, da Tikiko da Torofimo gis sakop Asya. 5Ta nagona in Pablo, nafanaya hyami sas banwa Toroas. 6Nonsagaya wa ka Fanohodan Tinapay Mayangfis, hami nasahay las dagat gis banwa Filipos. Sas falima fag sirang mindagsa sas banwa Toroas. Mi nadogay yapdi sinya fitok sirang. 7Ka sirang gona basad simba, hami no matifonan kaarakitay manayowan kwan, igfaarogbotan tinapay, is Pablo natoltol has taw hanggan wa boknga yabi maskin no bago marom lomahaw wan. 8Aywan fag salong sas tongod fag salogan sa hyami nagtifonan. 9Is Iyotiko, sadik anahan, matokawan sas baba gaha. Ginya madi, kawas Pablo igtoltol yapdi ayo ayo, is Iyotiko intongka wan, intoyog wa fiya fiya. Yakanga indagdag gis fatolo fag salogan has daga gis baba gaha. Mahatayan wan ta nogfoyot hanya. 10Dapat is Pablo nadokson wan, nafohot hanya. Iglwang has taw, Ham fag idwa galibitan, hanya boyagan di. 11Is Pablo insakbaw ya, igfaarogbotan tinapay, igsayowan has taw, kwan wan. Ginya nafadagos yapdit toltol has taw hanggan wa kayawa, ginya madi bago di nalahaw. 12Ista manga fangayofan inhoway wa orongan ta no nafaoli ya ka anahan hat sadili balay boyagan di. 13Ginya madi, mi nasahay baba dagat, hawas banwa Ason. In Pablo togon kitay mi fag sinya wa kagtagbo hanya maskin it fangayofan hanya lomahaw sas nakamayan sas bahalan dagat. 14Mi no nangablangan ya sas Ason, is Pablo nasahay, ginya mi nangoyogan has banwa Mitilini. 15Mi nalahaw ginya sas baba dagat. No bago marom mindasog sas masohod foyo dagat Kiyo. No domwag sirang mindagsa sas foyo dagat Samos. Nondasog sadi yak sirang, mindagsa sas banwa Milito. 16Is Pablo iglwang kitay, Tam fag somagaya yapdi sas banwa Ifiso kaarakitay tam idwam libang sas sakop Asya maskin is Pablo gatangon it lahawan. It fakasayaon, no somyagan di, fag sawas Hirosalim sas sirang Pintikostis. 17Yakangas Pablo nafatawag has Milito ka manga fagtahinan gis Tifonan sas banwa Ifiso. 18Ta nondasog, is Pablo iglwang, Ham fadi wadtwa no kana kangko ogali aho nogdogayan sa hayo gingko bago dasog sas sakop Asya. 19Ahodwag faabwaton angko fangayofan no gibolon intam Fon ibolon. Nyawa ho goraw wa gagwanta aywan fag mahori kagsolay angko, kawa manga Hodyo goyonan wa kaisog angko. 20Aho nogtoltol hanggan igfaadal hayo, nyawa sawasta fagdogan fagayo, nyawa ha hayo manga balay, hodwa kaya igfadog ha hayo nyawa kana fag bagay kagtogbong hayo. 21Hogfwayong nyawa has manga Hodyo, nyawa has manga Girigo, kitay tam fag domayo intam manga ogali dwat, fag kafwali han Diyos, fag syag hantam Fon is Hisos. 22Kati, kawa ka Maliyaw fag Falad kagtaban angko, ho hawas Hirosalim. Hodwa twa no kana ka madalanan sangko sinya. 23Nonman, nyawa haday fag banwa aho nogsabang, ka Maliyaw fag Falad igfatohoyan kitay ahom poriso aban sas Hirosalim, hanggan ta fahoriyan yadingko sinya. 24Dapat no kadi angko haboyagan idwa ha kinday sangko. Fag imtonglos di ngay angko lahawan. Fag imtabo in Hisos intam Fon disag hangko faibolonon, kawag fadog ka Fiya fag Barita, in Diyos malooy fag kahowayan. 25Aho nogfaadal ha hayo kawa han Diyos sakop baliwa, tam gofodan yapdi. Dapat gis kati ginan ho twa wa kitay ham idwa lomag domwag angko. 26Yakanga hoglwang kati bonwa aho ka hayo sogaton nyawa faktaw sa hayo no hawas kadwatan, 27maskin ho natoltol wa fiya fiya ha hayo in Diyos kafangayofanan hantam, sadik dahonya. 28Dapat ham fag matagahan hayo sadili hanggan hayo manga sakop ka Maliyaw fag Falad nafaano hayo. Ham fag gano fiya fiya in Diyos Tifonan, maskin it sadili Anak it kahatayan ka nabawi tonya. 29Ho twa wa kitay angko ginanan aban, ha akwa manga taw, bilang manga ido maisog gi sayo basad talon, idwa fadaogon domwat ka Tifonan. 30Gi yadi hayo aban hamlag manga taw kampang bohagon kaarakitay in Hisos manga katogbong imdiya wa hanya maskin kasayag fatalang manga taw, nomtwa di. 31Yakanga ham fag matagahan, fag tohod kitay tolok fangaraw ho galowan wa kaawa hayo aho nogfaadal hayo, yabi sirang. 32kati hogfaano hayo han Diyos, hanggan hat hampang kagfatohoyan it malooy fag kahowayan. Hanya ka fasyagan hayo, hanya ka twag disag ha hayo fagayo fag kafiyan kat nafatalaga has fagayo kat nafabokod hat sadili. 33Nyawa ginahin hodwa ha fagayfanon hayo pilak, hayo ginto, hayo manga rotay, nyawa gafo. 34Ham twa wa kitay kangko fangaboyagon, hanggan angko manga ofod fangaboyagon, gi wangko sadili nakayayan. 35Nyawa ginahin hogfalag kitay ka kito kangko nakayayan ka fiya, kaarakitay tam ha togbongon has manga magomo it habilogan. Tam fag tohod in Hisos kagfon intam it fwayong kitay, Kagdisag bomaya man kagtanggap. 36Nontabo wa kampang kitonya, is Pablo nalingkohodan, ginya ta nandarangin igsohodan. 37Fagayo ta nangoraw wan, nafohot, naayok in Pablo. 38Kasta fakarongkoton dahol kawa tagdog kitay is Pablo iglwang, Ham aba idwa lomag domwag angko. Ginya ta nafangolo in Pablo has sahayan sas baba dagat.

will be added

X\