NAIBOLON 19

1Is Apolos no sayapdis banwa Korinto, is Pablo dan wa nalahaw has moyod fag dalan hanggan wandasog sas banwa Ifiso. Is Pablo nalag mangan tiwala sinya. 2Is Pablo naintaw has taw, Ham awkin natanggap ka Maliyaw fag Falad ham nontiwala? Taglwang, Idyapdi, midyapdi ha donggon kitay ha akwa Maliyaw fag Falad. 3Is Pablo naintaw, No kitonya, kinday ham nontogna? Tagsagot, Kitos Hwan nogfatogna manga taw hyabi. 4Is Pablo iglwang, Is Hwan nogfatogna manga taw kawa igfatohoyan kitay manga taw igsoyo wan. Is Hwan iglwang has manga taga Israil hyabi, Fag is Hisos ka goyan sangko ginanan ka hayo fakatiwalaon. 5Ta no nadog, tantogna yadi san Hisos intam Fon ngayan. 6Ginyas Pablo nogfwalid it gamat hasta baba alfoyo, ka Maliyaw fag Falad nadokson has taw, ta nahampang manga sanglitan madolaw, hanggan nafadog has taw in Diyos fagfwayongon. 7Ngandayo manga safolo ha dowak ama ka natanggap ka Maliyaw fag Falad kitonya. 8Tolok magdanon is Pablo fagaba has fanimbaan Hodyo, igfaaronganon ka sinya fag manga taw, idwa ha mabalaw nogfwayong ka han Diyos sakop baliwa. 9Dapat ha akwa yapdig farigon it sadili fangayofan, igdayo has katiwala, igfadwat yapdig dog has fakaaywanan ka Ogali Bago. Yakangas Pablo nalin wa gis fanimbaan nogfaadal, nataban yadi ka mangan tiwala, hawan Tirano famaadalan, igfaadal sinya sirang sirang. 10Dowak fangaraw is Pablo nogfaadal sinya, yakanga fagayo fag manga taw, nyawa Hodyo, nyawa Girigo, ka mabanwanan sas sakop Asya, nadog kagfon intam it hampang. 11Gis nanya fag manga masohod, is Diyos nafasyagan in Pablo gibolon ka bonwa faglagon fag manga madolaw. 12Yakanga nyawa taong ogbot ogbot, nyawa sangbaw in Pablo sangkap, ta no nadiya has manga ha sagit, tanfiya wan. Ka manga labang nalin yadi wan gis manga ha sagit. 13Ha akwa sinya manga Hodyo malahawan malahawan igfaalin yadi manga labang. Tagsolay yadi golit in Hisos, kagfon intam it ngayan, nogfaalin manga labang. Ta nalwang kitay, San Hisos ngayan, kan Pablo fagfaadalon, hogsogo hayo, Ham fag galin wan gis taw. 14In Iskiba manga anak ama fito ka tiba ka gibolon kitonya. Is Iskiba Hodyo, sadik fagtahinan fagalan-han-Diyos. 15Dapat ay, ka labang nasagot has taw, iglwang kitay, Ho kilala in Hisos hanggan in Pablo, dapat fakta fag manga taw ham? 16Ginya madi ka ama ka ha labang yapdi naogwan is taw, nadaog ya, nafalobas ya. Yakanga baranon ya malobasan ya ta no nalagyo ginya fag balay. 17Ka mabanwanan sas banwa Ifiso, nyawa Hodyo, nyawa Girigo, ta nadog wa fagayo, tandala wa dahol dahol. Dapat is Hisos, kagfon intam it ngayan labi wanbantog. 18Aywan kantiwala igsoyo, igbaya wan, taglwang, Mi gibolon yadi kitonya. 19Gis nanya ka mangan tiwala ka ha manga botang yapdi nabangkad manga botang famasaan, nasonog sasta faglagan. Ta no nafahalga kasta nasonog fag manga botang, it halga 50,000 kwarta pilak gamtanan. 20Yakanga ka manga taw kantiwala intam Fon hampang kaayo hanggan karigon. 21Ginya madis Pablo naayfan kitay hanya fag domalan nangos has sakop Masidonya hanggan sakop Akaya bago di has banwa Hirosalim aban. Is Pablog lwang, Aho no giwas Hirosalim aban, ho fag domasog wan has banwa Roma. 22Ginya madis Pablo nafagona ka dowak katogbong da Timotiyo da Irasto has sakop Masidonya. Dapat is Pablo in-goyan yapdi ngalay sas sakop Asya. 23Gis nanya yadi fag manga masohod, ka manga taw sinyas Ifiso, gagran wan maskin ta kadwat igdog ka Ogali Bago gin Hisos. 24Ha sadik fandayan pilak sinya, is Dimitriyo, ka kalig manga balay garogbot garogbot, in Diyana manga oliyanan. Is Diyana sadik tolad ina ista fagsimbaon. Dahol inda Dimitriyo fagfakinabangon giwat manga nahalig. 25Is Dimitriyo nafatifon it manga sogowan hanggan ka tiba taw ka kitonya yadit fangaboyagon, nalwang kitay, Manga taw ham, ham fadi wadtwa kitay tam ha fakinabang dahol gintam manga fakaligon. 26Ham fadi wadag lag, ham fadi wadag dog to fag is Pablo, it fagfaadalon. Hanyag lwang kitay no ka odi nahalig taw faglohodon, bonwa orongan diyos. Yakanga aywan it nafatiwala hanggan nafatanog, bondi istay is banwa Ifiso, hanggan sadi wak dahonya sakop Asya. 27Mahori aban kamlag ginya fag adal, bondi kitay ta yomod intam manga fakaligon kantam fangaboyagon, intam faglohodon ina yadi, is Diyana, it oliyanan imbali idwa mahalga, hanggan nyawas Diyana, ka manga taga Asya, hanggan sadi wak baba daga faglohodon kati, aban idwa ha gomalang hanya domwag. 28Ka manga taw nadog di ngay kitonya, tanhorit manga fangayofan, ta nanarawagan kitay, Kafiyaon, kafiyaon is Diyana, kantam manga taga Ifiso faglohodon. 29Yakanga sadi wak dahonya banwa nangagran. Manga taw nagoyod inda Gayo da Aristarko, manga taga Masidonya, kan Pablo manga ofod sas lahawan, nagoyod hasta fanifonan fag balay basad banwa. 30No kitay di, nos Pablo di, kasayag falag hanya has fakaaywanan, dapat ka manga fadwasay idwag faangay. 31Ka tiba fag manga gorangon sas Asya, kan Pablo fakilalaon, nasogo yadi manga sogowan, nabando marigon kitay, is Pablo fag idwa has balay fanifonan. 32Ka fakaaywanan fag manga taw mawang wa dahol gis nanya. Ka tibat faglwangon sadik bagay, ka tiba bokod wan it faglwangon maskin ka fakaaywanan idwa twa no kana mayon ta nogtifonan igtifonan sinya. 33Ka tiba gayfan ka sinya is Alihandro ka fagfonan fagagraon maskin ka Hodyo nasyag hanya. Yakangas Alihandro nafaaman is taw kitay ta fag idwa gawang gawang kaarakitay hanya homampang fiya fiya has taw. 34Dapat ta no nahilala kitay, Hodyo di mangharaw is Alihandro, ta nasohodan natawag dowak oras, taglwang, Kafiyaon kafiyaon is Diyana, kantam manga taga Ifiso faglohodon. 35No dogay wa araw, ka fagtahinan banwa nabando is taw, idwa nafaawang domwag, nalwang kitay, Ham manga taga Ifiso, faktaw kadwa twa kitay ka banwa Ifiso ka gano in Diyana manga oliyanan, ham gayfan? Tam ka gano yadi ka bato mahalga kandagdag gis banwa gim tongod. 36Idwa ha fabohag to fag manga bagay gin Diyana, yakanga ham fag kahoway wan hayo manga fangayofan, ham fag idwa gadaliyan. 37Bonwa kitay ka hayo nataban fag manga taw ignahaw gin Diyana balay. Bonwa yadi kitay tagyod intam faglohodon ina, is Diyana. 38Labi was Dimitriyo hanggan it manga ofod fandayan, no ha fagsombongon ngadi haday fag taw, ka manga fangabaya tomalinga wan, hanggan ha manga gorangon. Ham fag hanya wan nogfwayong, ngadi faktaw sa hayo. 39Dapat ham no ha faglwangon ya tiba, fiya di nomtabo sa sadik hampangan ka maangay hantam ogaliyon. 40Ngandayo ka mangag bahala sas Roma bomangdan intam kitay, tam kagfaagran kati maskin idwa ha nagfonan hayo fagagraon, idwa yadi ha kahologan ngadi ogbot ogbot. 41No nalwang di nga kitonya, ka fagtahinan banwa nafaoli wa ka manga taw.

will be added

X\