NAIBOLON 18

1Ginya madis Pablo nalahaw wa gis banwa Atinas, hawas banwa Korinto. 2Nondasog wa sinya, hanya nalag in Akila, sadik Hodyo taga Ponto, ka ngalay yapdin dasog gis sakop Italya, hanggan wat babay, is Pirisila, kawas Kalawdyo nasogo ka manga Hodyo kitay fag galin gis banwa Roma. 3Is Pablo hawanda Akila, ginya nadogayan sasta balay maskin ta kalig balay rotay kito yadin Pablo, yakangas Pablo naibolon yadi sinya. 4Fagaba sas Sirang Kafahowayan, is Pablo igfatoltolan sas fanimbaan Hodyo, igfaaronganon has manga Hodyo hanggan manga Girigo kitay ta fag katiwala wa nangos in Hisos. 5Da Silas da Timotiyo nondasog has banwa Korinto gis sakop Masidonya, is Pablo igbarita lamang hanggan igfaorongan has manga Hodyo kitay kan Diyos-natogon-Famawi hanggan Gorangon is Hisos wan. 6Dapat ka manga Hodyo tiba nogsongat, igyod ya ngadin Pablo. Is Pablo igfagfag ka fogis git boknga rotay, igfatagak is taw kitay, Ham bahala wa gisip no ham wa kadwan tiwala, ham has fadosaan wan. Hodwa ha sagoton. Gis kati ho hawas manga Hintil ho no bomarita. 7Ginya madis Pablo nalin wan, hawan Tisyo Hosto balay, ka sadik Hintil kagsimba in Diyos. In Tisyo balay sas dayo fanimbaan Hodyo. 8Is Kirispo, kagbahala sas fanimbaan Hodyo gis nanya, intiwala hasagfon intam, hanggan wat manga ofod sas balay. Aywan fag manga taga Korinto tiba no nadog in Pablo toltol intiwala wan, hanggan intogna wan. 9Ginya madi sadi ginan basad yabi, is Diyos ha nafalag madolaw han Pablo, igfwayong hanya, Ha fag idwa kadala. Fag fadagos haw nogfaadal istay, fag idwag tohas igbarita, 10maskin aho sawa hyamo. Hadwam kinday maskin aywan kambali angko fag manga taw istay fag banwa. 11Is Pablo nadogay yapdi sadik fangaraw hagboknga sas Korinto, igfaadal has taw in Diyos hampang. 12Dapat ay, aban, nos Galyon wa kanbali gobirnador sas sakop Akaya, ka manga Hodyo nagkasadiyan ta gomamat in Pablo, tomaban has fangabaya. 13Tagfasogbo in Pablo kitay, Is Pablo igfayayom manga taw igsimba han Diyos sa sadik halgan kadwa maangay has manga Batasan Hodyo. 14In Pablo fangayofan homampang yap han Galyon, dapat is Galyon iglwang has taw, Ham fag toltol yap gis nyamo. No hayo sombong orongan wa kasalanan dahol, ngatay iglaban has ogali Roma, ho tomalinga wan. 15Dapat hayo donggon nosta odi manga hampang, manga ngayan, ka odi hayo manga ogali Hodyo, ho bonwa hayo fangabaya no kitonya di. Ham fag bahala man di. 16Is Galyon nasogo nga inda Pablo gis balay fangabaya. 17Ginya ka manga Hodyo nagamat in Sostinis kagbahala sas fanimbaan Hodyo. Ta nabakbak hanya sas sokayan balay fangabaya, dapat is Galyon idwag bati ista naibolon. 18Ginya madis Pablo nadogay yapdi ogbot sas banwa Korinto. Ginya no nanogon yapdi has manga fadwasay, inlahaw wan. Nondasog sas Kinkiriya sas gobang dagat, is Pablo namalokfog it bok, kawat togonan han Diyos intabo wan. Ginya nasahay has baba dagat, kaginan has sakop Siriya. Da Pirisila da Akila, talsawa, nahoyog wan Pablo. 19Nondasog wa sas banwa Ifiso, is Pablo nafamataw inda Pirisila da Akila sinya. Ginyas Pablo hawas fanimbaan Hodyo, nafatoltolan has manga taw. 20Taglwang han Pablo, Haw nangos fag domogay yapdistay, dapat is Pablo idwag faangay is taw, 21natogon odi, iglwang, Aho aba kabangkad ya non Diyos wa kafangayofanan. Ginya nalahaw ya gis Ifiso, nasahay ya ngawan has baba dagat. 22Nondagsa sas banwa Sisariya, is Pablo nalahaw ya has banwa Hirosalim, namadog has Tifonan kantiwala sinya, ginya bago di nadagos has banwa Antiyokya sas sakop Siriya. 23Ginya madis Pablo nadogay yapdi ogbot sinya, ginya nalahaw ya ngay. Nasabang ha banwanan ha banwanan sas sakop Galasya hanggan Firigya, igfarigon intam Fon manga katogbong fagayo sinya. 24Yabay, ha akwa sadik ama Hodyo, is Apolos, nadasog has banwa Ifiso, it kasagayan hyabi, sas banwa Alihandiriya. Is Apolos nogtoltol fiya wa kadog, hanggan aywan yadit fakatwawon gin Diyos sorat. 25Hanya indonong ka Ogali Bago gintam Fon, mahogod hanggan maslong yadi nogfaadal kawa han Hisos, dapat kito yadin Hwan yapdi nogfaadal hasagfatogna baliwa. 26Is Apolos idwag fahoyangon igtoltol sas fanimbaan Hodyo. Da Pirisila da Akila talsawa, no nadog in Apolos toltol, ta nataban wa hanya hat balay, nafwayong wa fiya fiya ka manga bagay ka bonyan Apolos fakatwawon sas Ogali Bago gin Diyos. 27Ginya madis Apolos no kasaya domifay has sakop Akaya, ka manga fadwasay nafaangay wan. Ta nafadiya yadi sorat has manga fadwasay sinya, ta nasorat kitay, Ham fag igbaya in Apolos hanya nomdasog ha hayo. Nondasog sinya, dahol in Apolos togbong has mangam tiwala kawa in Diyos malooy fag kahowayan sawa hanya. 28Ka manga Hodyo idwa ha halimbawan lomaban in Apolos kawa fakaoronganan wan hanggan marigon nogtoltol gis Kasoratan kitay kan Diyos-natogon-Famawi is Hisos wan.

will be added

X\