NAIBOLON 17

1Ginya madi ta no nadalan sas banwa Amfipolis hanggan banwa Apolonya, tandasog has banwa Tisalonika. Sinya fag banwa ka manga Hodyo ha fanimbaan. 2Tolok Sirang Kafahowayan, kawat ogali kitonya, is Pablo nasakbaw sinya, hanggan natoltol has taw. 3Igfaorongan kitay ka Kasoratan danwag lwang kawan Diyos-natogon-Famawi it ibolon idyam tabo hanya nodwa omagwanta basad mahori hanggan imboyag ya, iglwang yadi, To fag is Hisos kangko fagfwayongon ha hayo, tonya wa nga kan Diyos-natogon-Famawi. 4Manga fihin ik Hodyo katiwala in Pablo fwayong, gofod yadi inda Pablo da Silas, hanggan wa manga Girigo kaaywanon ka danwag simba han Diyos, hanggan manga ina ayo, kasta manga fakilalaon, gofod yabay inda Pablo. 5Dapat ka manga fagtahinan Hodyo kaingli inda Pablo. Ta nafatifon ka manga ama malamangan odi basad manga karsada, nafaagran fagayo fag manga taw sas falhang manga balay, boknga banwa. Ginya idwag fasakbawon, nasakbaw wa dagos in Hason balay, igsayak inda Pablo da Silas kaarakitay falag has fakaaywanan. 6Ta nodwa nalag inda Pablo sinya, ta nagoyod in Hason, hanggan ka tibak fadwasay has atobangan mangag talinga hampangan sas banwa. Ginya ta naringgit kitay, Ka manga taw kagfaagran nyawa haday kandasog, indasog yadistay. 7Is Hason nafasakbaw tonya fag manga taw hat basad balay. Ta fagayo iglaban ka gorangon taga Roma manga togon, maskin taglwang ha sadi yak gorangon, hono, it ngayan is Hisos. 8Ka fakaaywanan fag manga taw sas banwa hanggan ka mangag talinga hampangan galibitan it fangayofan no nadog kitonya. 9Ginya madi ka manga gorangon no nafabayad ginda Hason it fangafang wan Pablo, ta nafalfas yadi inda Hason. 10Yakanga no yabi wan, ka manga fadwasay nasogo inda Pablo da Silas has banwa Biriya. Ta nondasog sinya, ta nasakbaw has basad fanimbaan Hodyo. 11Ka manga Hodyo istay sas Biriya fiya hampangon, bondi kito ka manga taga Tisalonika. Ta kasaya wagdog is Pablo nogtoltol. Sirang sirang tagligaw ka Kasoratan kat afo, ngatay orongan in Pablo manga fwayong. 12Kawa kitonya, aywan fag manga Hodyo kantiwala sinya, hanggan aywan yadi fag manga Girigo, manga ama hanggan manga ina, kasta manga fakilalaon fiya fiya sas banwa Biriya. 13Dapat ay, ka manga Hodyo sas banwa Tisalonika no nadog kitay da Pablo igtoltol in Diyos hampang sas Biriya yadi, ta naoyan hanya, nafasognod ka fakaaywanan fag manga taga Biriya, nafaagran is taw. 14Ginya madi yabay, ka manga fadwasay intiwala nasogo wa dagos in Pablo has gobang dagat. Dapat da Silas da Timotiyo in-goyan yapdi sas Biriya. 15Ka manga nafangolo in Pablo naofod wa hanya balis banwa Atinas. Ta nonfwali ya has banwa Biriya, ta nafadahit in Pablo togon handa Silas da Timotiyo kitay, ta fag idwa dogay no goyan hanya. 16No mafanayan yapdi inda Silas da Timotiyo sas banwa Atinas, is Pablo inbalaw waglag kaaywanon fag manga tolad faglohodon sas basad banwa. 17Yakangas Pablo igtoltol has manga Hodyo sasta basad fanimbaan, hanggan has manga Hintil kagsimba yadi han Diyos sinya. Ginya madis Pablo natoltol yadis taw sirang sirang nyawa faktaw kat lagan sas faktaban manga balay. 18Ha akwa sinya manga Ipikoriyo hanggan manga Istoyko, mamga taw matoltolon, iglaban in Pablo. Tibag yod hanya, taglwang, Kana ngap araw to fag taw kat fwayongon hantam, igfabali hanya madonong? Ka tibag lwang, No kadog di to fag taw bokod fagfakatiwalaon it fagfaadalon. Taglwang kitonya maskin is Pablo nabarita kawa han Hisos, hanggan no kinday tam nomboyag ya aban. 19Ta nataban in Pablo has fanoltolan, ta nogngayan Ariyopago, ginya taglwang, Mi kasaya tomwa no kana tonya fag adal bago im fagfwayongon ha hyami. 20Mi bago nadog kati kam fagfwayongon ha hyami madolaw, yakanga mi kasaya tomwa no kanat kahologan. 21Maskin ta gintaw kitonya, ka manga taga banwa Atinas hanggan ka mangan aktom sinya gis iba banwanan, idwa ha fakamolon, gobok odi has manga taw, igtalinga igtalinga odi, igtoltolan nyawa kanat donggon fag manga bagay madolaw. 22Yakangas Pablo nalindog sasta atobangan, sas fanoltolan Ariyopago, nalwang kitay, Ham manga taga Atinas, hoglag hayo manga fangayofan mahogod has iba iba fag manga fakatiwalaon. 23Maskin aho no gayayag basad banwa, aho nogbantay hayo manga tolad faglohodon, ho ha lagan sadik danglayan ha sorat kitay, To intohoyan ha sadik faglohodon midya kilala. Ka hayo faglohodon nyawa ham idya kilala, tonya wan kangko fagfwayongon ha hayo. 24Is Diyos wa ka nahalig sadik dahonya intam daga, hanggan fagayo fag manga bagay sinya, hanggan hanya wa kagfon ka banwa hanggan ka daga, yakanga hanyadwa maoliyanan sasta manga nahalig fanimbaan. 25Bonwa kitay ka manga taw ha fagtogbongon han Diyos, maskin hanya idwa ha korang, nyawa kana. Yatokitay, is Diyos man kagdisag haboyagan, ipsaw, hanggan fagayo fag manga bagay has taw. 26Gi di sadik taw is Diyos no nahalig fagayo fag manga layonan taw kaarakitay bomanwanan istay is baba daga. Is Diyos kagfatohoyan no ginahin ka manga layonan taw nomrigon hanggan no siday fiya fiya ista sakop banwanan. 27Is Diyos naibolon kitonya kaarakitay manga taw somayak hanya, ngandayo ta lomag hanya, ta no galingawan. Ka orongan wan is Diyos idwa ayayo gintam fagayo, 28maskin Intam haboyagan giwa hanya, hanya yadi kagfahimot intam, hanggan igdisag fangayofan. Kito yadi ka hayo mangag fasangay tiba noglwang, Tam wa nga kat manga anak. 29Kawa tam in Diyos wa manga anak, tam fag idwa gayfan is Diyos bilang odi tolad ginto, ngatay pilak, ngatay bato, tonya fagayo ista odi naayfan kitay fag kitonya, ista odi gamat nahalig. 30Dogay wa fag manga fangaraw is Diyos idwag bati kitay manga taw idwa kilala hanya, dapat kati hanyag fwayong has fagayo fag manga taw, nyawa hadat banwanan, ta fag somoyo wan, fag domayo it manga ogali dwat, 31maskin is Diyos iglwang kitay, gis nanya fag sirang aban hanya mamatohoyan has taw, sadik baba daga, it fadosaan, sas fakafiyan wa fiya fiya, kawan Diyos nafili fag ama ka mamatohoyan tonya. Is Diyos nafatwagdog has fagayo kitay, tonya wan kat nafili fag ama no nafaboyag ya hanya gis kahatayan. 32Ta no nadog kitay is Pablo gwas kawa ha haboyagan sas dayo kahatayan, tibag yod odi, dapat tibag lwang, Aban, fag sadi ya ginan haw no fomwayong hyami kawa hanya baliwa. 33Ginya yabay is Pablo nalahaw gis fanoltolan. 34Ha akwa yadi tibak ama natahin hanya, intiwala wan. Insadi is Diyonisyo, ka sadi gis tifonan kagbahala sas fanoltolan Ariyopago, hanggan sadik ina is Damaris, ha akwa yadi tiba.

will be added

X\