NAIBOLON 16

1Da Pablo hawas banwa Darbi hanggan banwa Listra. Ya mangharaw sinya ha akwa yadin Hisos katogbong sadi, kawas Timotiyo. In Timotiyo ina intiwala yadi wan, sadik Hodyo, dapat it ama sadik Girigo. 2Fagayo ka mangan tiwala sas Listra hanggan sas Ikonyo nafaorongan kitay in Timotiyo ogali fiya. 3Is Pablo kasayag taban in Timotiyo, yakanga ta natoli hanya maskin fagayo fag manga Hodyo sinya fag manga banwa natwa wa kitay it ama Girigo. 4Nyawa siday fag banwa kanda Pablo nagsabangan, ta nafwayong has mangan tiwala ka manga Fandiya-Barita, hanggan manga fagtahinan san Diyos Tifonan sas Hirosalim it nagkasadiyan manga togon. Ta nafwayong yadi kitay fag katanog tonya fag manga togon. 5Yakanga yabay, ka manga Tifonan fagayo inbali marigon ta no katiwala. Sirang sirang ha kadogang san Diyos manga Tifonan manga taw. 6Da Pablo nadalan has fagbokngan manga sakop Firigya hanggan sakop Galasya maskin ka Maliyaw fag Falad idyag faangay kitay ta fag bomarita has sakop Asya. 7Ta nondasog has bahalan sakop Misya, ta gayfan ta hawas sakop Bitinya, dapat in Hisos Falad idya nafaangay. 8Yakanga ta natolas di sas sakop Misya, yakanga hawas lwad has banwa Toroas. 9Gis nanya fag yabi, is Pablo ha lagan gin Diyos sadik bagay madolaw. Hanya ha lagan sadik ama taga sakop Masidonya malindogan, igsagad kitay, Ham nangos fag hawastay has difay, has Masidonya, togbongan hyami. 10Yakanga nonsagaya kan Pablo lagan, mi nangalimbotangan wa dagos, maskin mi natwa kitay, is Diyos igfatawag hyami kaarakitay tomoltol ka Fiya fag Barita has sakop Masidonya. 11Gis banwa Toroas hyami sahayan nadagos has baba dagat has foyo dagat Samotrasya. No marom marom wan, mi nasahay ya baba dagat, hawas banwa Niyapolis. 12Ginya fag banwa mi nalahaw baba daga has banwa Filipos. Ka banwa Filipos sadik banwa dahol sas sakop Masidonya, ka mangag bahala sinya gis sakop Roma. Mi nadogay ogbot sinya. 13No Sirang wa Kafahowayan, mi nalahaw has dayo banwa, ha sadik foyo sas gobang safa. Mi gayfan ngandayo sinya ka manga Hodyo nogtifonan igdarangin. Mintokaw sinya a, migtoltol has manga ina ka matifonan sinya. 14Ka sadik ina ka sinya, kawas Lidya, taga banwa Tiyatira, iglako manga rotay masding, madamol. Is Lidyag simba han Diyos. Kagfon intam nafatwagdog sat basad fangayofan, yakangas Lidya intiwala in Pablo toltol. 15Is Lidya hanggan wat manga ofod sas balay, nontogna wan, is Lidyag lwang ha hyami kitay, Ham noglag kitay, aho orongan wantiwala hasagfon intam, ham fag sawa hyamik migya. Naaronganon nogtaban hyami hat balay. Maskin ngay midwa nadayo. 16Sadi ginan mi no haya ngawas fandaranginan, sadik dayaga, ista nasali sogowan, natagbo hyami. Ha labang kagbahala hanya, kagfasyagan hanyag pinto ista madalanan aban. Ka mangag fon tonya fag dayaga iglag dahol fag fakinabang ginya fag dayaga, kawa nogpinto is taw, tagtangdan hasagfon ka dayaga. 17Ka dayaga goyan yadi goyan yadi hyami da Pablo, igtawag kiti, To fag manga taw in Diyos, ka Abwat man has Fagayo Fagayo, it manga sogowan. Tagfadog ha hayo no kinday ham nombawi. 18Is Pablo kahori wagdog maskin sirang sirang fagaba wa kitonya. Is Pablo nasayango has dayaga, ginya nalwang has labang, Hogsogo hyamo san Kiristo Hisos ngayan, haw fag galin wan gis nyamo fag dayaga. Yabay, ka labang dagos wa nalin. 19Dapat ay, ka mangag fon tonya fag dayaga no nalag di ngay tadwa ha fagfakinabangon ginya fag dayaga, ta natoklos, nagamat inda Pablo da Silas, nagoyod has falhang manga balay has fagbokngan banwa, nataban has manga fagtahinan sas banwa. 20Ta no nataban inda Pablo has manga gorangon taga Roma, kagtalinga hampangan, taglwang, To fag manga ama manga Hodyo kagfaagran manga taw istay fag banwa. 21It fagfaadalon iglaban hantam manga ogali taga Roma. Idwa fiya tam nogtanggap, idwa fiya tam no katanog ista manga adal hantam. 22Ka manga taw fagayo nangoyonan gisog inda Pablo. Ka mangag talinga hampangan nalanit inda Pablo manga balokas, ginya ta nafabakbak manga sondalo has taw. 23Ka manga sondalo nontabo wagbakbak inda Pablo, ta nafaporiso wa hanya, nafabantay fiya fiya has bantay. 24Yakanga, kagbantay nataban is taw has fakabokngan balay porisowan. Ta nabinggas yadi inda Pablo manga bitis. 25Dapat araw, no kaboknga wa yabi, da Pablo da Silas igdarangin, garambahanan yadi han Diyos. Ka tiba poriso sinya matalingan odi. 26Ginya madi sadi odi ginan, nalinog marigon, kanga kitay ka fagrigonan torok porisowan inbolang wan. Fagayo fag manga sakbawan porisowan dagos wanboklas, ista manga gafos kadina fagayo inlohas wan. 27Ka bantay nonfolaw, nalag di nga kitay ka manga sakbawan porisowan inboklas wan, hanya madali wanbangon. Nagonos wa dagos it talibong. Hanya ganong wa fahatay it sadili maskin hanya gayfan ka manga poriso nalfas wan. 28Dapat ay, is Pablo natawag marigon, Haw fag idwag tobok hyamo, mi fagayo istay di. 29Kagbantay nanagad salong a, nadalandan has basad porisowan, karokog waglingkohodan handa Pablo da Silas akbang. 30Ginya nataban inda Pablo has sokayan, iglwang kitay, Manga ama, kana kin ka fiya angko ibolonon kaarakitay ahom bawi? 31Taglwang, Haw fag katiwala han Hisos kagfon intam, ginya madi haw imbawi wan, haw hanggan im talanahan. 32Da Pablo natoltol kagfon intam it hampang has bantay hanggan has fagayo fag manga taw ka sat balay. 33Gis nanya yadi fag basad yabi, ka bantay nafyad inda Pablo manga baran. Ka bantay hanggan it manga ofod fagayo sas balay nafatogna wa dagos. 34Ginya madi ka bantay porisowan nataban inda Pablo hat sadili balay, nandisag hanon. Ka bantay hanggan it talanahan igbaya wa dahol maskin ta katiwala han Diyos. 35Nonbago wa marom, ka manga gorangon sas banwa nasogo manga sondalo, iglwang kitay, Falfasan wa tyamo fag dowak ama. 36Kagbantay nafadahit kitonya handa Pablo, iglwang, Ka manga gorangon sas banwa iglwang kitay, Falfasan wa hayo. Yabay ham fag lahaw wa a, fag mahoway wa hayo manga fangayofan. 37Dapat ay, is Pablog lwang has manga sondalo, Gwadi ta nafabakbak hyami sasta faglagan, nyawa tadwa nafadalan las hampangan, nyawa mi ha kasoratan kitay hami bilang wa yadi taga Roma, hanggan tagporiso wa hyami. Ginya madi mafyaloman odi ta nogfalahaw hyami kati. Idwam himo. Fag ka mandi manga gorangon ka kabangkad hastay, ka fomalfas hyami. 38Ka manga sondalo nafadahit has mangag talinga hampangan kan Pablo nafwayong. Yakanga tandala wan ta no nadog di nga kitay, da Pablo da Silas bilang wa yadi manga taga Roma. 39Yakanga ka manga gorangon banwa hanya wan, nasoyo handa Pablo. Ta nataban inda Pablo has sokayan, ginya madi nalwang yadi kitay, Ham nangos fag lahaw wa gistay fag banwa, no fiya di. 40Ginya madi da Pablo da Silas indokson di ngay gis porisowan, ta nadagos wa han Lidya balay. Ta no natahod manga fadwasay sinya, ta natogon has taw kitay ta fag karigon no katiwala. Ginya madi ka dowak ama nalahaw ya.

will be added

X\