NAIBOLON 15

1Dapat ay, ha manga fihin ik taw nadasog has banwa Antiyokya, sas sakop Siriya, gis sakop Hodiya. Tagfaadal has manga fadwasay kitay, ham nodwag fatoli hayo, kito kan Mwisis togon, ham idwam bawi. 2Da Pablo da Birnabi nalaban has taw, inbali wa gagran kawa noglabanan kitonya. Yakanga ista nagkasadiyan, ta somogo inda Pablo da Birnabi hanggan manga fadwasay tiba gis Antiyokya has Hirosalim, kaarakitay mangampangan has manga Fandiya-Barita sinya, hanggan has manga fagtahinan kawa tonya wa fag bagay. 3Ka Tifonan nasogo tonya fag manga taw, yakanga ta no nadalan has sakop Finisya hanggan sakop Samariya, ta nafadahit no kinday ka manga Hintil intiwala yadi wan. Ka manga fadwasay sinya nabaya wa dahol igdog. 4Ginya da Pablo nondasog has Hirosalim, ka manga Fandiya-Barita, hanggan ka manga fagtahinan, hanggan sadi wak dahonya Tifonan nabaya wa dahol dahol igdog. Da Pablo natoltol fagayo, nyawa kana, kan Diyos naibolon ta nogbarita. 5Dapat tiba Farisiyo kantiwala nafwayong yadi, Ka manga Hintil kamtiwala fag imtoli wan. Ham fag fwayong kitay ta fag imtanog wan in Mwisis togon. 6Ka manga Fandiya-Barita hanggan manga fagtahinan nanoltolan yapdi, ta nangayfan yapdi to fag mahori. 7Ginya madi ta noglabanan dogay las hampang, is Pidro nalindog, nalwang kitay, Manga fadwasay, tam twa wa kitay, itfagonan, is Diyos nafili angko, kaarakitay gingko bibig ka manga Hintil fag domog ka Fiya fag Barita hanggan imtiwala yadi wan. 8Is Diyos kaglag santam manga basad fangayofan nafaorongan kitay, hanyag tanggap yadi ka manga Hintil, hanya no nadisag it Maliyaw fag Falad has taw, kito yadi no nadisag hantam, is manga Hodyo. 9Pariho is Diyos nogbantay has manga taw hanggan hantam. Is Diyos nafalinay yadista manga fangayofan maskin tagsyag yadi han Hisos in Diyos-natogon-Famawi. 10Ya kana mayon tam nogsolay in Diyos, ham gayfan? In Mwisis togon tiba hantam, nyawa tam, nyawantam manga magorang, tam idwa nasyagan nafaanod. Kana mayon tam nogfahoriyan tonya has manga Hintil kamtiwala? 11No kinday tam nonbawi tam nontiwala, kawa gin Hisos intam Fon malooy fag kahowayan, ta kitonya yadi nombawi. 12Fagayo tantohas wagtoltolan, basta odi matalingan inda Birnabi da Pablo nogtoltol in Diyos naibolon madolaw has manga Hintil ta nogbarita. 13Da Pablo nontabo wagtoltol, is Santyago man ka kampang kitay, Manga fadwasay, ham fag matalingan man angko. 14Kati yadi haraw, is Simon Pidro no natoltol no kinday is Diyos no nafatawag ka manga Hintil bago bago, kaarakitay tibak Hintil imbali yadit sakop, 15tonyag faanod in Diyos manga fangampang fagfwayongon hyabi, noglwang kitay, 16Ginya madi ho kafwali ya, Farigon ya in Dabid oliyanan kandwat, Ho fatobo ya, falindog ya tonya 17Kaarakitay tiba taw lomigaw intam Fon, Kawa fagayo fag layonan taw angko yadi sakop 18Kitonyan Diyos fwayong kagfatohoyan tonya fag manga bagay, gi yapdis hyabi. 19Yakanga, angko fangayofan nangos, tam fag idwag fahoriyan ka manga Hintil ka kaakbang han Diyos. 20Dapat, tam fag somorat yap man has taw ka fiya, kitay, ta nangos fag idwa kwan nyawa kana fag bagay kasta nadisag has labang taw, fag idwag fabayowan, fag idwa kwan ka hayopan ka natay kantagbong, fag idwa yadi kwan folot. 21Maskin gi yapdis hyabi ta fagaba wagbasa in Mwisis manga togon sas manga fanimbaan Hodyo sas Sirang Kafahowayan. It manga hampang indog yadi has fagayo fag manga banwa. 22Yakanga ka manga Fandiya-Barita hanggan ka manga fagtahinan, hanggan ka Tifonan sadik dahonya, ista nagkasadiyan, fiya nogfili ka tibak taw kaarakitay tomahin inda Pablo da Birnabi has Antiyokya sas sakop Siriya. Ta nasogo inda Hodas, kasta faglwangon is Barsabas, hanggan da Silas. To fag manga ama ka manga fadwasay fagtahinan sas Hirosalim. 23Ka manga Fandiya-Barita nafadiya sorat has Antiyokya, kaglwang kitay, Hami ka manga Fandiya-Barita hanggan ka manga fagtahinan, mi gwas hayo, hyami manga fadwasay Hintil sas banwa Antiyokya, sas sakop Siriya, hanggan sas sakop Silisya. 24Mi nadog kitay ha akwa gi hyami Tifonan igfaagran hayo, dapat tonya bonwa hyami nasogo. Kasta manga nafwayong hayo, nafaadowan odi hayo. 25Yakanga hyami nagkasadiyan mi somogo ya ka tiba taw ha hayo. Ta omofod intam fagbayaon da Birnabi da Pablo, 26kadwa nahwangit it haboyagan maskin ta galwasi in Kiristo Hisos, kagfon intam. 27Yakanga migsogo nga ha hayo inda Hodas da Silas kaarakitay fatwagdog hayo ka hyami bato lwangon gistay fag sorat. 28Maskin hyami nagkasadiyan ka Maliyaw fag Falad nafatwagdog hyami kitay, mi fag idwag fahoriyan hayo no bonwa to fag manga bagay ka hyami fakasayaon orongan, 29kitay, ham fag idwa kwan nyawa kana fag manga bagay kandisag has labang taw, fag idwa kwan folot hayopan, fag idwa yadi kwan manga hayopan kantagbong. Fag idwa yadig fabayowan. Kafiyaon ham no bomaybay tonya fag manga bagay. Balinya lamang hyami sorat kati. 30Ginya madi ta nafalahaw wan inda Birnabi. Yakanga yabay, ta nondasog has banwa Antiyokya, sas sakop Siriya, ta nafatifon ka mangan tiwala. Ta nadisag has taw tonya fag sorat. 31Ta no nabasa ka sorat, ka manga taga sinya inrigon yat fangayofan maskin tansaya wagdog. 32Da Hodas da Silas in Diyos manga fangampang yadi. Aywan it nafwayong has mangam tiwala nafarigon ista manga fangayofan hanggan nafabali yadi maganit ta no katiwala. 33Gis nanya fag manga masohod ta nadogay yapdi ogbot sinya. Ginya madi ka manga taga Antiyokya nafaoli ya inda Hodas hasagsogo is taw. Ka manga fadwasay nadarangin kitay, fag fiya it manga lahawan nangos. 34Dapat is Silas naayfan kitay fiya hanya nomgoyan yapdi nangos sinya. 35Da Pablo da Birnabi nadogay yapdi sinya sas banwa Antiyokya. Aywan yadista manga ofod igfaadal hanggan igtoltol in Diyos hampang sinya. 36Ginya madi, aban ogbot, is Pablo iglwang han Birnabi kitay, Tam nangos fag kafwali ya, tam manabang intam manga fadwasay has fagayo fag manga banwa kantam nafaadal intam Fon hampang hyabi. Tam mamantay ya no kinday ka manga taw sinya kati. 37Is Birnabi kasaya kitay mamaofod ya nangos in Hwan, kasta fagngayanon is Hwan Markos. 38Dapat is Pablo dayo wagtaban maskin is Hwan hyabi idwa nafadagos naofod hanggan wa nafatabo ista lahawan, dapat naobon was taw, infwali wa dagos gis sakop Panfilya. 39Da Pablo da Birnabi kahodhoriyan wa gis nanya fag masohod, yakanga ta nanarowayan wan. Is Birnabi nataban in Markos, nasahay has baba dagat hawas foyo dagat Sipri. 40Dapat is Pablo nataban man in Silas. Ka manga fadwasay nontabo wagdarangin kitay intam Fon nangos fag ganos taw, da Pablo nalahaw wan. 41Da Pablo hawas sakop Siriya, hanggan sakop Silisya, nafarigon sinya in Diyos manga tifonan.

will be added

X\