NAIBOLON 14

1Kitonya yadi kasta naibolon sas banwa Ikonyo. Da Pablo da Birnabi nasakbaw has basad fanimbaan Hodyo, kafiyaon kadog ta nogbarita. Yakanga aywan fag manga Hodyo hanggan Girigo kantiwala. 2Dapat ka manga Hodyo ka dayo katiwala, nafasognod ka manga Hintil, nafadwat igdog yadi kaarakitay ta domayo ka mangam tiwala. 3Da Pablo da Birnabi nadogay ogbot sinya, igtoltol marigon has taw kawa hantam Fon baliwa. Intam Fon nafaanod yadi kitay orongan kasta nafwayong kawa hat kahowayan. Nafasyagan yadinda Pablo da Birnabi gibolon manga falagon madolaw. 4Dapat ka manga taw inbali dowak layonan sinya fag banwa. Ka sadik layonan balis manga Hodyo, ka sadi balinda Pablo. 5Ginya madi ka manga Hintil, manga Hodyo tiba, hanggan ista manga fagtahinan insadi kitay, ta mamahoriyan ka manga Fandiya-Barita hanggan wa bomintok. 6Dapat ka manga Fandiya-Barita nadog di ngay, ta nalibya wa dagos has banwa Listra hanggan has banwa Darbi, sas sakop Likaonya, hanggan sas manga ligongan. 7Ta nafaadal yadi sinya ka Fiya fag Barita. 8Gis nanya fag masohod, sadik ama sas banwa Listra idwa syagan iglahaw, kawa gis ogbot ginan danwa fihong. 9Hanyag talinga is Pablo nogtoltol. Is Pablo igdoro has ama fihong, nasarom kawa hanya kasyag kitay hanyam fiya. 10Yakangas Pablo nahampang marigon, nalwang, Ha fag lindog maslong. Ka ama nalokso, ginyag lahaw ngay. 11Ka fakaaywanan no nalag in Pablo naibolon, ta nanarawagan sas fangampangan Likaonya, iglwang, Manga diyos inbangkad hantam ha habilogan taw. 12Ta nafangayan in Birnabi is Siyos fag diyos, hanggan ta nafangayan yadin Pablo, is Hirmis fag diyos, maskin hanya wa kagtoltol. 13In Siyos fag diyos fanimbaan balis dasogan banwa. Kasta fagalan han Siyos, no nadog kitay hanbangkad, nagoyod manga todo baka, ha ono borahan, has dasogan banwa, ista fagsogbaon fangafiyan handa Pablo nangos. 14Dapat da Birnabi da Pablo natwa di ngay ista bato ibolonon, ta naragyang it sadili manga balokas, nadalandan hasta fagbokngan, natawag marigon, iglwang 15Ham manga ama, fag idwa gibolon kityamo. Hami taw yadi kito hayo. Hamig faadal lamang ha hayo ka Fiya fag Barita kaarakitay ham domayo wan ka kitonya fag manga bagay, kadwa ha kahologan. Ham fag kafwali ya ka has Diyos boyagan, ka nahalig banwa, hanggan daga, hanggan dagat, hanggan fagayo ka maoliyanan sinya. 16No hyabi di is Diyos igfabayaan fagayo fag manga layonan taw, nyawa gibolon no kana kat sadili fakasayaon. 17Dapat nyawa kitonya, hanya danwag disag hosto kagfahilala hantam in Diyos, hanggan igfaorongan kitay hanya mahoway hantam, kawa hanya mandi kagfahwayan gim tongod, kagfabohad aywan sas fanganiyon, kagdisag manga fanganon kaarakitay igfahapsog intam, hanggan kagfasolong igdog intam manga fangayofan. 18Nyawa kitay da Birnabi da Pablo kampang kindawan kitonya, ta ganong wadwa nasyagan nabando manga taw kaarakitay idwag sogba fangafiyan ha hanya. 19Dapat ha manga Hodyo naoyan yadi inda Pablo gis banwa Antiyokya sas sakop Pisidya, hanggan gis banwa Ikonyo. Ta nafasognod ka manga taw hanggan nabintok in Pablo. Ginya madi yabay, ta nagoyod hanya has dayo banwa, maskin ta gayfan hanya natay wan. 20Dapat ay, in Hisos manga katogbong no nasafongan in Pablo, is Pablo dagos wanlindog ya, infwali ya, hayas basad banwa. No bago marom is Pablo naofod in Birnabi hawas banwa Darbi yabay. 21Ginya madi da Pablo da Birnabi no natoltol ka Fiya fag Barita sas banwa Darbi, hanggan nafabali aywan fag manga taw in Hisos manga katogbong, tanfwali ya has banwa Listra, has banwa Ikonyo hanggan has banwa Antiyokya, sas sakop Pisidya, 22igfarigon sinya in Hisos manga katogbong fangayofan. Igtogon yadi kitay, ta fag fadagos wa katiwala orongan, iglwang yadi kitay, Tam domog yapdi aywan fag mahori bago di masog han Diyos banwanan. 23Ta nafili manga fagtahinan kagbahala han Diyos manga Tifonan fagayo. Ginya yabay, nontabo wagdarangin, idwa nangwan hanon, ta nafaano ka manga Tifonan hantam Fon kasta fagsyagon. 24Ginya ta nadalan has sakop Pisidya, yakanga ta nadasog has sakop Panfilya. 25Ta no natoltol in Diyos hampang sas banwa Pirgi, ta nalahaw has lwad, has banwa Atalya. 26Ginya fag banwa ta nasahay baba dagat, infwali ya has banwa Antiyokya, sas sakop Siriya. Gistay fag Antiyokya hyabi da Pablo da Birnabi no nafabago it ibolon igbarita giwasta nafaano ginan inda Pablo hantam Fon kafiyan. Kati in-anod wan kat manga ibolon kitay intonglos wan. 27Da Pablo nondasog wan, ta nafatifon ka mangan tiwala sinya fag banwa. Ta natoltol kan Diyos naibolon fagayo ginda Pablo, hanggan no kinday is Diyos nafaangay kitay manga Hintil fiya yadi nomtiwala. 28Da Pablo nadogay nangofodan in Hisos manga katogbong sinya.

will be added

X\