NAIBOLON 13

1Gis nanya fag manga masohod ha akwa in Diyos manga fangampang hanggan mangag faadal san Diyos Tifonan sas banwa Antiyokya sas sakop Siriya. Ka mangan aktom sinya da Birnabi, da Simyon kasta fagngayanon is Nigro, da Losyo taga banwa Sirini, da Sawlo, da Manain. Da Manain da Hirodis, ka gorangon sas Hodiya, no anahan yapdi, fagaba gofodan hyabi. 2Ka Tifonan nogfasayagdog in Diyos, hanggan idwa kwan hanon kaarakitay mandarangin, ka Falad Maliyaw nafwayong has taw, Fabokodan inda Birnabi da Sawlo hangko, kaarakitay ta fatonglos ka ibolonon kangko nafatohoyan ha hanya. 3Ginya madi, tadya nangwan hanon a, nandarangin mahogod, ginya nafwalid it manga gamat has dowak ama baba alfoyo, ginya ta nafalahaw inda Birnabi da Sawlo kaarakitay mamarita has manga taw. 4Yakanga ka Falad Maliyaw igsogo inda Birnabi da Sawlo kaarakitay mamarita. Tandasog has lwad has banwa Salosya sas gobang dagat. Ginya ta nasahay baba dagat hawas foyo dagat Sipri. 5Nondasog has banwa Salamina sinya, ta natoltol in Diyos hampang sas manga fanimbaan Hodyo. Is Hwan Markos ista ofod, inda Barnabi katogbong. 6Ta nadagos wa nalahaw gi sadik gobang dagat has banwa Papos sas bali fongfongan daga. Ta nalag sinya sadik ama Hodyo, is Bar Hisos, ka lipatan lipatan. Hanya sadik Hodyo kagfaniring kitay hanya in Diyos fangampang. 7Is Bar Hisos in Sirgiyo Pawlo ka gobirnador fakilalaon. Is Sirgiyo Pawlo sadik taw fiya it isip. Hanya nafatawag inda Birnabi da Sawlo maskin kasayagdog in Diyos hampang. 8Dapat ka lipatan lipatan, is Ilimas it ngayan sas fangampangan Girigo, igbando di ka Gobirnador kaarakitay idwam tiwala. 9Dapat is Sawlo, kasta nangayan yadis Pablo, kawa ka Maliyaw fag Falad sawa hanya sadi wak dahonya, igsinayan wat mata han Ilimas, ginyag lwang, 10Haw in Fandaya odi anak. Haw iglaban ka fiya fagayo. Sonson wa dwat, madaya ya ngadim manga ibolon. Kana mayon haw no fagabag fabarikwang ka fakaoronganan kawa han Diyos? 11Lag ngay, kati araw, fadosa wa hyamo. Is Diyos fabota wa hyamo mata, dogay hadwa lomag ka yawa myanit. Is Ilimas dagos wa nadog bilang wa ha sadik linyabo masding nataklob it mata. Iglahaw gayohapan odig ligaw no faktaw ka gomamithanya. 12Ka Gobirnador no nalag kitay is Ilimas inbota wan, hanyan tiwala wa han Diyos, hanggan indolaw wagdog ta nogfaadal kagfon intam it barita. 13Ginya madi da Pablo nasahay has baba dagat, in-ginan gis banwa Papos. Tandasog has banwa Pirgi, sakop Fanfilya. Dapat is Hwan Markos naobon is taw, nwali has Hirosalim. 14Da Pablo da Birnabi nafadagos it lahawan hanggan wandasog has banwa Antiyokya, sakop Pisidya. Ka Sirang Kafahowayan nondasog, da Pablo nasakbaw has basad fanimbaan Hodyo, intokaw wan. 15Ka manga Hodyo no namasa gin Mwisis manga togon hanggan gin Diyos manga fangampang sorat, ka mangag bahala sas tifonan Hodyo sas fanimbaan, iglwang handa Pablo, Manga fadwasay, ham no ha bato fwayongon has manga taw, fag fwayong wan. 16Ginyas Pablo nalindog, nafaaman is taw kitay ta fag idya gawang. Ginya nalwang, Ham in Israil manga hasokfonan, hanggan ka manga Hintil istay kagsimba yadi han Diyos, ham fag matalingan fiya fiya. 17Is Diyos, kantam tifonan Israil fagsimbaon, ka danwa nafili intam manga hafofowan. Ta no sayapdis sakop Ihipto is Diyos nafabali intam manga hafofowan sadik layonan taw kaaywanon. Ginya madi, maskin marigon wa dahol dahol is Diyos, hanya nafalahaw is taw gis Ihipto. 18Nyawadwa fiya bangan ista ogali, is Diyos naagwanta naano yapdis taw ofat ik safolok fangaraw ta no basad fakahyabogan. 19Ginya madi, is Diyos nontabo wagfadwat ka fitok layonan taw sas Kanaan, hanya nadisag man hantam manga hafofowan ista banwanan. Gi wasta nalin has Ihipto, 20hanggan ta no nwali ya has sakop Kanaan hanggan nadaog it manga kalaban, gamtanan 450 fangaraw it kadogayan. Ginya madis Diyos nadisag ka manga fangabaya has taw balin Diyos fangampang is Samwil. 21Ginya madi intam manga hafofowan no nasagad gorangon gin Samwil, is Diyos nafaangay kitay fag is Sawlo, in Kis anak, in Binhamin hasokfonan, kambali ista gorangon ofat ik safolok fangaraw. 22Is Diyos no nabol in Sawlo kangayanan, nafabali man in Dabid ista gorangon. Kiti in Diyos faorongan kawa han Dabid. Is Diyos iglwang, Hogbaya waglag in Dabid, in Hisi anak ogali. Talaga wamtanog angko manga kafangayofanan fagayo. 23Ginya madi, gi yadin Dabid hasokfonan, is Diyos nadisag han Israil hasokfonan kat natogon-Famawi, kawas Hisos. 24Is Hisos nodyag toltol has taw, is Hwan namarita sadik dahonya banwanan Israil kitay, ta fag somoyo wan, fag dayo ista manga ogali dwat, ginya fag fatogna wan. 25Is Hwan no kaakbang wa katabo igbarita, naintaw has taw, Faktaw aho, ham gayfan? Bonwa aho kan Diyos-natogon-Famawi, dapat ha kadasog wan ka omoyan sangko ginanan. Ho kaya ngadig lohas it famaganit lapak. 26Angko manga fadwasay, kan Abraham yadi hasokfonan, hanggan manga Hintil kagsimba han Diyos, hawantam kandiya to fag barita no kinday tam nombawi. 27Ka manga taga Hirosalim, hanggan ista manga fagtahinan, idwa natwa nadog kitay hanya wa ka Famawi. Tadwa natwa wagdog kan Diyos manga fangampang nafwayong gona, kasta fagbasaon fagayo fag Sirang Kafahowayan. Dapat taw mandi ka nafatonglos it nabasa no nafatohoyan kitay fahatayan in Hisos. 28Nyawa kasta fagsombongon idya fiya fahatayon, ta nasagad wa ngap gin Pilato kitay fahatayan wan in Hisos. 29Ta no nafatonglos wa fagayo fag manga bagay kansorat sas Kasoratan kawa han Hisos, ta nabol wat habilogan gis nafatimbangan hayo a, nafwalid basad lohib. 30Dapat ay, is Diyos nafaboyag ya domwag hanya. 31Ginya madi, aywan fag manga sirang is Hisos nafalag yapdit sadili hat manga ofod ka naofod hanya itfagonan hanya noglahaw gis sakop Galiliya, hawas banwa Hirosalim. Tonya fag manga taw kagfaorongan kati has manga taga Israil. 32Kati mistay wan kaarakitay fomwayong ha hayo ka Fiya fag Barita in Diyos natogon hantam manga hafofowan, 33kan Diyos nafatonglos hantam no nafaboyag ya in Hisos, kito kansorat sas fadowa fag ambahan, Haw angko wa anak, Aho im Ama. 34Kawas Diyos nafaboyag ya domwag hanya kaarakitay idwam dasog kaboyok, is Diyos iglwang kitay, Ho domisag ha hyamo ka maliyaw fag manga kafiyan Kangko nafatohoyan han Dabid. 35Nafwayong yadi sas iba fag ambahan, Hadwag faangay kitay is Maliyaw imboyok. 36Kawas Dabid nontabo wa gibolon in Diyos fakasayaon hyabi, kat manga kasohodan no boyagan yapdi, hanya natay wan, inlobgob sat manga magorang akbang, it habilogan inboyok wan. 37Dapat kan Diyos nafaboyag ya idwan boyok. 38Manga fadwasay, ham fag twagdog kitay, kati nabarita wa ha hayo kitay, giwan Hisos naagwanta, intam manga naogali dwat imliyam wan, 39hanggan gi wa hanya fagayo kagsyag hanya, intam manga naogali dwat imliyam wan, nyawa hyabi tam idwa syagan igfaliyam no katanog in Mwisis togon. 40Yakanga ham fag matagahan kaarakitay idwa hamlag sa hayo kito kan Diyos manga fangampang nafwayong kitay, 41Ham ka mangag yod, lag ngay, Ham imdolaw wa aban, ham hawas fadosaan. Aho omibolon sadik madolaw fag bagay ham nostay yapdi, Nyawa kindawan ham idwa katiwala, nyawa tagtoltol wa hayo. 42Da Pablo da Birnabi, no kadokson wa gis fanimbaan Hodyo, ka manga taw nafwayong kitay, Ham aban fanoltol ya to fag manga bagay sas domwag fag Sirang Kafahowayan. 43Ta nontabo wagtoltolan, aywan fag manga Hodyo orongan, hanggan manga Hintil kanbali manga Hodyo, natahin wanda Pablo da Birnabi. Da Pablo natoltol has taw nafwayong, Fag fadagos gogali ka maangay han Diyos malooy fag kahowayan. 44No domwag wa Sirang Kafahowayan, fagayo fag manga taw sinya fag banwa nanifonan kaarakitay domog in Diyos hampang. 45Dapat ka manga fagtahinan Hodyo kaingli waglag inda Pablo nogtoltol, maskin kaaywanon fag manga taw katiwala wan. Yakanga ta nafabohag wan, hanggan nafadwat igdog in Pablo. 46Dapat da Pablo da Birnabi nafwayong marigon, Ka fiya hami fag fomwayong yap in Diyos hampang ha hayo manga Hodyo. Dapat kawa ham nadayo in Diyos hampang, ham kagfatohoyan kitay ham idwa maangay has haboyagan idwa ha katabowanan. Gis kati ginan mi aba hawas manga Hintil no bomarita. 47Kito kagfon intam nogfasognod ha hyami kitay, Ho nafatohoyan hyamo bilang salong has manga Hintil Kaarakitay bomarita ka Famawi hanggan has kafongfonganan daga. 48Ka manga Hintil kabaya wagdog inda Pablo nafwayong, igfasayagdog kagfon intam it hampang. In Diyos manga nafatohoyan has haboyagan idwa ha katabowanan, intiwala wan. 49Ginya madi kagfon intam it hampang naskat wa sinya, sadi wak dahonya banwanan. 50Dapat ay, ka manga fagtahinan Hodyo nafasognod has manga ina masimbaon han Diyos, kasta manga fakilalaon sas banwa, hanggan ista manga fagtahinan fag manga ama kitay, ta fag fahoriyan inda Pablo da Birnabi. Ta nasogo wa ginya fag banwanan. 51Ginya madi ka dowak ama nafadagdag ka fogis daga gista manga bitis, bilang igfalag kitay ka taga sinyag dayo in Hisos, ginya hawas banwa Ikonyo. 52Dapat ay, in Hisos manga katogbong sas banwa Antiyokya, sakop Pisidya, kasolong wa dahol dahol, hanggan ka Maliyaw fag Falad sawas taw sadi wak dahonya.

will be added

X\