NAIBOLON 12

1Gis nanya fag manga masohod, is Hirodis, ka gorangon sas sakop Hodiya, nafagamat is taw tiba san Diyos Tifonan kaarakitay fahoriyan wan. 2Hanya nafalifong in Santyago liyog, in Hwan fadwasay fag Santyago. 3Ginya madi, is Hirodis no natwa kitay manga Hodyo igbayat naibolon, nadagos nasogo manga sondalo kaarakitay gomamat man in Pidro. Gis nanya fag masohod, ka manga Hodyo igtohod ka Fanohodan Tinapay Mayangfis. 4Ta no nagamat in Pidro ta nafaporiso hanya. Ofat ik layonan sondalo igtarobosan igbantay hanya, myasa ofat sa sadik layonan. In Hirodis fangayofan fabangkad in Pidro has fakaaywanan taw kaarakitay mangampangan nonsagaya wa ka Fanohodan Nagsagayan. 5Yakanga ha manga sondalo igbantay yapdin Pidro basad porisowan, dapat ay, in Diyos Tifonan dagos wagdarangin mahogod han Diyos kawa hanya. 6Ginya madi, kati wa fag basad yabi kitay, nomsirang araw is Hirodis nangos fabangkad in Pidro has hampangan, is Pidro matoyogan, it gamat matarabingan tarikada has sondalo baliw baliw. Ha akwa yadi manga sondalo matanodan dayo sakbawan porisowan. 7Sadi odi ginan in Diyos anghil inlag sinya, nayawa fiya fiya basad lingoban ogbot ogbot. Ka anghil natingfi in Pidro tagyangan nafafolaw hanya, ginyag lwang, Kalibang, ha fag kabangon wan. Ka manga tarikada inlohas wan gin Pidro gamat. 8Ginya ka anghil iglwang, Fag fafiyowan im rotay, solongan im lapak. Ginyas Pidro intanog wan. Ka anghil nafwayong ya domwag, Fag solong wam rotay aba, ginya ha fag tahin wangko. 9Is Pidro nadokson wan gis porisowan, naoyan ka anghil, dapat idya twa ngatay orongan ha anghil igfangolo hanya, gayfan hanya ngandig tagimfan. 10Ta nontolas manga dowak layonan sondalo kagbantay sinya, tandasog has fanahop baol sas sakbawan aladan has sokayan. Ka fanahop inboklas wa kitonya, yakanga ta nadokson wan. Ta no nadalan ha sadik karsada, ka anghil inliyam wa dagos. 11Ginya madis Pidro natwa wa kitay bonwa tagimfan. Yakangag lwang, Ya mangharaw, orongan wan angko nadalanan. Is Diyos nasogot anghil kaarakitay bomawi angko gin Hirodis hanggan gis manga mahori ka manga Hodyo bato ibolonon hangko. 12Is Pidro no naayfan fiya fiya, hawan Mariya balay, kan Hwan ina, ka Hwan kasta fagngayanon yadi is Markos. Kaaywanon fag manga fadwasay sinya matifonan igdarangin. 13Is Pidro no nataraktak sas fanahop sakbawan, sadik sogowan dayaga, is Roda, nabantay no faktaw kagtaraktak. 14Is Roda nahilala wa kitay, is Pidro mangharaw ka kampang sinya. Kawas Rodag baya wa dahol, idya naboklas ka sakbawan, nadalandan yapdi has basad balay, iglwang kitay, Is Pidro is nwa wan, dayo balay. 15Taglwang has dayaga, Ha ngandi kapaong. Dapat ka dayaga garonganon igfwayong, Sinya wan. Yakanga taglwang, Ngandayo in Pidro odi falad tonya. 16Dapat is Pidro mahogod wagtaraktak yapdi sas dayo balay. Ta no naboklas wa ka sakbawan, taglag is Pidro wa ngay, yakanga tandolaw wan. 17Dapat is Pidro igfaaman kitay, Ham ha gawang gawang. Ginya madis Pidro natoltol is taw no kinday is Diyos nafalfas hanya gis porisowan, nalwang, Fwayongan han Santyago hanggan hantam manga fadwasay tiba. Ginyas Pidro nalahaw wan, hawas iba banwanan. 18Nonsirang, ka manga sondalo di kahodhoriyan wan. Ta garintawan kitay no hadawas Pidro? 19Is Hirodis nafasayak it manga sondalo in Pidro, dapat tadwa ha lagan. Yakanga ta naintaw fiya fiya ka manga bantay. Ginyas Hirodis nafasognod kitay fahatayan wan ka manga bantay poriso. Ginya madis Hirodis nalahaw wan, hawas lwad has banwa Sisariya, nandogayan sinya. 20Gi yapdis fagonan, is Hirodis dogay wa kaisog has manga taga banwa Tiro, manga taga banwa Sidon. Yakanga tansadi wat fangayofan kitay ta omakbang han Hirodis kaarakitay imfafiyowan ya. Ta nahampang han Balasto kagbahala in Hirodis balay kitay, Ofodan nangos hyami han Hirodis kaarakitay mimfafiyowan ya, maskin ka manga taga Tiro hanggan taga Sidon nogbol it manga fanganon, gin Hirodis baba daga. 21Nondasog ista togonan fag sirang, is Hirodis nasolong it rotay, kalag wa kitay ha kangayanan, ginya natokaw sat tokawan fanokawan gorangon a, natoltol has taw fiya wa donggon. 22Manga taw igharokyawan wan, taglwang, Bilang wa sadik diyos ka kampang ti, bilang nangos bonwa taw. 23Gis nanya yadi in Diyos anghil dagos wa nafaiktan in Hirodis, maskin hanyag fahap in Diyos kangayanan. Hanya naolodan a, hanggan wa natay. 24Dapat ay, in Diyos hampang inlangba sasta manga basad fangayofan, hanggan wa naskat sadi wak dahonya banwanan. 25Nontabot ibolon sas Hirosalim, da Birnabi da Sawlo nwali wan has banwa Antiyokya. Ta nafaofod yadin Hwan, kasta fagngayanon is Markos.

will be added

X\