NAIBOLON 1

1Hogsorat ya ha hyamo Tiyofilo kati. Sangko sorat gona, ho nafwayong fagayo in Hisos manga naibolon hanggan it manga nafwayong gis bago mamwayong has taw, 2hanggan wanabwat ham tongod. Is Hisos bagon abwat ham tongod, natogon hat manga nafili Fandiya-Barita gis Maliyaw fag Falad. 3Is Hisos, nonsagaya wagdog mahori, fagaba wagfalag it sadili habilogan hat manga Fandiya-Barita. Kawa kitonya is Hisos nafaorongan wa kitay hanyan boyag ya ngay. Nafalag has taw ofat ik safolok sirang, natoltol yadi han Diyos sakop baliwa. 4Is Hisos no gofodan yapdi has taw, hanya natogon has taw kitay, Ham fag idyag lahaw gis banwa Hirosalim. Ham fanayan yapdi sinya angko Ama natogon it bato disagon ha hayo, kangko yadi faglwangon. 5Kawa sas danom is Hwan nogfatogna manga taw, dapat ay, ngalay wa aban, sas Maliyaw fag Falad ham nomtogna. 6Ta no gofodan yapdin Hisos, ta gintaw hanya kitay, Hyami Fon, ha aw fafwali ya nangos ha hyami kati in Israil sakop banwanan? 7Kiti is Hisos nogsagot, Angko ama ka bahala no ginahin fag masohod ka kitonya fag bagay, nyawa ham idwa twa no ginahin. 8Dapat ham tomanggap karigonan ka Maliyaw fag Falad nomdokson ha hayo. Ginya madi, ham bago digfaorongan angko sas banwa Hirosalim, sas sakop Hodiya sadi wak dahonya, sas sakop Samariya, hanggan wa sadik dahonya baba daga. 9Is Hisos nontabo wagfwayong kitonya, hanya dagos wan-abwat has tongod, it manga ofod no mabantayan yapdi hanya. Ginyas Hisos infarom wa has basad linyabo. 10In Hisos manga ofod no mabantayan yapdi has tongod, is Hisos no kaayayo, ha dowak ama, balokasan abohay nalindog sasta akbang. 11Tonya nalwang kitay, Ham manga taga Galiliya, kana mayon ham no mabantayan yapdi has tongod? To fag is Hisos, kan-abwat has tongod, imbangkad ya aban hastay is baba daga, kito mandi ka hayo lagan kati non-abwat ham tongod. 12Ginya madi ka manga Fandiya-Barita infwali ya has Hirosalim gis Moyod Oliboan, ngandayo manga sadik liho it kaayayowan gis Hirosalim. 13To ka mandi da Pidro, da Hwan, da Santyago, da Andris, da Filipi, da Tomas, da Bartolomi, da Matiyo, hanggan in Santyago sangay kan Alfiyo anak, in Simon yadi sangay kagbaliwa it kapariho Hodyo, hanggan kan Santyago anak fag Hodas. Ta no nadasog hat fangigyanan sas banwa, fagayo nadagos wa nasakbaw has tongod fag salogan. 14To fag manga ama, hanggan yadi manga ina, hanggan in Hisos manga fadwasay hanggan wat ina, is Mariya, fagaba gofodan igdarangin sinya. 15Nonsagaya manga fihin ik sirang, ka manga fadwasay nanifonan, manga sadik daan ha dowak safolo fagayo fagayo. Ginyas Pidro nalindog sasta fag bokngan, nafwayong kiti, 16Manga fadwasay, fag im-anod wan kanfwalid sas Kasoratan, ka Maliyaw fag Falad fwayong lan Dabid, kawa han Hodas ka nafangolo ka manga nagamat in Hisos. 17Is Hodas danwa hyami ofod hyabi, igtogbong yadi gibolon. 18In Hodas natanggap kwarta git naibolon dwat nasali daga. Is Hodas no nasongon, sinya wa kandagdag hanya nontobong. It tiyan inbosni wan, inbangkad yadi wat bitoha. 19Fagayo natwa wan sa sadi wak dahonya Hirosalim. Yakanga ta noglwang, tonya fag daga, Akildama, it kahologan, Daga Folot. 20Is Pidro igfwayong ya, Maskin insorat sas Kasoratan manga Ambahan, Fag idwa ha goli taw sat baba daga, Fag idwa hagbanwanan sinya nyawa fakta fag taw. Insorat yadi, Fag iba taw man ka fadagos it ibolonon. 21Kati nangos, tam fag fomili ya intam ofod sadi, kaarakitay faorongan yadit mata lagan kawas Hisos inboyag ya. 22Ka nangos omofod intam, fag ka mandi ka danwa koyog hyami, is Hisos no gofodan hantam hyabi. Fag ka sadik taw ka nalag in Hisos is Hwan nogfatogna hanya, hanggan balin Hisos non-abwat has tongod. 23Ta nafili dowak ama, da Matiyas da Hosi, kasta fan-ngayanan is Barsabas, it bansagan is Hosto. 24Ginya madi ta nandarangin kiti, Hyami Fon, haw twa no kinday sasta basad fangayofan fagayo. Fatohoyanan nangos ha hyami no faktaw gis dowa ka hyamo nafili, 25kaarakitay hanyam bali Fandiya-Barita ka fadagos in Hodas ibolon kat nadayo no hawat hadasogan. 26Ginya madi ta nafaaraktoman ka dowak ngayan. In Matiyas ngayan kasta nabol. Ginya madi tonya wa kanbali ista ofod indogang has safolo ha sadik Fandiya-Barita.

will be added

X\