2 TIMOTIYO 3

1Hogfatohod hyamo kitay, no sas ginanan sirang aban, tam domog mahori. 2Manga taw imbali wagsadili odi, it fagwason fagaba has kwarta wan, ha takan ya, mafasalagwaon ya, masabayonon ya ngadi. Tambali fanway ya has magorang, idwa gisip kitay tagtogbong hyabi hanya, idwa magalang han Diyos. 3Bohondi kitonyak dwat, idwa twa kaawa, idwa twag fasolon, kaplaon, idagdog wa dahol dahol ngadi kana kamlag, igfabohondi kas taw. Dayo ya ngadi has fiya. 4Labi man inya, im-oyon has manga taw kaglaban it ofod, igfalabi wat fangayofan, ha takan ya ngadi, bohonwas Diyos ista fakasolongon, ha odis manga dwat fag halibangan it fakasolongon. 5No kadog di to fag manga taw katiwala in Diyos, dapat ay, hadwa lagon in Diyos karigonan sat manga ogali. Haw fag idwa gamigosan ka kitonya fag manga taw. 6To fag manga taw tiba igsakbaw hasta manga balay, igfaadowan manga ina, hanggan wamdiya ista manga fangayofan, no dogay. To fag manga ina aywan it fagayfanon it manga ogali dwat hyabi, hanggan wa kati, aywan it manga fakasayaon dwat. 7To fag manga ina kasaya yadi wa tomwa has fiya, dapat ay, nyawa ginahin tadwa twagdog ka fakaoronganan. 8Tonya fag manga ama iglaban has fakaoronganan, kito yadinda Hanis da Hambris ka nalaban in Mwisis hyabi. Tadwa ha fagayfanon has fiya. Yakanga manga taw natwa waglag kitay tadwa katiwala orongan. 9Dapat ay, ista ogali dwat ha katabowanan di aban, maskin fagayo fadi wad tomwagdog kitay ista ogali kaidagdogan odi, kito yadi kanda Hanis da Hambris hyabi. 10Dapat ay, haw idwa kitonya, haw intanog angko adal ha hyamo. Haw nasokfon yadingko ogali hanggan angko fasadan. Haw fadi wad nalag aho nogsyag in Diyos, hanggan no gagwanta mahori, hanggan no galwasi has taw. Haw nalag kitay hodwag fagomon 11ta no nafahoriyan angko sas manga banwa Antiyokiya, Ikonyo hanggan Listra. Mahori wa dahol gis nanya hyabi. Dapat ay, kagfon intam nabawi angko ginya fag manga mahori fagayo. 12Ta fahoriyan intam fagayo ka kasaya gogali fiya kawa tam no katanog in Kiristo. 13Ka dwat fag manga taw labi man imdwat, ka manga bohagon igfaadal igfadagos wagdaya iba taw, ginya madi tonya yadi aban ka adayaan. 14Dapat ay, haw fag idwag dayo ka manga fakaoronganan kam naadal, kam fagsyagon marigon, kawa haw kilala fiya fiya ka manga nafaadal to ha hyamo. 15Gis ogbot ginan haw fadi wadtwa kitay ka maliyaw fag Kasoratan kagfadonong intam kaarakitay tam imbawi, kawa tam nogsyag han Kiristo Hisos. 16Is Diyos ka nafasorat ka Kasoratan fagayo. To fagayo ha kahologan nogfaadal ka fakaoronganan, nogfabohag kadwa orongan fag adal, nogfahaslong ka ogali barikwang hanggan igtaban has fiya fag ogali. 17In Diyos fangibolon no katanog ka Kasoratan, imbali hostot ogali, imyayom has fiya fag ibolon fagayo.

will be added

X\