2 TIMOTIYO 2

1Dapat ay, haw, Timotiyo, angko anak, fag marigon im fangayofan. Maskin haw insadi san Kiristo Hisos, it malooy fag kahowayan tomogbong hyamo. 2Haw fag faadal has manga matanogon fag manga taw kam donggon gingko sas basad fakaaywanan, kaarakitay tonya man fag manga taw ka mamaadal has tiba. 3Kawa haw in Kiristo Hisos fiya fag sondalo, fag gagwanta nyawa ha mahori. 4Kagsondalo no kasaya kitay kagsogo hanya bomaya wan, idwag falibang it ibolon has manga iba bagay. 5Kagsaringgonaan, nodwag fayayom hanya kito kasta fwayong, idwa ha tanggapon, maskin idwa gomonam dasog has hadasogan. 6Ka nangogodan gamas, tonya mandi ka fiya tomanggap bago bago it kahorayan gis ani. 7Ha fag gayfan fiya fiya angko fwayong hyamo, ginya madis Diyos igfatwag dog hyamo tonya fagayo. 8Haw fag tohod in Kiristo Hisos kawa hanya gin Dabid hasokfonan hanggan inboyag ya domwag gis kahatayan, kangko fagtoltolon Fiya fag Barita. 9To kat tigadan yadi no kana mayon ta no nafahoriyan angko hanggan wa nagafos, kito wa sadik taw ha kasalanan. Dapat ay, hadwa twa gafoson in Diyos hampang. 10Yakanga ho gagwanta wa fagayo fagayo fag manga bagay kawa han Diyos manga nafili, kaarakitay is Kiristo Hisos imbali ista Famawi hanggan domisag has taw it kafiyan kadwa ha katabowanan. 11Fandog ngay, ti wa kasta faglwangon kawag farigon intam, Tam nonhoyog han Kiristo Hisos kahatayan, Matohoyanan tam omofod yadi wa hanya aban, boyagan. 12Tam nodwag fagomon istay is baba daga, Tam tomogbong yadi aban in Kiristo hanya nogbahala has taw. Tam nogtangkod in Kiristo sas fagdogan manga taw, Is Kiristo aban tomangkod yadintam. 13Nyawa tam idwa maafanodon, is Kiristo maafanodon fagaba, Hanyadwa twag tangkod it sadili. 14Haw fag fatohod is taw to fag manga bagay. San Diyos ngayan, haw fag togon is taw kitay, ta fag idwag labanan no kadidwa ha kahologan fag manga hampang. Idwa ha fakinabang noglabanan kitonya, yatokitay igdiya di ngap has kadwatan ka mangag talinga. 15No baliday im fagsyaganon, haw fag kabali maangay san Diyos faglagan, sadik fangibolon kadwa ha fakayaon, maslong yadi nogfaadal ka orongan wa Fiya fag Barita. 16Haw fag idwa kalibang has manga toltol kadwa maangay, kadwa ha kahologan, kawa kagfadahit kitonya labi wa kaayayo wa ngap gin Diyos. 17Ka kitonya fag manga taw it fagfaadalon bilang wa kitos sadik bangbang igsablay wa labay, kaskat sadik habilogan. Dowak ama ka kitonya da Himiniyo da Filito. 18Tanayayo gis fakaoronganan hanggan nafaadowan ka mangan tiwala tiba. Taglwang kitay kati intolas wa ka manga taw no kaboyag gis kahatayan. 19Dapat ay, in Diyos nahalig fagrigonan intam fagsyagon bilang bato maganit. Kantigib yadi sinyag lwang kiti, Kagfon intam fadi wadkilala no fakta fag manga taw it sakop, iglwang yadi kitay, Fagayo kagsyag hantam Fon it ngayan, fag domayo ka dwat. 20Nyawa ka balay fiya wa kabantay, bohonwa fagayo ginto ngatay pilak ista botang sinya. Ha akwa di manga taya, manga anglit. No kawa manga sohadan ginto, manga pilak, ha toon kagfon nogbangkad no ha sohadon sinya. Dapat ay, no kadista manga taya manga anglit, sirang sirang nyawa faktaw, nyawa kanat fwalidon sinya. 21Nyawa faktaw santam ka kaayayo gis manga ogali dwat, kito yadi was botang ginto hanggan pilak ha fakinabang, fagaba intalaga hasagfon intam, intalaga has ibolon fiya. 22Yakanga haw fag dayo ka fakasolongon anahan kadwa fiya. Yatokitay, no baliday im fagsyaganon, haw fag kabali fiya, hanggan matanogon. Fag galwasi has iba taw, fag mahoway, kito yadis taw ka fiya it manga fangayofan, kagsyag yadi intam Fon togbong. 23Haw fag idwag talinga ka mangag labanan, kadwa ha kahologan, gawayan odit katabowanan. 24Ka fiya, in Diyos fangibolon fag idwag daraogan. Yatokitay, fag mahoway has fagayo fag manga taw, madonong igfaadal, maagwantaon yadi. 25Fag kampang mayan mayan no kabaya ka mangag laban hanya, nogfatohod is taw has fiya. No kitonya no kabaya, is Diyos ngandayo tomogbong is taw igsoyo, tomwa yadi ka fakaoronganan. 26Ginya madi, ista fangayofan ngandayo malfas ya aban, nyawas Fandaya naiktan sat siyok itfagonan, nasakop hanya.

will be added

X\