1 Manga fadwasay, kati katabowan angko sorat ha hayo. Ham nangos fag fadagos igdarangin kawa ha hyami kitay, in Diyos hampang madali wa maskat, hanggan aywan ka mamasayagdog kagfon intam, kito ka hayo. 2 Ham fag darangin yadi kitay ka manga dwat wa dahol fag manga taw idwa nangos domaog hyami, maskin idya fagayo intiwala hasagfon intam. 3 Dapat kagfon intam idwag fabayaan intam. Hanya farigon intam manga fangayofan, idwa yadig faangay kitay ka dwat domaog intam. 4 Kagfon intam kagfarigon hyami manga fangayofan kawa ha hayo, mi twa kitay ham katanog hyami fwayong ha hayo, hanggan ham igfadagos hayo ogali kitonya. 5 Kagfon intam nangos falangba hayo manga fangayofan kaarakitay ham labi man domog kitay is Diyos galwasi hayo, hanggan is Kiristo kagtogbong hayo gagwanta mahori, kito yadi hanya no naagwanta. 6 Manga fadwasay, maskin hami in Kiristo Hisos, kagfon intam, it manga sogowan, migfwayong ha hayo kitay, ham fag idwa maofod has manga taw ka mafang, kadwa katanog hyami manga togon has taw. 7 Ham fadi wadtwa kitay ka hyami ogali ka maangay yadi hayo fagtoladon. Hami idwa kafang gibolon, hami nos nyamo hayo hyabi. 8 Nyawa ginday fag taw, midwa natanggap fanganon mi nodwa nabayad. Yatokitay, mi gibolon hanggan wa kagayamonan, yabi sirang, kaarakitay ham idwa ha gastoson kawa ha hyami. 9 Bonwa kitay idwa fiya mi nogsyag hayo togbong, migtikis wa gibolon kitonya kaarakitay igfalag ha hayo fiya fagtoladon. 10 Mi no sayapdi hayo, to ka hyami togon ha hayo kitay, Fag idwag fahwan hanon nyawa fakta fag taw ka kafang gibolon. 11 Migfwayong kitonya kawa mi ha donggon kitay is nyamo hono hayo, ha akwa manga taw mafang gibolon, fagabag mawat hasta ibolon tiba taw. 12 Maskin hami in Kiristo Hisos, kagfon intam, it manga sogowan, migtogon hanggan igfaaronganon hanya fag manga taw mafang kitay, ista manga ogali fag maangay, hanggan ta fag gibolon wan kaarakitay lomag it sadili fangaboyagon. 13 Dapat ham, angko manga fakilalaon tiba, ham fag idwag fagomon gogali ka maangay. 14 Ngatay ha akwa taw sinya kadwa katanog hyami togon ha hayo istay fag sorat. Ham no danwa twa kitay tonya fag taw mafang, fag idwa maofod hanya kaarakitay hanya maya wan. 15 Dapat fag idwag fatimbang hanya intam kalaban, fag faadal hanya kitos fadwasay. 16 Nyawa kana ka hayo madalanan, kagfon yadi kahowayan kagfalokmay hayo manga fangayofan fagaba. Hanya fag sawa hayo fagayo. 17 Angko sadili gamat kagrirok to. Ahos Pablo ka gwas hayo. Kiti aho nogsorat angko ngayan sas katabowanan sangko fagfadiyaon sorat fagayo. 18 Ham nangos fag domog kitay kagfon intam, is Kiristo Hisos, fagaba mahoway ha hayo fagayo.
