2 TISALONIKA 2

1Manga fadwasay, tam mafanayan odi no ginahin is Kiristo Hisos kagfon intam nombangkad hastay hanggan tam nomtifon yadi ha hanya. Dapat ay, hogfaaronganon ha hayo kitay, 2ham fag idwa gadowan hayo manga fangayofan. Fag idwa yadi kabalaw ham nogdog barita kitay, intam Fon kabangkadan fag Sirang, hono, indasog wan. Ngatay manga taw gayfan kitay, hami ka nalwang kitonya hami, no nafwayong in Diyos Falad bato lwangon, ngatay no natoltol in Diyos hampang, ngatay mi no nasorat has taw. 3Nyawa kindawan tam fag idwa gadayaan nyawa faktaw, kawa tam twa matohoyanan kitay tonya fag Sirang mahalga idyam dasog manga taw nodyag tangkod hanggan iglaban fiya fiya in Diyos, ka goyan fag labanan, hanggan is Fanway kantohoyan has fadosaan nodyan lag. 4Gis nanya aban is Fanway ha habilogan taw, hanggan lomaban hasta manga fagsyagon, ista manga fagsimbaon fagayo, hanggan igfaabwat yadit sadili kangayanan, abwat man has fagayo. Hanya somakbaw hanggan tomokaw ya ngadi san Diyos basad Fanimbaan-Dahol, lomwang kitay hanya wa ka Diyos. 5Ham awkin idwag tohod kitay, ho danwa nafwayong ha hayo tonya fagayo, aho no sayapdi hayo? 6Balis kati ha akwa yapdig taktak in Fanway. Ham twa wan no kana tonya. No ginahin fag masohod aban is Fanway imlag wan. 7Is Fanway danwag faibolon ka madolaw fag kadwatan kati istay is baba daga, dapat kangko faglwangon idyam anod is Diyos nodyag bol kagtaktak in Fanway. 8Ginya madi is Fanway imlag wan, dapat ay, is Hisos kagfon intam nombangkad, it ipsaw fahatay in Fanway, hanggan ka masilaw sat atobangan domwat yadi hanya. 9Aban is Satanas domisag it karigonan han Fanway. Is Fanway nombangkad, hanya fatimawa fagayo hanggan omibolon yadi manga falagon madolaw, dapat igfalingo odis taw. 10In Fanway ogali dwat wa dahol maskin fagayo digfalingo ka manga taw ka has kadwatan, maskin tadwa kasayagdog, idwa yadig fahalga ka fakaoronganan kaarakitay tambawi. 11Yakangas Diyos igsogo has taw ka karigonan kagfalingo is taw kaarakitay igdaya has taw, yakanga ta katiwala kadwa orongan. 12Maskin kitonya fagayo kadwa katiwala ka fakaoronganan, dapat kawili manga ogali dwat, tonya fag manga taw fagayo imtohoyan has fadosaan. 13Manga fadwasay, hami fag fagabag baya in Diyos kawa ha hayo. Ham in Diyos fagalwasiyon, maskin ham in Diyos nafili gona sinya, kaarakitay ham imbawi hanggan it Falad karigonan fabali hayo manga taw kantohoyan han Diyos, kawa ham igsyag has fakaoronganan. 14Mi no natoltol ha hayo ka Fiya fag Barita hyabi, is Diyos nafatawag hayo kaarakitay ham imtohoyan hanya. Hanya nafatawag hayo kaarakitay ham domog yadi in Kiristo Hisos kagfon intam, it kafiyan. 15Yakanga, manga fadwasay, fag idwag fagomon, hanggan fag karigon no katiwala ka hyami nafaadal ha hayo manga fakaoronganan, mi no natoltol ha hayo hanggan nasorat. 16Is Kiristo Hisos kagfon intam, hanggan is Diyos intam Ama ka galwasi wa dahol intam, mahoway yadi hantam, hanggan igfarigon intam manga fangayofan, hanggan igfatohoyan intam fagfanayaon. 17Hanya fag farigon hanggan igfaganit yapdi intam manga fangayofan, kaarakitay intam manga ogali hanggan hampang fagaba maangay.

will be added

X\