2 TISALONIKA 1

1Ahos Pablo kagsorat ha hayo, hanggan to fag sorat gi yadinda Silas Da Timotiyo. Migsorat ha hayo ka san Diyos Tifonan sas banwa Tisalonika, ha hayo kantohoyan han Diyos intam Ama, hanggan han Kiristo Hisos kagfon intam. 2Ham nangos fag domog kitay, is Diyos intam Ama hanggan is Kiristo Hisos kagfon intam mahoway ha hayo fagaba, hanggan igfalokmay yadi hayo manga fangayofan. 3Hyami manga fadwasay, mi fagbaya in Diyos kawa ha hayo, nyawa ginahin. Maangay mi nogbaya kitonya kawa hayo fangayofan kalangba wan hasagsyag in Kiristo baliwa, hanggan ham kalabi wan no gadgalwasiyan. 4Kawa kitonya migfasayagdog hayo manga ogali mi nogfadog han Diyos manga Tifonan iba kitay, ham idwag fagomon igsyag in Kiristo, hanggan ham gagwanta nyawa tagfahoriyan hayo hanggan aywan hayo fagdogon mahori. 5Kawa ham idwag fagomon igfalag kitay is Diyos nogfatohoyan intam fagtanggapon, fakafiyan wan. Yakangas Diyos lomwang ham maangay wam-aktom hat sakop, maskin ham gagwanta mahori kati. 6Is Diyos gomanti no kinday ka fiya. Hanya fahoriyan aban has manga taw kagfahoriyan hayo kati. 7Hanya fahoway yadi hayo, ham kagdog mahori kati, hanggan fahoway yadi hyami. Is Diyos gomanti kitonya, is Hisos kagfon intam nomlag, no kabangkad gin Diyos banwanan sam tongod, ha hoyog yadit manga anghil ka syagan gibolon marigon. 8Hanya nombangkad aban sas fagbokngan afoy gigang. Hanya mamadosa ka kafang kilala in Diyos hanggan kafang katanog ka Fiya fag Barita kawa han Hisos kagfon intam. 9Kasta fadosaan aban idwa ha katabowanan fag kadwatan, saman yadi aban gisagfon intam. Tadwa yadi lomag it karigonan kafiyan. 10Tonya fag fadosaan im-anod wan gis nanya fag Sirang mahalga, intam Fon nombangkad kaarakitay ka manga taw kantohoyan han Diyos mamasayagdog in Hisos, hanggan fagayo kantiwala gomalang yadi hanya gis nanya. Maskin ham intiwala ka hyami natoltol barita ha hayo, ham yadi im-aktom sinya fag manga taw ka mamasayagdog kagfon intam. 11Kawa kitonya, hami fagabag darangin kawa ha hayo. Hyami fagdaranginon han Diyos kitay, kawa hanya marigon, hanya fatonglos hayo manga fakasayaon fagayo has kafiyan baliwa, hanggan fatabo hayo manga ibolonon fagayo ka hayo manga bato ibolonon kawa ham igsyag hanya. 12Intam manga ogali hanggan ibolon no kitonya, tam igfasayagdog in Hisos kagfon intam, hanggan hanya mamasayagdog yadintam. Imbali kitonya kawantam Diyos hanggan is Kiristo Hisos kagfon intam mahoway wa dahol dahol hantam.

will be added

X\