2 PIDRO 3

1Angko manga fakilalaon, tongko fadowa fag sorat ha hayo. Sas fagayo fag dowak sorat hogtikis wagfafolaw hayo isip, 2nogfatohod hayo in Diyos manga maliyaw fag fangampang fwayong hyabi, hanggan intam Famawi kagfon intam it togon hantam kat Fandiya-Barita nafadog ha hayo. 3Bago bago, fiya tam no tomwa kitay, sas ginanan fag manga sirang, ka mangag fasakop hat bali fangayofan masayaon, aba lomibak intam. 4Ta lomwang aban, Idwa awkin is Kiristo igtogon kitay hanyam bangkad ya? Kati hadawa ham iglag? Intam manga magorang natay wan, dogay wa hyabi yapdi, dapat gi yapdis kabali daga, hanggan wa kati, fagayo fag manga bagay idwan oman. 5Tag tikis wadwag bati ka fakaoronganan kitay, hyabi hyabi is Diyos nahampang lamang no nahalig intam daga hanggan banwa. Gis basad danom is Diyos no nafabago ka daga hanggan ha akwa yapdi danom igfodfoyowan sas fagbokngan daga. 6Gi mandis danom hyabi hyabi no nafagonaw hanggan nafadwat ka daga sadi wak dahonya. 7Dapat in Diyos hampang karigonan yadi kagfadogay intam daga hanggan banwa kati, kaarakitay im-irog hanggan imyagaw wa aban sas afoy, ka Sirang Fangabayan nomdasog, hanggan ka manga dwat fag taw nomdosa. 8Dapat, angko manga fakilalaon, tam fag idwa kaliyam. Tam fag tohod kitay intam Fon noglag, sadik sirang bilang wa 1,000 fangaraw, hanggan 1,000 fangaraw bilang odi sadik sirang, intam Fon nogfahalimbawa. 9Bohonwa kitay kagfon intam igfasigpalat togon, kito kasta isip tiba taw. Hanya gagwanta wagfanaya maskin idwa kasaya ngadi sadik taw fag has kadwatan. Not fasadan di, tam fagayo fagayo fag somoyo wan. 10Dapat ay aban, ka Sirang mahalga hasagfon intam imdasog, kitos fangnahaw. Gis nanya ka banwam liyam wa madali nograbog dahol dahol. Ka manga myanit, magdanon hanggan fanggasan imtonaw sas myanit. Fagayo sas baba daga hanggan ka daga imsonog yadi wan. 11Kawa to fag manga bagay fagayo imliyam yadi aba kitonya, kinday nangos ka fiya intam manga ogali kati, ham gayfan? Tam no mafanayan yapdin Diyos Sirang, tam fag imtohoyan hanya, hanggan fag gogali ka maangay. 12No baliday intam fagsyaganon, fag fadali wan tonya fag Sirang mahalga. Gis nanya fag sirang ka banwam sonog wa fiya fiya hanggan ka manga bagay sinya fagayo imsakop yadi wamtonaw wan. 13Dapat ay, tam ha fagfanayaon ya sadik banwa bago, hanggan sadik daga bago, kahaslongan lamang ka ogali sinya, kawas Diyos natogon kitonya. 14Maskin ngay, angko manga fakilalaon, no kandogay day tam no mafanayan yapdi to fag manga bagay, tam fag gogali ka mahoway, maangay hanggan manga taw fag idwa ha fagoliton intam. 15Tam fag tohod kitay kagfon intam gagwanta yapdig fanaya kaarakitay tam ngandayo imbawi yapdi. Tonya yadi kantam fadwasay Pablo faglwangon. Kawas Diyos nadisag it kadonongan han Pablo, 16kitos Pablo nogfatohod hantam hastay fag manga bagay sat sorat fagayo. Ha manga mahori katwagdog san Pablo manga sorat. Ka manga magomot fangayofan, hanggan kadwa twagdog in Pablo bato lwangon, igfalamang it kahologan nomtoon. Kitonya yadi ta nodwa twagdog tibak layonan gin Diyos Kasoratan, yakanga kadiya has kadwatan. 17Dapat ay, ham, angko manga fakilalaon, ho danwa nafatagak hayo. Ka manga taw kadwa maslong it bato ibolonon fag idwag faadowan intam, yakanga tam idwa kadiya gintam fagsyagon maganit. 18Yatokitay, tam fag bondi kito kat fagonan no kilala in Kiristo Hisos, intam Famawi, kagfon intam, hanggan fag kalabi wa hat kahowayan. Tam fag fasayagdog it kafiyan kati, hanggan aban aban. Fag kitonya wa ngay.

will be added

X\