2 PIDRO 2

1Dapat ay, hyabi ha akwa yadi manga bohagon fag fangampang san Diyos layonan fag manga taw. Kitonya man di aban, ha akwa yadi santam manga bohagon fag famaadal. Ta fomwayong hantam it manga adal kagfadwat odig dog kantam fakatiwalaon. Ta domayo kagfon intam ka nabayad kaarakitay tambawi wan, yakanga sadi odi ginan ista fadosaan imdasog wan. 2Aywan kamsayagdog aban, somokfon yadi ista manga ogali dwat. Kawa kitonya, manga taw aban fadwat igdog ka fakaoronganan Ogali Bago. 3Ka bohagon fag manga fangampang toltol bilang wa fakiyason nogfaadowan intam, kawa ta kasayag falingo intam, bomolay intam kaakwaan. Dogay hyabi ka Fangabaya nafatohoyan ista fadosaan, hanggan kagfadosa has taw idwa yadig toyog. 4Is Diyos idwan awa it manga anghil ka naogali dwat, dapat nafaporiso wan sas oliyanan fadosaan sas basad ohang marom, kaarakitay sinya wa kagfanaya magafosan sas basad marom, hanggan ka Sirang Fangabayan nomdasog wan. 5Is Diyos idwan awa ka manga taw sas baba daga hyabi hyabi no nafagonaw wan sadi wak dahonya, kawasta ogali sonson wa dwat. Dapat is Diyos nabawi in Nowi, kagtoltol kawa has kahaslongan, hanggan it ofod fito. 6Is Diyos nafatohoyan has fadosaan ka manga banwa Sodoma hanggan Gomora, yakanga nafayagaw wan, kaarakitay igfaisip yap ka tiba taw no kanat lagon aban no dwat ista ogali. 7Dapat ay, is Diyos nabawi in Lot, ka fiyat ogali hanggan kahori wa dahol ista manga ogali dwat has ka taw. 8Tonya fag is Lot, kawat ogali fiya, kahori wa dahol it fangayofan nogbanwanan sinya, kawa sirang sirang hanyag lag hanggan igdog ka manga dwat fag taw ogali mahaya. 9Yakanga kagfon intam twa wagbawi gis manga mahori, kagsolay intam, ka manga katanog hanya, twa yadig fadosa sadik kaban ya ka manga dwat it ogali hanggan wamdasog sas Sirang Fangabayan. 10Labi man fadosa ka manga goyon it bali fangayofan masayaon has hayan baliwa, kagdayog fasakop has ha kangayanan. Maisog ya, ha takan ya, idwag galang, igsalan ya ngadi kampang kawa has manga gis tongod. 11Nyawa ka manga anghil, ka marigon man has taw, hanggan idwa ha bosal, idyadi wa kampang kitonya, idwag fadog hasagfon intam, kito ka haraw ta nogsombong kasta manga naibolon. 12Dapat ay, to fag manga taw bilang wa hayopan myala, kadwa ha boot, fiya wa bato iktanon hanggan fahatayon. Tagfadwat digdog no kawa has manga bagay tadwa ha fakatwawon. Yakanga kito odis hayopan myala, fiya wa fahatayon. 13Tonya wa kat ganti kasta naibolon dwat has taw. Tagfadagos it dwat fag kasolongan nyawa basad wa sirang, kaarakitay im-anod it habilogan fakasayaon. Hayan wa lagon ta nogsayo hayo, tagbaya yapdit manga ogali kitay tagdaya hayo. 14Ka manga bohagon fag fangampang idwa ha fagsayahon iba fag halibangan, ha odista babay. Idwa twa taboon has ogali dwat. Tagtaban has kasolongan ka manga magomo it fangayofan. Inyayom wa masayaon. Intohoyan han Diyos fadosaan. 15Ta natalang wat dalan bato ogaliyon. Ta natolad in Balaam in Bosor anak, ka kasaya tangdan nogdaya has taw. 16Yakanga in Balaam hayopan asno nahampang wa hanya, bilang wa taw, kaarakitay kabaya in Balaam nogfalamang kampang. Yakanga, ka fangampang bato ibolonon kaidagdogan idwan tonglos. 17To fag manga fangampang bohagon bilang wa bolbogan inlanggang, bilang yadi manga linyabo, marigon fag bagyo igfafayag odi. Kan Diyos nafatohoyan hanya madala wa fag oliyanan, hawa basad basad marom. 18Myasa wa madonong kampang no kitay di, dapat ay, idwa ha kahologan kat manga fagfwayongon. Manga fakasayaon dwat has habilogan baliwa kwinta wat sangkap fafwali ya manga taw hat manga ogali dwat hyabi, ta no kabayan odi naobon tonya. 19To fag manga fangampang bohagon sogowan wa ogali dwat. Nyawa tagfasayagdog has manga taw kitay, tam bohonwa sogowan nyawa haday, idwa ha bawal nyawa kana, dapat ay, nyawa kana kagdaog intam, tam sogowan wa sinya, ya sogowan has dwat ka kitonya. 20Ka manga taw ka kilala in Kiristo Hisos, kagfon intam hanggan intam Famawi, nalfas gis kadwatan istay is baba daga. Dapat ta no kafwali ya hat ogali dwat hyabi, hanggan fadagos kalabi wa has dwat, it lagon aban, bohondi kitonyak mahori nodya kilala intam Fon. 21Balay balay hanya nodya natwa ka maslong fag ogali. Maskin mahori man ta no natwa wagdog ka fiya fag togon, ginya madi nadayo ya. 22No kitonya maangay wa fiya fiya ha hanya ka fwayongon kitay, Ka ido ogali, Ya kwan yat soha, Hanggan ka baboy, nyawa tam fomyagos, Kafwali ya has basad danawan.

will be added

X\