2 PIDRO 1

1Ahos Simon Pidro kagsorat ha hayo. Ahon Kiristo Hisos sogowan hanggan it Fandiya Barita. Hogsorat ha hayo, ka kito yadi hyami, in Kiristo Hisos, intam Diyos hanggan Famawi nagdisagan fagsyagon, kawa hanya maslong it ogali. 2Kawa ham kilala in Diyos hanggan in Hisos kagfon intam, ham nangos fag domog kitay hanya mahoway wa dahol ha hayo, hanggan igfalokmay fiya fiya hayo manga fangayofan. 3In Diyos karigonan nadisag hantam fagayo fag manga bagay kagfasyagan intam gogali has fiya, ka maangay han Diyos. Nadisag hantam kitonya, kawa tam kilala fiya fiya hanya ka nafatawag intam, kaarakitay tam ha horay yadi git kangayanan hanggan kafiyan. 4Kawa kitonya, is Diyos natogon it manga bato disagon hantam manga bagay kafiyaon, mahalga yadi, kaarakitay tam somyagan igbaybay ka kadwatan gis fangayofan masayaon istay is baba daga, kaarakitay tam myasa wa ha natanggap yadi in Diyos kafiyan. 5Kawa kitonya, maskin tam intiwala, tam fag mahogod wagsayak ka fiya fag ogali. Ginya madi, fag kabali madonong yadi. 6Ginya tam fag idwag falabi intam sadili fakasayaon, hanggan tam fag idwag fagomon nyawa mahori. Ginyantam fangayofan fag kabali maliyaw kito yadin Diyos. 7Ginya madi, tam fag galibitan hantam fadwasay no ha mahori, hanggan fag gadgalwasiyan yadi. 8Tonya fag manga ogali fagayo, no matohoyanan santam, hanggan kalabi man inya, intam haboyagan ha kahologan hanggan ha fakinabang, hanggan tam homilala wa fiya fiya in Kiristo Hisos kagfon intam. 9Nyawa faktaw nodwa ha akwa tonya fag manga ogali, bilang wa marom it mata fangayofan hanggan hanyadwag tohod kitay is Hisos nafaliyam it manga naogali dwat. 10Yakanga manga fadwasay, fag intam fiya fag manga ogali kagfalag kitay, tam in Diyos nafili hanggan nafatawag. No kitonyantam manga ogali, tam idwam tahid. 11Ginya madi, ta madali wagfasakbaw intam aban han Hisos intam Famawi, kagfon intam, hat sakop banwanan, kadwam liyam hanggan aban aban. 12Yakanga, hogfatohod yapdi fagaba ha hayo hanya baliwa, nyawa ham madonong wan, hanggan idwa kaoman gi hayo donggon fakaoronganan. 13Ho gayfan fiya aho nogfatohod hayo hanya baliwa aho no boyagan yapdi. 14Aho twa kitay ho kaakbang wa omobon toy angko habilogan istay is baba daga, kawas Kiristo Hisos kagfon intam nafaisip angko kitay kitonya. 15Kati aho homogodan yapdi omibolon, kaarakitay ham fagaba tomohod to fag manga bagay, nyawa aho malin wan gistay is baba daga. 16Mi noglwang kitay is Kiristo Hisos kagfon intam nombangkad aban, malagan kitay marigon wa dahol dahol, bohonwa kitay manga odi lisbay taw, taw odi ka naisip. Dapat ay, hyami wa mata lagan hyabi in Hisos kangayanan madolaw wa dahol dahol. 17Is Diyos intam Ama nafasayagdog in Hisos, hanggan nafatohoyan it kafiyan no nahampang gis kafiyaon fag kayawaan, nalwang kitay, To kangko fagalwasiyon fag Anak, ahog baya hanya. 18Hami sinya yadi, gofod in Hisos gis nanya, sas baba moyod maliyaw. Mi nadog tonya ka nahampang gin Diyos banwanan sam tongod. 19Yakanga hami labi man inrigon no katiwala han Diyos manga fangampang natoltol. Fiya ham no tomalinga yadi tonya fag manga toltol maskin bilang sadik salong basad marom kagfayawa hantam no baliday intam Fon Sirang nodyag fayawa istay, hanggan no baliday ka faramnag idyag yawa intam manga basad fangayofan. 20Dapat bago bago, tam fag tohod kitay, nyawa faktaw, not sadili fagsyaganon, idwa twa fatohoyan it kahologan in Diyos manga fangampang danwa nafwayong, ka has aban fag manga bagay. 21Maskin in Diyos manga fangampang no danwa nafwayong kitonya, bohonwa odi kitay ista kafangayofanan, dapat kawa gin Diyos hanggan ka Maliyaw fag Falad ka nafadonong kasta bato fwayongon.

will be added

X\