2 HWAN 1

1Aho sadik fagtahinan kagsorat ha hyamo, sadik ina kan Diyos nafili, hanggan ha hyamo manga anak kangko fagalwasiyon, kawa tam pariho igsyag has fakaoronganan. Bohondi aho, dapat fagayo kagsyag has fakaoronganan galwasi yadi hayo, 2kawa ka fakaoronganan fagaba kasadi santam hanggan aban aban. 3Kawa tam igsyag has fakaoronganan hanggan gadgalwasiyan, tam domog kitay is Diyos intam Ama, hanggan is Kiristo Hisos it Anak mahoway hantam, kaawa hanggan igfalokmay intam manga fangayofan. 4Hogbaya wa dahol dahol igdog kitay im manga anak tiba gogali has fakaoronganan, kito kantam Ama natogon hantam. 5Kati kangko fagsoraton ha hyamo bohonwa sadik togon bago, no bohonwa kitay ka mandi dan fag togon, ka gi yapdis bagon tiwala danwantam donggon kitay, tam fagayo fag gadgalwasiyan. 6Tam no gadgalwasiyan it kahologan tam katanog in Diyos manga togon. To ka mandintam donggon togon gi yapdis fabagowanan kitay, tam fag gadgalwasiyan. 7Ka manga bohagon in-aywan sadik baba daga, ka dayo katiwala kitay is Kiristo Hisos inbali taw. Ka kitonya fag taw igdaya, tonya ka madaya fag Kiristo. 8Tam fag matagahan kaarakitay idwam liyam intam nakayayan, ginya madi, nodwam liyam, tam tomanggap fagayo kan Diyos nafatalaga hantam. 9Nyawa faktaw kagfaaktom manga bagay tiba han Kiristo manga togon hanggan igsagaya hat manga togon, is Diyos idwa sa hanya. Dapat intam Ama hanggan it Anak fagaba kasadi has taw ta nogfadagos han Kiristo manga togon. 10Nyawa faktaw nogsabang hayo, it adal nodwa kito kan Kiristo togon orongan, hawag fasakbaw hantam basad balay, hanggan fag idwa maofod ha hanya, 11maskin ka gofod hanya kasadi hat manga ibolon dwat. 12Aywan yapdi nangos angko fwayongon ha hayo, dapat hodwa kasayag sorat tonya kati. Ho gayfan nangos ho hawas nyamo hayo aban. Ginya madi tam myasa wa sinya nogtoltolan kaarakitay tam igbadbayaan fiya fiya. 13Hyamo fadwasay ina, in Diyos nafili kito yadi hyamo, it manga anak gwas yadi hyamo.

will be added

X\