2 KORINTO 9

1Nyawa hodwa somorat domwag ha hayo, no kadi hasagtogbong baliwa has manga fadwasay, 2maskin ho twa wa kitay ham talaga wa tomogbong. Ho nafasayagdog has manga taga Masidonya kitay ham matogbongon wa dahol. Itfagonan yapdi fag fangaraw, hoglwang kitay, ham manga taga Akaya dan wa kasayag togbong. Kawa ham kasayag togbong, aywan taga Masidonya kan-abay wagdog, igdisag yadi. 3Yakanga aho nafagona intam manga fadwasay has nyamo hayo, kaarakitay hodwa maya aban, kawa ho nafasayagdog is taw kitay, ham matogbongon, kaarakitay ham mamatalaga hayo togbong kito kangko nafwayong. 4Aho ongay maya wan, dapat ham labi man maya wan, no ha tomahin angko taga Masidonya, ta noglag kitay ham idya nafatalaga, mangharaw, hayo bato disagon has taw. 5Yakanga ho nafaaronganon hantam manga fadwasay kitay, ta nangos fag gomona wangko has Korinto kaarakitay ka hayo natogon kitay ham tomogbong, fag matohoyanan intalaga wan. No kitonya, imlag wa kitay ham igdisag, bohonwa kitay sas pilitan, giwas sadili fangayofan. 6Fanlag ngay, ham fag tohod, kagtanom sayok, gani yadi sayok. Kagtanom aywan, aywan yadit aniyon. 7Tam fag kafod igfatohoyan kantam bato disagon, ginya disagan wa tonya, idwa mabyat sas fangayofan, bohonwa kitay napilitan. Maskin is Diyos galwasi kagdisag masolong. 8Is Diyos syagan igfaaywan hayo manga kaakwaan fagayo, iglabi hayo sadili fakasayaon, kaarakitay ham syagan igtogbong has fagayo fag ibolon fiya, kawa idwa korang ka hayo sadili. 9Kito ka Kasoratan iglwang, Hanyag fahafod fagaba has taw, Madisagon has manga myabog, Ta tomohod it kahowayan hanggan has aban aban. 10Is Diyos kagdisag binhi ista bato tanomon, hanggan ka tinapay ista fanganon, hanya yadi kagdisag ha hayo binhi hanggan igfatobo hanggan igfalangba tonya, kaarakitay hayo kahowayan ham nogdisag has taw bomohad aywan. 11Is Diyos faaywan hayo kaakwaan fagayo, kaarakitay ham labi man syagan igtogbong has fakaaywanan fagaba. Yakanga aywan ka bomaya han Diyos, kawa hayo togbong aho domiya has taw. 12To hayo togbong hantam manga fadwasay, bohondi kitay tomogbong kasta kakorangan, dapat ginya wa ginan aywan ka bomaya han Diyos. 13Kawa ham idwa kwangit igdisag kagfalag has taw kitay, ham katanog wa orongan in Kiristo Fiya fag Barita. Kawa kitonya, ham mamalag in Diyos kafiyan. 14Ta lomag kitay is Diyos mahoway wa dahol ha hayo, hanggan ta fagaba wa aban domarangin yadi ha hayo kawa ta galwasi hayo. 15Dapat ay, tam igbaya wa dahol han Diyos, kawat disag hantam idwa ha somohod, no taw di.

will be added

X\