2 KORINTO 8

1Angko manga fadwasay, ho kasayag fadog ha hayo no kinday in Diyos malooy fag kahowayan indisag hat manga Tifonan sas sakop Masidonya. 2Tanhyabog wa dahol dahol a, sadi wak solay mahori has taw, dapat ay, tadwag fagomon kasolong igdisag, mahogod ya ngadi, nyawa tanhyabog wa dahol. 3Kawat sadili fangayofan ta nadisag bohondi kitay no dahoday odi ogbot, dapat ay, ta nafalabi ya ngadit disag. 4Tadwa nafagomon igfaaronganon hangko kitay, ta fag domisag yadi hantam manga fadwasay sas Hodiya. 5Kasta disag igsagaya wangko fagasolopon. Bago bago ta nadisag yapdit sadili hasagfon intam, ginya madi bago di ha hyami, kawan Diyos wa kafangayofanan kitonya. 6Ya kawas Tito ka nafwayong bago bago ha hayo hasagdisag baliwa, yakanga ho nafaaronganon in Tito kitay, fag hanya ka tomogbong yadi hayo, kaarakitay ham igfaanod wa fiya fiya igdisag yadi togbong has manga taw sas Hodiya. 7Yabay, ham kafiyaon nomtiwala, kafiyaon nogtoltol, madonong yadi wa dahol. Ham maibolon wan, hanggan ham galwasi wa dahol hyami. Kati, ham fag kafiyaon yadi hasagdisag baliwa. 8Bohonwa kitay aho kagfasognod hayo, ka odi kitay hogfadog hayo, kawa tibak taw kasolong igdisag, kaarakitay imlag kawa ham orongan wa galwasi yadis taw. 9Tam fadi wad twaglag in Kiristo Hisos, kagfon intam, it malooy fag kahowayan. Nyawa hanya maakwa wa dahol dahol, hanya natikis wanbali myabog kaarakitay falobos hantam it kaakwaan. 10Kitingko fwayong kawa hasagdisag baliwa. Hyabi fag fangaraw ham ka naowas gona gona, hanggan nafabago yadig togbong. 11Kati ham fag fadagos wa tonya. Ham mahogod wa nogfabago hanggan wa kati ham fag mahogod mandig fatabo. Ham fag disag no dahoday hayo fagsyaganon. 12Maskin ham no kasayag disag, is Diyos tomanggap no dahoday hayo fagsyaganon igdisag. Dapat ay, is Diyos idwag manaw, ham nodwa nasyagan igdisag dahol. 13Bohonwa kitay angko fangayofan kasta disag nyawa ogbot, dapat ka hayo fag dahol man. Fag fakafiyan wan. 14Ham kati ha akwa wan. Gwadi ham fag togbong yadi has manga myabog. No aba ham man kadwa ha akwa, ta aba tomogbong yadi hayo. Yakanga no kitonya, ham pariho igtarogbongan ha sadi ha sadi. 15Ginya madi im-anod yadi kansorat sas Kasoratan kitay, Kagtifon aywan, idwa ha labi, Kagtifon sayok idwa yadi komorang. 16Hogbaya han Diyos kawas Tito galibitan wa ha hayo kafiyan, kito yadingko no galibitan hayo. 17Hogfwayong han Tito kitay, sabangan nangos hayo, dapat is Tito danwa ha fangayofan kitonya, nyawa hodya naowas. 18Ho nafaofod yadi han Tito intam fadwasay ka dan wasta fakilalaon sas fagayo fag Tifonan, kawa nogtoltol ka Fiya fag Barita. 19Bohondi kitay tonya, dapat ka manga Tifonan nafili yadi hanya kaarakitay omofod hyami hami noglahaw, tomogbong yadi hyami igbahala hasta manga disag. Ka kitonya fag ibolonon, igtogbong has taw, igfasayagdog intam Fon, igfalag yadi kitay aho gwayan wa kasaya yadig togbong hayo. 20Mi matagahan fiya fiya kaarakitay tadwa ha lwangon hyami, nyawa faktaw, kawa hami wa kagbahala toy, ista disag gorangon. 21No baliday hyami fagsyaganon, migfatonglos fiya fiya to fag ibolonon, bohondi kitay maangay santam Fon faglagan, dapat maangay yadi sas taw faglagan. 22Yakanga hami nafaofod has taw intam fadwasay sadi ya. Mi danwa nalag fagaba kitay, kafiyaon hanya nogtogbong. Kati hanya labi man fiya no matogbongon kawa katiwala wa fiya fiya hayo. 23Kawa han Tito, is Tito kawangko ofod igtogbong yadingko ibolon. Kawan Tito manga ofod, ka manga Tifonan ka nasogo intam manga fadwasay has taw, kawa manga matanogon fiya fiya han Kiristo. 24Yakanga ham falagan wa kitay ham orongan wa galwasi tonyantam manga fadwasay, kaarakitay ka manga Tifonan idwa lomwang kitay hami igbohag di noglwang kitay ham mahoway wa dahol.

will be added

X\