1 Kawa hami in Diyos wa manga katogbong fangibolon, migfaaronganon ya ha hayo kitay ham fag idwag fasigpala in Diyos malooy fag kahowayan hantam. 2 Maskin is Diyos iglwang, No ginahin ka maangay, ho natalinga hyamo, Sas Sirang Famawiyon, ho natogbong hyamo. Fandog ngay, kati wan ka maangay fag kasohodan, kati wan ka Sirang Famawiyon. 3 Hogtikis wagbaybay nyawa kana kadwa fiya, kaarakitay tadwa ha fabangdanan gingko. 4 Yatokitay sangko manga ogali fagayo fagayo, hogfatwagdog has taw kitay ahon Diyos wa fangibolon. Ho maagwantaon wan nyawa basad mahori, nyawa ta kaisog angko, nyawa ho galibitan wan. 5 Nyawa ta nabakbak angko hanggan nafaporiso, nyawa ha gagran, nyawa ho gibolon mabyat, nyawadwag toyog, nyawadwa ha fanganon nomtoon, hodwag fagomon. 6 Kawa angko ogali maangay kagfatwagdog has taw kitay ahon Diyos wa fangibolon, hanggan ha fakatwawon, maagwantaon, mahoway yadi kawa ka Maliyaw fag Falad sawangko, hanggan ho orongan wa galwasi manga taw. 7 Kawa fakaoronganan kangko fagtoltolon, hanggan in Diyos karigonan. Ka fakafiyan kangko fanlaban hanggan angko fanaktak. 8 Ho ha nadalanan wa fagayo, nyawa tagbaya angko, nyawa tagfadwat igdog, nyawa tagyod tiba ginan, nyawa tagfasayagdog. Fakaoronganan wan kangko nafwayong, dapat taglwang yapdi kitay aho bohagon. 9 Tagfaiba tawon angko, dapat ta kilala di, ho kahatay wa tiba ginan, dapat boyagan yapdi aho. Nyawa tagfadosa wangko, tadwag fahatay. 10 Ho karongkot ongay, dapat fagaba kasolong, myabog, dapat hogfaakwa has aywan fag manga taw. Hodwa akwa akwa no kalag di, dapat ay, fagayo fag manga bagay angko wan. 11 Angko manga fakilalaon sas Korinto, hodwa ha nafyalom ha hayo angko manga hampang. No kana sangko basad fangayofan, tonya wa kangko fagfwayongon ha hayo. 12 No aho di, ho galwasi wa dahol dahol hayo, dapat ham idwa bangan mahoway hangko. 13 Ho bilang wa hayo ama, aho no kampang ha hayo, yakanga hayo fangayofan fag mahoway yadi hangko, kito yadi aho no mahoway ha hayo. 14 Tam fag idwa kasadi has mangadwan tiwala. Ka maslong hanggan barikwang syagan awkin gofodan, ham gayfan? Ngatay ka mayawa hanggan ka marom syagan kasadi? 15 Da Kiristo da Bilyal syagan awkin gamigosan? Kinday kantiwala hanggan kadwan tiwala nombali maamigosan? 16 Kinda araw ka manga tolad faglohodon nomaktom han Diyos fanimbaan, ham gayfan? Kawa tam wa kan Diyos boyagan it fanimbaan. Maskin hanya yadi kagfwayong, Homsadi sas taw hanggan domogayan sasta akbang. Aho aban it Diyos wan, tambali yadi wangko manga taw. 17 Is Diyos iglwang yadi, Yakanga ham fag ayayo gis iba taw, Ham fag idwag sapkid ka manga ogali dwat, Ginya ho tomanggap yadi hayo. 18 Intam Fon, kadwa ha bosal, iglwang, Ahom bali hayo ama a, Ham imbali yadi wangko manga anak.
